ອາເມລິກາ ຢືນຢັນພົບຜູ້ຕິດເຊື້ອ “ໄຂ້ຫວັດສັດປີກ H5” ຄົນທຳອິດ
ອາເມລິກາ ຢືນຢັນການກວດພົບຜູ້ຕິດເຊື້ອພະຍາດໄຂ້ຫວັດສັດປີກ H5 ທີ່ເປັນມະນຸດຄົນທຳອິດ ໃນລັດໂຄໂລຣາໂດທາງຕາເວັນຕົກຂອງປະເທດ.
ວັນທີ 30 ເມສາ 2022, ສຳນັກຂ່າວຊິນຮົວລາຍງານວ່າ: ສູນຄວບຄຸມ ແລະ ປ້ອງກັນພະຍາດຂອງອາເມລິກາ (CDC) ເປີດເຜີຍວ່າ: ພົບຜູ້ຕິດເຊື້ອໄວຣັສໄຂ້ຫວັດສັດປີກຊະນິດເອ (avian influenza A) ສາຍພັນ H5 ຄົນທຳອິດ ໂດຍຜູ້ຕິດເຊື້ອມີປະຫວັດກ່ຽວຂ້ອງກັບການຂ້າສັດປີກທີ່ຖືກສັນນິຖານວ່າຕິດເຊື້ອໄວຣັສໄຂ້ຫວັດສັດປີກ H5N1.
ຜູ້ຕິດເຊື້ອຄົນດັ່ງກ່າວມີອາການອ່ອນເພຍພຽງ 2-3 ວັນ ແລະ ປັດຈຸບັນດີຂຶ້ນແລ້ວ ໂດຍ CDC ລະບຸວ່າ: ຜູ້ຕິດເຊື້ອກຳລັງກັກຕົວ ແລະ ຮັບການປິ່ນປົວດ້ວຍຢາຕ້ານໄວຣັສໄຂ້ຫວັດໃຫຍ່ໂອເຊລທາມິເວຍ (Oseltamivir).
CDC ຊີ້ວ່າ: ເຖິງວ່າມີການກວດພົບຜູ້ຕິດເຊື້ອຄົນນີ້, ແຕ່ຄວາມສ່ຽງໃນມະນຸດຍັງຢູ່ໃນລະດັບຕໍ່າ ໂດຍ CDC ໄດ້ເຝົ້າຕິດຕາມການປ່ວຍໃນກຸ່ມປະຊາຊົນທີ່ສຳຜັດສັດປີກຕິດເຊື້ອໄວຣັສໄຂ້ຫວັດສັດປີກ H5N1 ນັບແຕ່ກວດພົບການລະບາດເຫລົ່ານີ້ໃນນົກປ່າ ແລະ ສັດປີກຂອງອາເມລິກາເມື່ອທ້າຍປີ 2021.
ປັດຈຸບັນມີການກວດພົບເຊື້ອໄວຣັສໄຂ້ຫວັດສັດປີກ H5N1 ໃນກຸ່ມສັດປີກທາງການຄ້າ ແລະ ນົກທີ່ລ້ຽງຢູ່ເຮືອນໃນ 29 ລັດ ແລະ ກຸ່ມນົກປ່າໃນ 34 ລັດ. ຂະນະດຽວກັນ CDC ຍັງໄດ້ແກະຮອຍສຸຂະພາບຂອງປະຊາຊົນທີ່ສຳຜັດສັດປີກຕິດເຊື້ອໄວຣັສໄຂ້ຫວັດສັດປີກ H5N1 ຫລາຍກວ່າ 2.500 ຄົນ.
ທັງນີ້, ຜູ້ຕິດເຊື້ອຄົນນີ້ເປັນມະນຸດຄົນທີ 2 ຈາກທົ່ວໂລກທີ່ກ່ຽວຂ້ອງກັບເຊື້ອໄວຣັສກຸ່ມ H5 ທີ່ກຳລັງແພ່ລະບາດໃນປັດຈຸບັນ ໂດຍຜູ້ຕິດເຊື້ອຄົນທຳອິດຖືກກວດພົບໃນອັງກິດເດືອນທັນວາ 2021.
ອ້າງອີງ:
https://www.xinhuathai.com/inter/279940_20220430
