ສປປ ເກົາຫລີ ສະຫລອງຄົບຮອບ 90 ປີຂອງກອງທັບ
ສປປ ເກົາຫລີ ຈັດງານສະຫລອງຄົບຮອບ 90 ປີຂອງກອງທັບ, ຍັງເດີນໜ້າເພີ່ມຄວາມແຂງແຮງໃຫ້ກອງກຳລັງນິວເຄຼຍ.
ວັນທີ 26 ເມສາ 2022, ສຳນັກຂ່າວຕ່າງປະເທດລາຍງານຄຳກ່າວສູນທອນພົດຂອງທ່ານ ກິມຈອງອຸນ ຜູ້ນຳສູງສຸດ ສປປ ເກົາຫລີ ເນື່ອງໃນໂອກາດຄົບຮອບ 90 ປີຂອງການສະຖາປະນາກອງທັບປະຕິວັດປະຊາຊົນເກົາຫລີ (Korean People’s Revolutionary Army – KPRA) ໂດຍມີການປະກາດວ່າ: ສປປ ເກົາຫລີ ຈະພັດທະນາຂີດຄວາມສາມາດດ້ານອາວຸດນິວເຄຼຍຢ່າງວ່ອງໄວທີ່ສຸດເທົ່າທີ່ຈະເປັນໄປໄດ້.
ກອງທັບປະຕິວັດປະຊາຊົນເກົາຫລີຂອງ ສປປ ເກົາຫລີ ເລີ່ມສ້າງຕັ້ງຂຶ້ນໂດຍທ່ານ ກິມອິນຊຸງ ໃນປີ 1932 ເພື່ອໃຊ້ຕໍ່ຕ້ານກອງກຳລັງຂອງຈັກກະພັດຍີ່ປຸ່ນທີ່ເຂົ້າມາຢຶດຄອງເກົາຫລີ.
ໃນງານດັ່ງກ່າວ ກອງທັບ ສປປ ເກົາຫລີ ໄດ້ຂົນອາວຸດຊະນິດຕ່າງໆ ມາແຫ່ຂະບວນເພື່ອສະແດງແສນຍານຸພາບ ໂດຍຈຸດສຳຄັນຢູ່ທີ່ລູກສອນໄຟຂ້າມທະວີບ Hwasong-17 ICBM ທີ່ ສປປ ເກົາຫລີ ອ້າງວ່າໄດ້ມີການທົດລອງໄປເມື່ອວັນທີ 24 ມີນາຜ່ານມາ ແລະ ຍັງມີການນຳເອົາລູກສອນໄຟສຳລັບໃຊ້ຍິງຈາກເຮືອດຳນ້ຳ ລວມທັງລູກສອນໄຟໄຮເປີໂຊນິກມາຮ່ວມຂະບວນນຳອີກ.
ເຫດການສຳຄັນຕໍ່ມາຄືການຂຶ້ນກ່າວສູນທອນພົດຂອງທ່ານ ກິມຈອງອຸນ ເຊິ່ງໃນປີນີ້ເນັ້ນໃສ່ການອ້າງເຖິງປະສິດທິພາບດ້ານອາວຸດນິວເຄຼຍ ເຊິ່ງໃນສາຍຕານາໆຊາດຖືເປັນສິ່ງຕ້ອງຫ້າມ ເນື່ອງຈາກມີພະລັງທຳລາຍລ້າງສູງ ແລະ ຍັງສົ່ງຜົນກະທົບເປັນວົງກວ້າງ ແລະ ຍາວນານ.
ຜູ້ນຳ ສປປ ເກົາຫລີ ຢືນຢັນວ່າ: ຫລັກການສຳຄັນຂອງກອງກຳລັງນິວເຄຼຍຄືການປ້ອງກັນບໍ່ໃຫ້ເກີດສົງຄາມຂຶ້ນ, ແຕ່ຖ້າມີກອງກຳລັງຝ່າຍໃດພະຍາຍາມຈະລະເມີດຜົນປະໂຫຍດຫລັກຂອງ ສປປ ເກົາຫລີ ກໍພ້ອມຈະໃຊ້ອາວຸດນິວເຄຼຍເພື່ອຕອບໂຕ້ເຊັ່ນກັນ ໂດຍອາວຸດນິວເຄຼຍຂອງ ສປປ ເກົາຫລີ ຈະຕ້ອງຢູ່ໃນສະຖານະກຽມພ້ອມຈະນຳໃຊ້ໄດ້ຕະຫລອດເວລາ.
ອ້າງອີງ:
https://en.yna.co.kr/view/AEN20220426005352325?section=nk/nk
https://www.bbc.com/news/world-australia-61225675
https://www.independent.co.uk/…/north-korea-nuclear-kim…
