ເສື້ອ ມາຣາໂດນາ ຊຸດແຊ໊ມປີ 1986 ສ້າງສະຖິຕິຍອດປະມູນສູງສຸດໂລກກິລາ
ເສື້ອແຂ່ງຂັນຂອງ ດີເອໂກ ມາຣໂດນາ ຕຳນານນັກເຕະທີມຊາດອາເຈນຕີນາຜູ້ລ່ວງລັບ ທີ່ລາວໃສ່ລົງສະຫນາມໃນການແຂ່ງຂັນບານໂລກປີ 1986 ເຊິ່ງມີເຫດການ ‘‘ ຫັດພະເຈົ້າ ’’ ເຮັດຍອດປະມູນເປັນສະຖິຕິຂອງທີ່ລະລຶກກ່ຽວກັບກິລາດ້ວຍຈຳນວນ 7,14 ລ້ານປອນ.
ສຳລັບເສື້ອແຂ່ງຂັນດັ່ງກ່າວນັ້ນເປັນຕົວທີ່ ມາຣາໂດນາ ສວມໃສ່ໃນເກມບານໂລກ 1986 ຮອບຮອງຊະນະເລີດກັບອັງກິດ ທີ່ລາວໃຊ້ມືເຮັດບານເປັນປະຕູພາທີມຂຶ້ນນຳກ່ອນ 1-0 ກ່ອນຈະມາຍິງອີກພາ ອາເຈີຕີນາ ເອົາຊະນະ 2-1 ແລະເປັນທີ່ມາຂອງເຫດການ ‘‘ ຫັດພະເຈົ້າ ’’ ທີ່ເປັນຕຳນານຂອງວົງການບານເຕະຈົນເຖິງປັດຈຸບັນ ກ່ອນທີ່ ມາຣາໂດນາ ຈະເສຍຊີວິດລົງໃນປີ 2020.
ໂດຍ ສະຕີບ ຮອດ ອະດີດກອງກາງທີມຊາດອັງກິດເຈົ້າຂອງເສື້ອ ມາຣາໂດນາ ໄດ້ນຳເສື້ອບເບີ 10 ຕົວນີ້ອອກມາປະມູນຜ່ານ ‘‘ ຊັດເທບີ ’’ ບໍລິສັດການປະມູນຊື່ດັງ ເຊິ່ງຫລ້າສຸດໄດ້ມີການປິດການປະມູນໄປເປັນທີ່ຮຽບຮ້ອຍແລ້ວ ດ້ວຍມູນຄ່າເຖິງ 7,14 ລ້ານປອນ ເມື່ອວັນທີ 4 ພຶດສະພາ.
ຈາກຍອດປະມູນທີ່ເກີດຂຶ້ນ ເຮັດໃຫ້ເສື້ອຂອງ ມາຣາໂດນາ ສ້າງສະຖິຕິໃຫມ່ດ້ວຍການເປັນເຈົ້າຂອງທີ່ລະນຶກກ່ຽວກັບກິລາ ເຊິ່ງມີມູນຄ່າສູງສຸດແທນທີ່ລາຍເຊັນຕົ້ນສະບັບຂອງຖະແຫລງການໂອລິມປິກໃນປີ 1892 ທີ່ຖືກຂາຍໄປໃນລາຄາ 7 ລ້ານປອນ ເມື່ອປີ 20199.
