ຣັດເຊຍ ຍັງຖືກຢູຟ່າລົງໂທດຫນັກ! ຖືກປັບລົງໄປຫລິ້ນລີກ C ພ້ອມຫ້າມສະເຫນີໂຕເປັນເຈົ້າພາບຢູໂຣ 2028, 2032
ຜົນກະທົບຈາກຜົນພວງທີ່ຣັດເຊຍບຸກໂຈມຕີຢູເຄຣນ ກ່ອນຫນ້ານີ້ ສົ່ງຜົນໃຫ້ພວກເຂົາຖືກຕັດສິນຈາກການແຂ່ງຂັນບານເຕະທັງໝົດທີ່ບໍລິຫານໂດຍ UEFA ແລະ ສະຫະພັນບານເຕະນາໆຊາດ (FIFA), ເຮັດໃຫ້ພວກເຂົາຖືກປັບເສຍໃຫ້ກັບ ໂປແລນ. ບໍ່ມີສິດໄປຫຼິ້ນບານໂລກ 2022 ຮອບສຸດທ້າຍທີ່ປະເທດກາຕ້າ ເຖິງວ່າຈະມີການຍື່ນອຸທອນຕໍ່ສານກິລາໂລກ ແຕ່ກໍ່ບໍ່ເປັນຜົນ
ສະຖານະການປະຈຸບັນຍັງບໍ່ມີທ່າທີຈະດີຂຶ້ນ ເພາະວ່າຣັດເຊຍຍັງບໍ່ຖອນທະຫານອອກ ເຮັດໃຫ້ UEFA ຈຳເປັນຕ້ອງຮັກສາມາດຕະການຄວ້ຳບາດຣັດເຊຍຕໍ່ໄປ. ໂດຍຜົນກະທົບທີ່ພວກເຂົາຈະໄດ້ຮັບຫຼັງຈາກນີ້ຄື ໃນ UEFA Nations League, ບ່ອນປະຈຸບັນທີ່ລັດເຊຍຢູ່ໃນລີກ B ຮ່ວມກັບ Iceland, Israel ແລະ Albania, ພວກເຂົາຈະຖອດອອກຈາກການແຂ່ງຂັນທັງຫມົດ. ເຮັດໃຫ້ພວກເຂົາຕົກລົງໄປຫຼິ້ນໃນ C ໃນທັນທີ
ນອກຈາກນີ້ ຣັດເຊຍ ຍັງຫມົດສິດໃນການສະເຫນີໂຕເປັນເຈົ້າພາບໃນການແຂ່ງຂັນ Euro 2028 ແລະ 2032 ທີ່ພວກເຂົາຕັ້ງໃຈຈະສະເຫນີໂຕເປັນເຈົ້າພາບອີກດ້ວຍ
ຂະນະດຽວກັນ ຣັດເຊຍ ກໍຈະຫມົດສິດໄປແຂ່ງຂັນບານໂລກຍິງ 2023 ໂດຍອັດຕະໂນມັດ ທີ່ປະເທດ ອົດສະຕຣາລີ ແລະ ນິວຊີແລນ ຫຼັງຈາກຖືກຕັດສິດຈາກການແຂ່ງຂັນເຕະບານຍິງ ຢູໂຣ ຮອບຄັດເລືອກເຊັ່ນດຽວກັນ
