ຍີ່ປຸ່ນ ແລະ ສ.ເກົາຫລີ ພ້ອມສະກັດ ຈະຫລວດ ສປປ ເກົາຫລີ ກ່ອນເຖິງເກາະກວມ
ລັດຖະບານຍີ່ປຸ່ນພ້ອມໃຊ້ມາດຕະການທີ່ຈຳເປັນ ປົກປ້ອງອະທິປະໄຕຂອງປະເທດ ເຊິ່ງຢູ່ໃນລັດສະໝີຂອງລູກສອນໄຟ ສປປ ເກົາຫລີ, ພາຍຫລັງລັດຖະບານພຽງຢາງປະກາດວ່າ: ແຜນການໂຈມຕີຖານທັບອາເມລິກາຢູ່ເກາະກວມຈະສຳເລັດພາຍໃນກາງເດືອນສິງຫານີ້.
ສຳນັກຂ່າວຕ່າງປະເທດລາຍງານນະຄອນຫລວງໂຕກຽວ ປະເທດຍີ່ປຸ່ນ ໃນວັນທີ 10 ສິງຫາວ່າ: ທ່ານ ໂຢຊິຮິເດະ ຊີກະ ເລຂາທິການຄະນະລັດຖະບານຍີ່ປຸ່ນ ກ່າວວ່າ: ຄວາມອົດທົນຂອງຍີ່ປຸ່ນທີ່ມີຕໍ່ສະຖານະການຢູ່ແຫລມເກົາຫລີມີຂີດຈຳກັດ ແລະ ການທີ່ລັດຖະບານພຽງຢາງປະກາດວ່າຈະຍິງລູກສອນໄຟໄລຍະກາງໂຈມຕີຖານທັບອາເມລິກາຢູ່ເກາະກວມ ຖືເປັນໄພຄຸກຄາມດ້ານຄວາມໝັ້ນຄົງຂອງຍີ່ປຸ່ນ ແລະ ປະຊາຄົມໂລກເຊັ່ນກັນ ເຊິ່ງກອງກຳລັງປ້ອງກັນຕົນເອງ (SDF) ຈະໃຊ້ມາດຕະການທີ່ຈຳເປັນ ເພື່ອປົກປ້ອງອະທິປະໄຕຂອງປະເທດ.
ຂະນະທີ່ທ່ານ ເອັດດີ ແຄລໂວ ເຈົ້າຄອງເກາະກວມ ກ່າວເຖິງກໍລະນີທີ່ ສປປ ເກົາຫລີ ປະກາດຄວາມພ້ອມໃນການຍິງລູກສອນໄຟໂຈມຕີພື້ນທີ່ພາຍໃນກາງເດືອນສິງຫານີ້ວ່າ: ເປັນສົງຄາມຈິດຕະວິທະຍາຂອງລັດຖະບານພຽງຢາງໃນການສ້າງຄວາມຢ້ານກົວລ່ວງໜ້າໃຫ້ແກ່ທຸກຝ່າຍທີ່ກ່ຽວຂ້ອງ. ເຖິງຢ່າງໃດກໍຕາມ ໂດຍສ່ວນຕົວທ່ານເຊື່ອວ່າ: ລະບົບປ້ອງກັນລູກສອນໄຟຢູ່ ສ.ເກົາຫລີ ແລະ ຍີ່ປຸ່ນ ຈະສາມາດສະກັດຈະຫລວດຂອງ ສປປ ເກົາຫລີ ໄດ້ ກ່ອນຈະເດີນທາງເຖິງເກາະກວມ.
ຂະນະທີ່ທ່ານ ໂຣ ແຈຊອນ ໂຄສົກເສນາທິການທະຫານຮ່ວມ ສ.ເກົາຫລີ ຖະແຫລງຕໍ່ສື່ມວນຊົນວ່າ: ສ.ເກົາຫລີ ໄດ້ກຽມການຕອບໂຕ້ໃນທັນທີ ຖ້າມີການຍິງຈະຫລວດຈາກ ສປປ ເກົາຫລີ, ເຖິງວ່າກອງທັບ ສ.ເກົາຫລີ ຍັງບໍ່ພົບວ່າມີການເຄື່ອນໄຫວທີ່ຜິດປົກກະຕິຈາກ ສປປ ເກົາຫລີ ທີ່ຖືເປັນການຍົ່ວຍຸກໍຕາມ.
ສ່ວນ ສປປ ເກົາຫລີ ບໍ່ສົນໃຈຄຳເຕືອນຂອງປະທານາທິບໍດີ ໂດນັນ ທຣຳ ຜູ້ນຳອາເມລິກາ ທີ່ກ່າວວ່າ: ຈະຕອບໂຕ້ ສປປ ເກົາຫລີ ໃຫ້ລຸກເປັນໄຟ ແລະ ຢ່າງຮຸນແຮງຖ້າຄຸກຄາມອາເມລິກາ.
ນອກຈາກນີ້, ທ່ານ ແຄລໂວ ເນັ້ນວ່າ: ຢູ່ເກາະກວມກໍມີລະບົບປ້ອງກັນລູກສອນໄຟເຊັ່ນກັນ ເຊິ່ງຕັ້ງຢູ່ພາຍໃນຖານທັບອາກາດ ແລະ ທ່າຈອດເຮືອຂອງກອງທັບອາເມລິກາ ພ້ອມທະຫານອີກປະມານ 7.000 ຄົນ ແລະ ຂໍໃຫ້ປະຊາຊົນເຊື່ອໝັ້ນຕໍ່ປະສິດທິພາບທາງທະຫານຂອງອາເມລິກາວ່າຈະສາມາດຄຸ້ມຄອງໜຶ່ງໃນດິນແດນຂອງລັດຖະບານວໍຊິງຕັນໄດ້ຢ່າງແນ່ນອນ.
