ຮາແລນ-ປັອກບາ ລໍຖ້າຍ້າຍ ເປີດເຜີຍ 5 ທີມງານເຮັດຫນ້າທີ່ແທນ ໄຣໂອລາ ຫລັງເອເຢັນດັງລາໂລກ

ການຍ້າຍທີມຂອງດາວຍິງດອດມຸນ ແລະ ກອງກາງແມນຢູ ຫລ້າສຸດມີການເຜີຍຊື່ທີມງານທີ່ຈະເຮັດວຽກແທນເອເຢັນດັງທີ່ເສຍຊີວິດ.

ບິລ ສື່ຊັ້ນນຳຂອງເຢຍລະມັນ ລາຍງານວ່າ : ບັນດານັກເຕະທີ່ຢູ່ພາຍໃຕ້ການເບິ່ງແຍງຂອງ ມິໂນ ໄຣໂອລາ ແລະ ກຽມຍ້າຍທີມໃນລະດູການນີ້ ຈະຍັງມີຜູ້ຕິດຕໍ່ປະສານງານ ແລະ ຕໍ່ລອງຜົນປະໂຫຍດກັບສະໂມສອນທີ່ສົນໃຈຄວ້າຕົວໄປຮ່ວມທີມຕາມປົກກະຕິ ເຖິງວ່າເອເຢັນຄົນດັງຫາກໍເສຍຊີວິດຢ່າງກະທັນຫັນໃນໄວພຽງ 54 ປີ ເມືື່ອໄລຍະອາທິດທີ່ຜ່ານມາ ອັນເນື່ອງຈາກພະຍາດປະຈຳຕົວທີ່ເຮັດໃຫ້ລາວຕ້ອງເຂົ້າຮັບການຜ່າຕັດມາຕັ້ງແຕ່ເດືອນມັງກອນ.

ແຫລ່ງຂ່າວເປີດເຜີຍວ່າ ມີໂນ ໄຣໂອລາ ມີບໍລິສັດເອເຢັນ ເຊິງເປັນບໍລິສັດຈຳກັດທີ່ຢູ່ໃນໂມນາໂກ ແລະ ເປັນທຸລະກິດຄອບຄົວທີ່ໜຽວແຫນ້ນ ມີຄົນເບິ່ງແຍງນັກເຕະແບບໃກ້ຊິດຢ່າງຕໍ່ເນື່ອງ ໂດຍມີທີມງານທີ່ສຳຄັນ 5 ຄົນ ປະກອບດ້ວຍ ມາຣີໂອ ລູກຊາຍ, ວິນເຊນໂຊ ຫລານຊາຍ, ໂຮເຊ ຟໍເຕສ ໂຣດຣີເກສ ຄົນສະໜິດທີ່ໃກ້ຊິດກັບ ໄຣໂອລາ, ຣາຟາເອລ ປີມຽນຕາ ທະນາຄວາມ ແລະ ເອັນຣີກາ ທາຄີິ ເຈົ້ານທີ່ຝ່າຍຂ່າວ ເຊິ່ງທັງຫມົດຕ່າງເຮັດວຽກໃຫ້ກັບ ໄຣໂອລາ ມາໂດຍຕະຫລອດ.

ບິລ ຍັງລາຍງານອີກວ່າ ໄຣໂອລາ ໄດ້ໃຫ້ຄວາມສຳຄັນກັບທີມງານຂອງລາວທຸກຄົນ ເຊິ່ງມີລາວເປັນຫົວຫນ້າ ໂດຍຈະມີການຈ່າຍເງິນສ່ວນແບ່ງໃຫ້ຢ່າງທົ່ວເຖິງຈາກການເຈລະຈາຕ່າງໆ ທີ່ເປັນການຊື້-ຂາຍສຳຄັນ ທັງການຍ້າຍທີມ ແລະ ຕໍ່ສັນຍາ.

ທັງນີ້ ເອີຣິງ ຮາແລນ ແລະ ພອລ ປັອກບາ 2 ນັກເຕະໃນຄວາມເບິ່ງແຍງຂອງ ມີໂນ ໄຣໂອລາ ທີ່ມີຂ່າວວ່າຈະຍ້າຍທີມໃນໄລຍະລະດູການນີ້ ຈະຍັງມີ ຣາຟາເອລາ ປີມຽນຕາ ທະນາຍຄວາມປະຈຳທີມ ເຮັດຫນ້າທີ່ກວດສອບຂໍ້ກົດຫມາຍ ແລະ ດຳເນີນການຕາມຂໍ້ຕົກລົງຂອງເອເຢັນຜູ້ລ່ວງລັບ ເພື່ອຫາຂໍ້ສະຫລຸບເລື່ອງການຍ້າຍທີມແທນໄດ້.

ສຳລັບ ເອີຣິງ ຮາແລນ ມີຂ່າວລືຢ່າງຕໍ່ເນື່ອງວ່າກຽມຍ້າຍຈາກ ໂບຣຸສເຊຍ ດອດມຸນ ທີມດັງໃນບຸນເດສລີກາ ເຢຍລະມັນ ມາຢູ່ກັບ ແມນເຊສເຕີ ຊິຕີ ສະໂມສອນຊັ້ນນຳຂອງພຣີເມຍລີກ ອັງກິດ ພາຍໃຕ້ຄ່າຈີກສັນຍາ 63 ລ້ານປອນ ແຕ່ກໍມີ ຣຽວ ມາດຣິດ, ບາເຊໂລນາ ແລະ ປາຣີ ແຊັກ ແຊັກແມັງ ພ້ອມຮ່ວມວົງລ່າເຊ່ັນດຽວກັນ.