ເຟດ ກຽມປັບຂຶ້ນອັດຕາດອກເບ້ຍ 0,5% ໃນເດືອນພຶດສະພາ

ວັນທີ 22 ເມສາທີ່ຜ່ານມາ, ຂ່າວຕ່າງປະເທດລາຍງານວ່າ: ທ່ານ ເຈີໂຣມ ພາວເວວ ປະທານທະນາຄານກາງອາເມຣິກາ (ເຟດ) ໄດ້ກ່າວໃນກອງປະຊຸມປຶກສາຫາລືທາງດ້ານເສດຖະກິດໂລກວ່າ ເຟດຈະປັບຂຶ້ນອັດຕາດອກເບ້ຍ 0,5% ໃນເດືອນ ພຶດສະພາ 2022.

ທ່ານ ພາວເວວ ກ່າວວ່າ ການທີ່ອັດຕາເງິນເຟີ້ຂອງອາເມຣິກາທີ່ເພີ່ມສູງຂຶ້ນກວ່າເປົ້າໝາຍ 2% ຂອງເຟດແລ້ວປະມານ 3 ເທົ່າເຮັດໃຫ້ເຟດເຫັນວ່າ ເປັນເລື່ອງທີ່ເໝາະສົມທີ່ຈະຮີບເລັ່ງປັບຂຶ້ນອັດຕາດອກເບ້ຍ ໂດຍມີຄວາມເປັນໄປໄດ້ວ່າຈະມີການປັບຂຶ້ນອັດຕາດອກເບ້ຍ 0,5% ໃນກອງປະຊຸມເດືອນ ພືດສະພາ 2022. ທ່ານ ພາວເວວ ຍັງໄດ້ກ່າວວ່າ: ພວກເຂົາຮັບຮູ້ໄດ້ວ່າຂະນະນີ້ນັກລົງທຶນໃນຕະຫລາດການເງິນຕ່າງເຫັນວ່າເປັນເລື່ອງທີ່ເໝາະສົມທີ່ເຟດຈະປັບຂຶ້ນອັດຕາດອກເບ້ຍ 0,5% ເພື່ອຮັບມືກັບໂຕເລກເງິນເຟີ້ທີ່ເພີ່ມສູງຂຶ້ນ. ຂະນະດຽວກັນ, ທ່ານ ພາວເວວ ກໍຍັງຄິດເຖິງວ່າ ເຟດຢູ່ໃນລະຫວ່າງເສັ້ນແບ່ງທີ່ມີຄວາມອ່ອນໄຫວລະຫວ່າງການຄວບຄຸມເງິນເຟີ້ ແລະ ຜົນກະທົບທີ່ຈະເຮັດໃຫ້ເສດຖະກິດຫົດຕົວລົງ.

ທ່ານ ພາວເວວ ກ່າວຕື່ມວ່າ ເປົ້າໝາຍຂອງພວກເຮົາຄືການໃຊ້ເຄື່ອງມືເພື່ອເຮັດໃຫ້ຄວາມຕ້ອງການ ແລະ ການສະໜອງກັບຄືນສູ່ພາວະທີ່ສົມດູນອີກຄັ້ງ ແລະ ພວກເຮົາຈະດຳເນີນການແບບນັ້ນ ໂດຍບໍ່ໄດ້ເຮັດໃຫ້ເສດຖະກິດຫົດຕົວລົງຈົນນຳໄປສູ່ພາວະທີ່ຖົດຖອຍ ຊຶ່ງນີ້ຖືວ່າເປັນຄວາມທ້າທາຍຢ່າງໜັກ.

ທັງນີ້, ທ່ານ ພາວເວວ ຊີ້ໃຫ້ເຫັນວ່າ ການຖ່ວງດຶງດັດຊະນີລາຄາຜູ້ບໍລິໂພກໃຫ້ຫົດຕົວລົງຢ່າງວ່ອງໄວນັ້ນຖືວ່າເປັນສິ່ງທີ່ຈຳເປັນ ເນື່ອງຈາກເສດຖະກິດຈະບໍ່ສາມາດຂະຫຍາຍຕົວໄດ້ດີຖ້າຫາກລາຄາຜູ້ບໍລິໂພກບໍ່ມີສະຖຽນລະພາບ. ນອກຈາກນີ້, ທ່ານ ພາວເວວ ຍັງໄດ້ກ່າວວ່າ ຄວາມຕ້ອງການແຮງງານໃນອາເມຣິກາຢູ່ໃນລະດັບທີ່ສູງເກີນໄປ ແລະ ເຟດຍັງບໍ່ທັນແນມເຫັນທາງອື່ນ ນອກຈາກການໃຊ້ນະໂຍບາຍຄຸມເຂັ້ມດ້ານການເງິນເພື່ອຄວບຄຸມຄວາມຕ້ອງການດ້ານສິນຄ້າ ແລະ ການບໍລິການ ເພື່ອໃຫ້ພາກທຸລະກິດຫຼຸດຄວາມຕ້ອງການແຮງງານ ເນື່ອງຈາກຂະນະນີ້ຕະຫລາດແຮງງານຢູ່ໃນພາວະທີ່ຮ້ອນແຮງຫລາຍ ຊຶ່ງທ່ານລະບຸວ່າ ພວກເຮົາເຄີຍໄດ້ຄາດຄະເນໄວ້ວ່າ ອັດຕາເງິນເຟີ້ຈະເພີ່ມຂຶ້ນສູງທີ່ສຸດໃນໄລຍະເວລານີ້ ຈາກນັ້ນຈະຫົດຕົວລົງໃນໄລຍະເວລາທີ່ເຫລືອຂອງປີນີ້ ແລະ ປັບໂຕລົງອີກຕໍ່ໄປ ແຕ່ການຄາດຄະເນດັ່ງກ່າວເຮັດໃຫ້ພວກເຮົາຜິດຫວັງ ນັບຈາກນີ້ ພວກເຮົາຈະບໍ່ດຳເນີນນະໂຍບາຍທີ່ເອື້ອອຳນວຍຕໍ່ຝັ່ງການສະໜອງ ແຕ່ພວກເຮົາຈະໃຊ້ວີທີການປັບຂຶ້ນອັດຕາດອກເບ້ຍເພື່ອຮັກສາຄວາມສົມດູນຂອງຄວາມຕ້ອງການ ແລະ ການສະໜອງ.