ໂຣນັລໂດ ຕັດສິນໃຈອະນາຄົດກັບ ແມນຢູ ຮຽບຮ້ອຍແລ້ວ

ຟາບຣີຊີໂອ ໂຣມາໂນ ນັກຂ່າວຊື່ດັງຊາວອີຕາລີ ລາຍງານວ່າ ຄຣິສຕຽນໂນ ໂຣນັລໂດ ກອງຫນ້າທີມຊາດໂປຣຕຸເກສ ຕ້ອງການຢູ່ກັບແມນເຊສເຕີ ຢູໄນເຕັດ ຕໍ່ໄປອີກໃນລະດູການຫນ້າ.

ສຳລັບ ໂຣນັລໂດ ອາຍຸ 37 ປີ ໂຊຟອມໄດ້ຢ່າງຮ້ອນແຮງ ຍິງໄປແລ້ວ 24 ປະຕູ ກັບອີກ 3 ແອສຊິສ ຈາກການລົງຫລິ້ນ 37 ນັດລວມທຸກລາຍການໃຫ້ກັບແມນເຊສເຕີ ຢູໄນເຕັດ ໃນລະດູການນີ້ ແລະ ຍັງເຫລືອສັນຍາກັບທີມອີກ 1 ປີ ພ້ອມຕົວເລືອກສາມາດຂະຫຍາຍໄດ້ອີກ 1 ອີກ ແຕ່ຈາກການທີ່ ແມນຢູ ອາດບໍ່ໄດ້ໄປຕໍ່ຢູຟາ ແຊ໊ມປຽນລີກ ໃນລະດູຫນ້າ ເຮັດໃຫ້ມີກະແສຂ່າວອອກມາຢ່າງຕໍ່ເນື່ອງວ່າ ໂຣນັລດ ອາດຍ້າຍກັບໄປກັບ ຣຽວ ມາດຣິດ ຫລັງຈົບລະດູການນີ້.

ແນວໃດກໍຕາມ ລາຍງານຫລ້າສຸດຈາກ ໂຣມາໂນ ລະບຸວ່າ ໂຣນັລໂດ ຕ້ອງການຈະຢູ່ກັບທີມຕໍ່ໄປ ແລະ ກຽມເຈລະຈາກັບ ເອຣິກ ເທນ ຮາກ ຜູ້ຈັດການທີມຄົນໃຫມ່ໃນໄວໆນີ້ ແລະ ເຖິງວ່າຈະມີຂ່າວຕ້ອງການຈະຊື້ກອງຫນ້າຄົນໃຫມ່ ແຕ່ເລື່ອງນີ້ກໍບໍ່ໄດ້ມີຜົນກັບການຕັດສິນໃຈຂອງ ໂຣນັລໂດ ທີ່ມີຄວາມຫມາຍຫມັ້ນວ່າຕ້ອງການຈະຢູ່ກັບທີມແມນຢູຕໍ່ໄປ.