ນາຍົກສິງກະໂປຊຸກດັນພັດທະນາປະເທດ 3 ດ້ານເພື່ອຜົນປະໂຫຍດໄລຍະຍາວ
ນາຍົກລັດຖະມົນຕີ ລີ ຊຽນລຸງ ຂອງສິງກະໂປ ລະບຸໃນສານເນື່ອງໃນວັນຊາດ 9 ສິງຫາວ່າ: ການພັດທະນາການສຶກສາລະດັບປະຖົມ, ການປ້ອງກັນພະຍາດເບົາຫວານ ແລະ ການພາປະເທດເຂົ້າສູ່ການເປັນປະເທດອັດສະລິຍະ ຈະສົ່ງຜົນດີຕໍ່ສິງກະໂປໃນໄລຍະຍາວ.
ນາຍົກລັດຖະມົນຕີ ລີ ຊຽນລຸງ ກ່າວວ່າ: ສິງກະໂປຕ້ອງຊ່ວຍບັນດາເຍົາວະຊົນຄົນຮຸ່ນໃໝ່ກຽມຄວາມພ້ອມສຳລັບໂລກໜ່ວຍໃໝ່, ເດັກທຸກຄົນຈະຕ້ອງມີຊີວິດເລີ່ມຕົ້ນທີ່ດີ ແລະ ມີອະນາຄົດທີ່ສົດໃສ. ຂະນະທີ່ລັດຖະບານມີໜ້າທີ່ດຳເນີນການພັດທະນາການສຶກສາລະດັບປະຖົມ ໂດຍການເພີ່ມຈຳນວນສະຖານທີ່ສຶກສາ ລວມທັງພັດທະນາຄຸນນະພາບໂຮງຮຽນ ແລະ ຄູສອນ.
ຜູ້ນຳສິງກະໂປ ກ່າວອີກວ່າ: ທ່ານຕ້ອງການໃຫ້ປະຊາຊົນມີອາຍຸຍືນຍາວ ແລະ ສຸຂະພາບແຂງແຮງ, ແຕ່ຜູ້ອາຍຸສູງຢູ່ສິງກະໂປມັກມີບັນຫາດ້ານສຸຂະພາບໂດຍສະເລ່ຍ 8 ປີໃນໄລຍະບັ້ນປາຍຂອງຊີວິດ ໂດຍສ່ວນຫລາຍປ່ວຍເປັນພະຍາດເບົາຫວານ. ດັ່ງນັ້ນ ຊາວສິງກະໂປທຸກຄົນຄວນເບິ່ງແຍງເລື່ອງການໃຊ້ຊີວິດ ແລະ ອາຫານ, ອອກກຳລັງກາຍເປັນປະຈຳ ແລະ ດື່ມນ້ຳຫລາຍໆ.
ສ່ວນການເດີນໜ້າສູ່ການເປັນປະເທດອັດສະລິຍະ, ນາຍົກລັດຖະມົນຕີ ລີ ຊຽນລຸງ ກ່າວວ່າ: ສິງກະໂປຈຳເປັນຕ້ອງສຶກສາ, ໄລ່ຕາມ ແລະ ແຊງໜ້າປະເທດອື່ນ ທີ່ກຳລັງພັດທະນາລະບົບໃຊ້ຈ່າຍເອເລັກໂຕຣນິກ ເພື່ອກ້າວສູ່ການເປັນສັງຄົມໄຮ້ເງິນສົດ ລວມທັງກຳລັງສ້າງເຄືອຂ່າຍເຊັນເຊີ ເພື່ອພັດທະນາຄວາມປອດໄພສາທາລະນະ ແລະ ວິເຄາະຂໍ້ມູນຂະໜາດໃຫຍ່ ເພື່ອພັດທະນາບໍລິການສາທາລະນະ.
