ກຽມສະຫລຸບວຽກກໍ່ສ້າງຮາກຖານການເມືືອງພັດທະນາຊົນນະບົດ, ແຂ່ງຂັນ-ຍ້ອງຍໍຮັກຊາດ ແລະ ພັດທະນາ

ກອງປະຊຸມປຶກສາຫາລື ກຽມຄວາມພ້ອມຈັດກອງປະຊຸມສະຫລຸບຕີລາຄາວຽກງານກໍ່ສ້າງຮາກຖານການເມືືອງ, ພັດທະນາຊົນນະບົດ, ການແຂງຂັນ-ຍ້ອງຍໍຮັກຊາດ ແລະ ພັດທະນາໃນໄລຍະຜ່ານມາ ແລະ ທິດທາງຕໍ່ໜ້າ ໄດ້ຈັດຂຶ້ນໃນວັນທີ 25 ເມສາ 2022 ພາຍໃຕ້ການເປັນປະທານຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະ ທານປະເທດແຫ່ງ ສປປ ລາວ, ຫົວໜ້າຄະນະຮັບຜິດຊອບກະກຽມສະຫລຸບວຽກດັ່ງກ່າວໂດຍມີຄະນະຮັບ ຜິດຊອບ ແລະ ພາກສ່ວນຊ່ວຍວຽກເຂົ້າຮ່ວມ.

ສະຫາຍ ບຸນທອງ ຈິດມະນີ ໄດ້ໃຫ້ທິດຊີ້ນຳການກະກຽມກອງປະຊຸມສະຫລຸບຕີລາຄາວຽກກໍ່ສ້າງຮາກຖານການເມືອງ, ພັດທະນາຊົນນະບົດ, ການແຂງຂັນຍ້ອງຍໍ-ຮັກຊາດ ແລະ ພັດທະນາໃນໄລຍະຜ່ານມາ ແລະ ທິດທາງຕໍ່ໜ້າວ່າ: ໃຫ້ຄະນະຮັບຜິດຊອບແຕ່ລະພາກສ່ວນແຕ່ງຕັ້ງກອງເລຂາຊ່ວຍວຽກຂອງຕົນໃນການກະກຽມ ແລະ ດໍາເນີນກອງປະຊຸມໃຫ້ມີເນື້ອໃນຄົບຖ້ວນ, ເລິກເຊິ່ງ ແລະ ມີປະສິດທິຜົນ, ສ່ອງແສງໄດ້ສະພາບຄວາມເປັນຈິງຢູ່ແຕ່ລະບ່ອນ ພ້ອມທັງສ້າງແຜນເຄື່ອນໄຫວ, ກໍານົດລະບອບຕິດຕາມ, ກວດ ກາ, ຊຸກຍູ້, ສະຫລຸບລາຍງານ ແລະ ອື່ນໆ ແຕ່ນີ້ຮອດກອງປະຊຸມ; ກວດກາຄືນການຈັດຕັ້ງຜັນຂະຫຍາຍບັນດາມະຕິ, ຄໍາສັ່ງຂອງພັກ-ລັດ ໃນວຽກກໍ່ສ້າງຮາກຖານການເມືອງ, ພັດທະນາຊົນນະບົດ, ວຽກງານ 3 ສ້າງ ແລະ ການປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ໂດຍມອບໃຫ້ຫ້ອງວ່າການສູນກາງພັກຮີບ ຮ້ອນອອກຮ່າງຄຳສັ່ງແນະນຳຂອງຄະນະເລຂາທິການສູນກາງພັກເພື່ອເປັນບ່ອນອີງ ແລະ ສ້າງຄວາມເປັນເອກະພາບໃນການຈັດຕັ້ງປະຕິບັດໃຫ້ແກ່ບັນດາອົງຄະນະພັກຢູ່ສູນກາງ ແລະ ທ້ອງຖິ່ນໄດ້ກະກຽມຄວາມ ພ້ອມເປັນຕົ້ນເອກະສານສະຫລຸບຕີລາຄາ ແລະ ບົດປະກອບຄຳເຫັນຕ່າງໆທີ່ຈະນຳມາຜ່ານໃນກອງປະຊຸມ ໂດຍສະເພາະການສະຫລຸບມະຕິ 056/ຄບສພ ໂດຍການປະສານສົມທົບກັບກະຊວງກະສິກຳ-ປ່າໄມ້, ກະ ຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ພ້ອມທັງເປັນເຈົ້າການສ້າງແຜນການເຄື່ອນ ໄຫວ ລົງຕິດຕາມເກັບກຳຂໍ້ມູນ ແລະ ທາບທາມເນື້ອໃນຢູ່ທ້ອງຖິ່ນ, ຫ້ອງວ່າການສຳນັກງານນາຍົກລັດ ຖະມົນຕີ ແລະ ກະຊວງພາຍໃນ ສຸມໃສ່ກະກຽມເນື້ອໃນສະຫລຸບຂະບວນການແຂ່ງຂັນຮັກຊາດ-ພັດທະນາ ໃນຂອບເຂດທົ່ວປະເທດປີ 2016-2020 ແລະ ທິດທາງແຜນການປີ 2021-2025, ກະຊວງພາຍໃນສະ ຫລຸບຕີລາຄາການຈັດຕັ້ງຜັນຂະຫຍາຍມະຕິເລກທີ 076/ກມສພ ໂດຍລົງເລິກການປັບປຸງລະບົບການຄຸ້ມຄອງບໍລິຫານຂັ້ນບ້ານ, ກະຊວງກະສິກຳ-ປ່າໄມ້ ໃຫ້ສະຫລຸບຕີລາຄາການຈັດຕັ້ງຜັນຂະຫຍາຍຄໍາສັ່ງເລກທີ 097/ກມສພ ໂດຍເນັ້ນໃສ່ການພັດທະນາຊົນນະບົດ ລົງເລິກການສ້າງບ້ານພັດທະນາ ແລະ ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບໃຫ້ກຽມບົດປະກອບຄວາມເຫັນການຕີລາຄາການຈັດຕັ້ງປະຕິບັດວຽກກໍ່ສ້າງຮາກຖານການເມືອງພ້ອມທັງຮັບປະກັນວຽກງານປ້ອງກັນຄວາມສະຫງົບ, ຄວາມປອດໄພໃຫ້ແກ່ການດຳເນີນກອງປະຊຸມ, ສະຖານທີ່ພັກເຊົາຂອງຜູ້ແທນ ແລະ ອື່ນໆ. ພ້ອມນີ້, ຄະນະຮັບຜິດ ຊອບຊີ້ນຳໃຫ້ເຊີດຊູຄວາມຮັບຜິດຊອບ, ສຸມສະຕິປັນຍານໍາພາ-ຊີ້ນໍາໃຫ້ເປັນເອກະພາບກັນ, ເຮັດແນວໃດ ໃຫ້ບັນລຸຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ໂດຍສະເພາະເຮັດໃຫ້ກອງປະຊຸມທີ່ຈະຈັດຂຶ້ນຕໍ່ໜ້ານີສາມາດສະຫລຸບຕີລາຄາສະພາບຜ່ານມາ ແລະ ຄົ້ນຄິດຫາທາງອອກຊ່ວຍກັນຕໍ່ບັນຫາທີ່ຄົງຄ້າງ, ເຫັນແຈ້ງຕື່ມທາງອອກຫລາຍບັນຫາ ແລະ ວິທີການເຮັດຕົວຈິງເພື່ອແກ້ໄຂສິ່ງຍັງບໍ່ໄປບໍ່ມາ, ຫາທາງອອກແກ້ໄຂບັນຫາຊ່ວຍຮາກຖານ ກໍຄືການພັດທະນາໃຫ້ໄປຕາມທິດທາງທີ່ພັກເຮົາໄວ້.
ກອງປະຊຸມໄດ້ຮັບຟັງການລາຍງານ ຮ່າງຄໍາສັ່ງແນະນໍາຂອງຄະນະເລຂາທິການສູນກາງພັກກ່ຽວກັບການ ກະກຽມດຳເນີນກອງປະຊຸມດັ່ງກ່າວ; ຮ່າງມະຕິຕົກລົງ ວ່າດ້ວຍການແບ່ງຄວາມຮັບຜິດຊອບພາຍໃນຄະນະຊີ້ນຳການກະກຽມ; ຮ່າງແຜນດໍາເນີນງານກະກຽມກອງປະຊຸມສະຫລຸບຕີລາຄາວຽກກໍ່ສ້າງຮາກຖານການ ເມືອງ, ພັດທະນາຊົນນະບົດ, ການແຂ່ງຂັນຍ້ອງຍໍ-ຮັກຊາດ ແລະ ພັດທະນາໄລຍະ 5 ປີຜ່ານມາ ແລະ ທິດທາງໃນຕໍ່ໜ້າ ແລະ ວຽກງານປິ່ນອ້ອມອື່ນໆ.