ຕົ້ນປີ 2022 ເຊກອງ ມ້າງຄະດີຢາເສບຕິດ ໄດ້ 36 ເລື່ອງ
ທ່ານ ຂັນຕີ ສີລະວົງສາ ຮອງເຈົ້າແຂວງໆເຊກອງ ລາຍງານວ່າ: 4 ເດືອນຕົ້ນປີ 2022 ໄດ້ເອົາໃຈໃສ່ຊີ້ນຳວຽກງານປ້ອງກັນຊາດ-ປ້ອງກັນຄວາມສະຫງົບຢ່າງເປັນລະບົບຕໍ່ເນື່ອງເຮັດໃຫ້ກຳລັງປະກອບອາວຸດຂອງທ້ອງຖິ່ນເຄື່ອນໄຫວປະຕິບັດໜ້າທີ່ດ້ວຍຄວາມເປັນເຈົ້າການສູງ ແລະ ເປັນກຳລັງສຳຄັນເຮັດໃຫ້ປະ ຊາຊົນບັນດາເຜົ່າດຳລົງຊີວິດ ແລະ ທຳມະຫາກິນດ້ວຍຄວາມສະຫງົບດີ.
ຮອງເຈົ້າແຂວງໆເຊກອງ ລາຍງານຕື່ມວ່າ: ພາຍຫລັງອົງການປົກຄອງແຂວງ ໄດ້ຕົກລົງມອບໃຫ້ທຸກຂະ ແໜງການຂັ້ນແຂວງ, ຂັ້ນເມືອງ ແລະ ທົ່ວສັງຄົມ ຮັບຜິດຊອບຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ກໍສາມາດເລີກຮື້ ແລະ ມ້າງລາຍຄະດີຢາເສບຕິດໄດ້ 36 ເລື່ອງ, ຈັບຜູ້ຖືກຕ້ອງຫາໄດ້ 36 ຄົນ ແລະ ຢຶດຢາເສບຕິດໄດ້ 33.250 ເມັດ.
ຂະນະດຽວກັນກໍພວມສຸມໃສ່ປັບປຸງສ້ອມແປງສຳນັກງານເກົ່າຂອງເຂື່ອນໄຟຟ້າຫ້ວຍລຳພັນໃຫຍ່ ສ້າງເປັນສູນບຳບັດ-ດັດສ້າງຜູ້ຕິດຢາເສບຕິດ ແລະ ສະເໜີຂໍໃຫ້ກະຊວງປ້ອງກັນຄວາມສະຫງົບສົມທົບທຶນສ້າງສູນດັ່ງກ່າວ.
