ເວົ້າໜ້ອຍ ຄິດຫລາຍ ເຮັດຕະຫລອດ
ຫລາຍທ່ານຄົງໄດ້ຍິນ “ເຮັດຫລາຍກວ່າເວົ້າ” ແລະ ອາດຈະເຄີຍເຫັນຄົນບໍ່ໜ້ອຍເຮັດໄດ້. ຂະນະທີ່ຜູ້ເຮັດບໍ່ໄດ້ ອາດຄິດວ່າມັນເປັນເລື່ອງຍາກວ່າຊັ້ນ! ແນວໃດກໍດີຜູ້ປະສົບຜົນສຳເລັດຫລາຍທ່ານ ໜ້າຈະເປັນຄົນເວົ້າໜ້ອຍ ຄິດຫລາຍ ແລະ ເຮັດຕໍ່ເນື່ອງ.
ໃນສັງຄົມໂດຍສະເພາະຢູ່ສຳນັກງານອົງການທັງພາກລັດ ແລະ ຫົວໜ່ວຍທຸລະກິດ, ບາງຄົນເວົ້າຫລາຍ ແຕ່ເຮັດຫຍັງບໍ່ໄດ້ຈັກຢ່າງເນື່ອງຈາກມົວແຕ່ເວົ້າຈົນລືມຟັງ. ຫລາຍທ່ານໃຫ້ທັດສະນະວ່າ: ເມື່ອເວົ້າຫລາຍ ສະມາທິຈະຫລຸດລົງ ເມື່ອບໍ່ມີສະມາທິໂອກາດການຂາດສະຕິປັນຍາຈະມີຫລາຍຂຶ້ນ. ດີບໍ່ທີ່ຈະສ້າງຕົນເປັນຄົນບໍ່ເວົ້າຫລາຍ, ແຕ່ຖ້າຈະເວົ້າແທ້ໆ ກໍເວົ້າແຕ່ສິ່ງດີໆເພື່ອນຳຜົນປະໂຫຍດມາໃຫ້ຕົນດີກວ່າ.
ຂະນະດຽວກັນກໍຢ່າລືມວ່າ ການຟັງ ສາມາດສ້າງຄວາມສຳເລັດໄດ້ດີກວ່າການເວົ້າ ໂດຍເຫັນໄດ້ຜູ້ປະສົບຜົນສຳເລັດສ່ວນຫລາຍ ມັກຟັງຫລາຍກວ່າເວົ້າ ເພາະການຟັງເຮັດໃຫ້ເກີດຄວາມຄິດ ແລະ ປັນຍາ ສາມາດນຳເອົາເລື່ອງທີ່ຟັງໄປຜັນຂະຫຍາຍເຂົ້າໃນຊີວິດ ການຈເຮັດວຽກໄດ້ດີ.
ສ່ວນການຄິດຫລາຍ, ບາງຄົນຄິດຢາກຈະເວົ້າຫຍັງກໍເວົ້າອອກມາ ໂດຍບໍ່ຄິດວ່າ ສິ່ງທີ່ເວົ້າອອກນັ້ນ ກະທົບຫຍັງແດ່, ແຕ່ນອກຈາກ “ຄິດກ່ອນເວົ້າ” ແລ້ວ ຕ້ອງຄິດໃຫ້ຫລາຍຂຶ້ນກວ່າເກົ່າ. ຄິດໃຫ້ຫລາຍ ໝາຍເຖິງການຄິດແນວໃດ ຈຶ່ງເປັນເຫດເປັນຜົນ ລະອຽດຮອບຄອບ ຄຳນຶງຜົນທີ່ຈະຕາມມາ, ບໍ່ແມ່ນການໃຊ້ເວລາຄິດດົນໆ ເພາະບາງເທື່ອການໃຊ້ເວລາດົນ ກໍບໍ່ໝາຍຄວາມວ່າຈະດີ ຂໍພຽງມີສະມາທິຢູ່ກັບຄວາມຄິດໃຫ້ຫລາຍທີ່ສຸດ, ຄິດກັ່ນຕອງໃຫ້ດີ ໃຊ້ສະຕິ ແລະ ປັນຍາຢ່າງຮອບຄອບ ຄວາມຄິດດີໆ ກໍຈະອອກມາເອງ.
ສຸດທ້າບຄືການເຮັດຫລາຍ ເຮັດຕໍ່ເນື່ອງເພາະມີໂອກາດປະສົບຜົນສຳເລັດຫລາຍກວ່າ ຄືບໍ່ຈໍາເປັນຕ້ອງເສຍເວລາ, ເປືອງເຫື່ອເປືອງແຮງທີ່ຈະເວົ້າຕອບໂຕ້ໃຜ ເມື່ອໃຊ້ຄວາມຄິດທີ່ຜ່ານການກັ່ນຕອງເປັນຢ່າງດີ ກໍລົງມືເຮັດທັນທີ ເຮັດໃຫ້ໄດ້ຫລາຍ ຈຶ່ງໄດ້ຜົນຫລາຍ.
ທຳມະຊາດຂອງຄົນເຮົາສ່ວນຫລາຍມັກເວົ້າຫລາຍ ຄິດໜ້ອຍ ແລະ ບໍ່ເຮັດຈັກເທື່ອ ເຊິ່ງຖ້າຢາກປ່ຽນຕົນ ເອງໃຫ້ເປັນຄົນປະສົບຜົນສຳເລັດຫລາຍຂຶ້ນ ຕ້ອງເວົ້າໜ້ອຍ ຮູ້ກາລະເທສະເວລາໃດຄວນເວົ້າ, ຄິດໃຫ້ຫລາຍ ເຮັດຫລາຍ ແລະ ເປັນປະຈຳ.
