ອິນເດຍຮ້ອນອົບເອົ້າ ກະທົບປະຊາຊົນຫລາຍລ້ານຄົນ

ປະຊາຊົນອິນເດຍຫລາຍລ້ານຄົນຜະເຊີນຄື້ນຄວາມຮ້ອນຄັ້ງຮຸນແຮງເປັນປະຫວັດສາດ ໂດຍກົມອຸຕຸນິຍົມວິທະຍາອິນເດຍພະຍາກອນວ່າ: ອຸນຫະພູມຈະຄ່ອຍໆສູງຂຶ້ນສູງສຸດ 3-4 ອົງສາໃນພື້ນທີ່ທາງພາກກາງ ແລະ ຕາເວັນຕົກສຽງເໜືອໃນອາທິດນີ້.

ເຖິງວ່າອິນເດຍຜະເຊີນຄື້ນຄວາມຮ້ອນເປັນປົກກະຕິ ໂດຍສະເພາະໃນໄລຍະເດືອນພຶດສະພາ ແລະ ມິຖຸນາ, ແຕ່ປີນີ້ລະດູຮ້ອນເລີ່ມໄວຂຶ້ນນັບແຕ່ເດືອນມີນາ ດ້ວຍອຸນຫະພູມສູງສຸດສະເລ່ຍໃນເດືອນດັ່ງກ່າວສູງທີ່ສຸດໃນຮອບ 122 ປີ.

ດ້ານສູນວິທະຍາສາດ ແລະ ສິ່ງແວດລ້ອມຂອງອິນເດຍລະບຸວ່າ: ຄື້ນຄວາມຮ້ອນທີ່ເກີດຂຶ້ນນັບແຕ່ຕົ້ນປີສົ່ງຜົນກະທົບຕໍ່ລັດຕ່າງໆລວມ 15 ລັດຂອງອິນເດຍ ເຊິ່ງລວມທັງລັດຫິມາຈັລປະເທດ ທີ່ປົກກະຕິເຢັນສະບາຍ.

ນາເຣຊ ຄູມາຣ໌ ນັກວິທະຍາສາດອາວຸໂສແຫ່ງ IMD ລະບຸວ່າ: ໃນອາທິດນີ້ຄາດວ່າອຸນຫະພູມໃນນະຄອນຫລວງເດລີ ເມືອງຫລວງຂອງອິນເດຍ ຈະສູງເຖິງ 44 ອົງສາ.

ຄື້ນຄວາມຮ້ອນຮອບນີ້ສົ່ງຜົນກະທົບຕໍ່ວິຖີຊີວິດຂອງປະຊາຊົນ ໂດຍກະສິກອນຈຳນວນໜຶ່ງລະບຸວ່າ: ຄື້ນຄວາມຮ້ອນສົ່ງຜົນຕໍ່ການເກັບກ່ຽວເຂົ້າສາລີຂອງອິນເດຍ ເຊິ່ງອາດກະທົບຕໍ່ຜູ້ສະໜັບສະໜູນທົ່ວໂລກ ຫລັງແຫລ່ງສົ່ງອອກເຂົ້າສາລີລາຍໃຫຍ່ຄືຢູເຄຣນຢຸດສະງັກຈາກວິກິດສົງຄາມຣັດເຊຍຮຸກຮານຢູເຄຣນ.

ນອກຈາກນີ້, ຄື້ນຄວາມຮ້ອນຍັງສົ່ງຜົນເຮັດໃຫ້ຄວາມຕ້ອງການໃຊ້ໄຟຟ້າເພີ່ມສູງຂຶ້ນ ເຊິ່ງເຮັດໃຫ້ເກີດໄຟມອດໃນຫລາຍລັດ ແລະ ເກີດຄວາມກັງວົນວ່າຈະຂາດເຂີນຖ່ານຫີນໃນໄລຍະອັນໃກ້.

ຂະນະທີ່ທ່ານ ນາເຣນທຣາ ໂມດີ ນາຍົກລັດຖະມົນຕີອິນເດຍ ໄດ້ເຕືອນເຖິງຄວາມສ່ຽງຈະເກີດໄຟໄໝ້ ເນື່ອງຈາກອຸນຫະພູມທີ່ສູງຂຶ້ນ ໂດຍສະເພາະໃນພາກເໜືອ ແລະ ພາກກາງຂອງປະເທດ.

ໂຣຊີ ແມກທຣິວ ໂຄລ ນັກວິທະຍາສາດດ້ານສະພາບອາກາດແຫ່ງສະຖາບັນອຸຕຸນິຍົມວິທະຍາເຂດຮ້ອນແຫ່ງອິນເດຍ ລະບຸວ່າ: ປັດໄຈດ້ານບັນຍາກາດເຮັດໃຫ້ເກີດຄື້ນຄວາມຮ້ອນໃນປັດຈຸບັນ, ແຕ່ສະພາບໂລກຮ້ອນກໍມີສ່ວນເຮັດໃຫ້ວິກິດຮຸນແຮງຂຶ້ນ.

ອ້າງອີງ:

https://www.bbc.com/news/world-asia-india-61242341