ດ້ວຍກຽດສັກສີຂອງລູກກຳມະກອນ ຊົມເຊີຍວັນກຳມະກອນສາກົນ ວັນທີ 1 ພຶດສະພາ ຄົບຮອບ 136 ປີ
ໂດຍ: ທິດກໍ່າ
ການສະຫລອງລະນຶກວັນກຳມະກອນສາກົນຄົບຮອບ 136 ປີ (1/5/1886-1/5/2022) ປີນີ້ ສຸດທີ່ມີຄວາມສຳຄັນ ແລະ ມີຄວາມໝາຍອັນຍິ່ງໃຫຍ່ສຳລັບກຳມະກອນລາວ ແລະ ຊາວຜູ້ອອກແຮງງານລາວ ກໍຄືປະຊາຊົນລາວທົ່ວປະເທດ ຍ້ອນວ່າປະເທດຊາດຂອງພວກເຮົາພວມຢູ່ໃນໄລຍະສ້າງສາພັດທະນາປະເທດຊາດ ພາຍໃຕ້ການນຳພາຂອງພັກ ແລະ ລັດຖະບານຕາມແນວທາງປ່ຽນແປງໃໝ່ແຫ່ງຄວາມມຸ້ງມາດປາດຖະໜາຂອງປວງຊົນລາວທັງຊາດ. ໃນໜຶ່ງປີຜ່ານມາ, ເຖິງວ່າໄດ້ຮັບຜົນກະທົບຈາກວິກິດໂຄວິດ-19 ແລະ ອື່ນໆຈາກພາຍໃນ ແລະ ພາຍນອກ, ແຕ່ການສ້າງສາພັດທະນາປະເທດຊາດຂອງກຳມະກອນລາວ ແລະ ປະຊາຊົນລາວກໍຍັງເດີນໜ້າກ້າວໄປ ແລະ ມີຜົນສຳເລັດຫລາຍດ້ານ. ໃນປີ 2021 ຜ່ານມາ, ພວກເຮົາສາມາດສົ່ງຜະລິດຕະພັນທີ່ເປັນສິນຄ້າເພື່ອສົ່ງອອກໄປຍັງຕ່າງປະເທດໄດ້ເຖິງ 90 ປະເທດ ບັນລຸລາຍຮັບໃນການສົ່ງອອກ 7.600 ລ້ານໂດລາສະຫະລັດ. ນອກຈາກນັ້ນ ໂຄງການສ້າງສາພັດທະນາພື້ນຖານໂຄງລ່າງອື່ນໆເຊັ່ນ: ສ້າງຖະໜົນຫົນທາງ, ສ້າງຕຶກອາຄານ, ສຳນັກງານອົງການ, ໂຮງຈັກໂຮງງານ, ພື້ນຖານວັດຖຸເຕັກນິກອື່ນໆ ກໍພວມດຳເນີນໄປດ້ວຍຄວາມເຄັ່ງຮ້ອນ ແລະ ປົກກະຕິ.
ພິເສດໃນປີ 2021 ຜ່ານມາ, ໄດ້ສຳເລັດໂຄງການສ້າງທາງລົດໄຟຄວາມໄວສູງ ລາວ-ຈີນ, ສຳເລັດການກໍ່ສ້າງໂຄງການທ່າເຮືອບົກທ່ານາແລ້ງ. ສ່ວນໂຄງການພັດທະນາເຂດເສດຖະກິດພິເສດ, ເຂດເສດຖະກິດສະເພາະ ແລະ ກິດຈະການໂຄງການອື່ນໆ ກໍພວມດຳເນີນໄປຢ່າງມີຄວາມຫວັງ. ນີ້ຄືຜົນງານຊິ້ນໃຫຍ່ໆທີ່ກຳມະກອນລາວ ແລະ ປະຊາຊົນລາວຍາດມາໄດ້ໃນໜຶ່ງປີຜ່ານມາ.
ນອກຈາກຜົນສຳເລັດທີ່ກ່າວມານີ້ແລ້ວ, ເພື່ອເຮັດໃຫ້ວັນທີ 1 ພຶດສະພາປີນີ້ມີຄວາມໝາຍ, ທາງລັດຖະບານ ກໍຄືສູນກາງສະຫະພັນກຳມະກອນບາວ ແລະ ກຳມະບານຂັ້ນແຂວງ ກໍໄດ້ອອກແຈ້ງການເພື່ອໃຫ້ແຕ່ລະຮາກຖານທີ່ຂຶ້ນກັບຕົນ ພ້ອມກັນສ້າງຂະບວນການ ແລະ ກິດຈະກຳຕ່າງໆທີ່ຈຳເປັນເໝາະສົມ ເພື່ອເປັນການສະເຫລີມສະຫລອງ ແລະ ສ້າງຄຳນັບຮັບຕ້ອນຕໍ່ວັນດັ່ງກ່າວໃຫ້ມີຄວາມໝາຍທາງດ້ານປະຫວັດສາດ.
ຈາກຜົນໄດ້ຮັບຂອງແຈ້ງການດັ່ງກ່າວ ກໍມີຫລາຍກົມກອງທ້ອງຖິ່ນໄດ້ຈັດກິດຈະກຳ ແລະ ສ້າງຂະບວນການຂອງຕົນຂຶ້ນຢ່າງເປັນຂະບວນຟົດຟື້ນສົມຄວນເຊັ່ນ: ໃນວັນທີ 22 ເມສາ 2022, ພະນັກງານ-ລັດຖະກອນສະພາປະຊາຊົນແຂວງບໍ່ແກ້ວ ກໍໄດ້ເຂົ້າຮ່ວມຂະບວນການອອກແຮງງານອະນາໄມລວມຢູ່ສວນສາທາລະນະອານຸສາວະລີສະໂມສອນຂອງແຂວງ, ໃນວັນທີ 23 ເມສາ 2022 ໂຮງຮຽນ ມສ ວຽງຈັນ ກໍໄດ້ຮ່ວມກິດຈະກຳອອກແຮງງານອະນາໄມເສັ້ນທາງຕັດໃໝ່ໜອງບຶກ-ໜອງພະຍາ, ສະຫະພັນກຳມະບານແຂວງຄຳມ່ວນກໍໄດ້ລົງເຄື່ອນໄຫວສຳພາດເກັບກຳຜົນງານ ແລະ ນຳພາສ້າງຂະບວນການອະນາໄມລວມຕ້ອນຮັບວັນກຳມະກອນສາກົນ ຄົບຮອບ 136 ປີ ຕາມສຳນັກງານ-ພະແນກການຂອງຕົນ.
ນອກຈາກທີ່ກ່າວມາເປັນຕົວຢ່າງນີ້ແລ້ວ ຍັງມີຫລາຍຮາກຖານກຳມະບານໃນທົ່ວປະເທດ ບໍ່ວ່າໃນຂົງເຂດລັດບໍລິຫານ ແລະ ທຸລະກິດ ກໍໄດ້ມີແຜນເຄື່ອນໄຫວສ້າງຂະບວນການຕ່າງໆໃນຫລາຍຮູບແບບ ເພື່ອສ້າງຂະບວນການຄັ້ງນີ້ຢ່າງມີຄວາມໝາຍ ແລະ ເປັນຂະບວນຢ່າງກວ້າງຂວາງ. ຂໍຊົມເຊີຍວັນກຳມະກອນສາກົນ ທີ 1 ພຶດສະພາ ຄົບຮອບ 136 ປີ ຢ່າງສຸດໃຈ !
