“ປັອກບາ” ອາດບໍ່ໄດ້ສວມຊຸດຜີແດງອີກແລ້ວ ຫລັງເຈັບນ່ອງຕ້ອງພັກຍາວຈົນຈົບລະດູການ

ພໍລ ປັອກບາ ກອງກາງຊາວຝຣັ່ງຂອງ ແມນເຊັສເຕີ ຢູໄນເຕັດ ກຽມປິດເທີມຍາວລະດູການນີ້ ຫຼັງ​ໄດ້ຮັບບາດ​ເຈັບທີ່ນ່ອງ​ ແລະ ຈະຕ້ອງພັກຮັກສາຕົວເປັນເດືອນ

ນອກຈາກນີ້ ຍັງມີຄວາມເປັນໄປໄດ້ສູງທີ່ນັກເຕະອາຍຸ 29 ປີ ເຊີ່ງໄດ້ຮັບບາດເຈັບໃນນັດເສຍໃຫ້ ລິເວີພູລ 0-4 ເມື່ອວັນອັງຄານທີ່ຜ່ານມາ. ຈະບໍ່ກັບມາລົງສະໜາມໃຫ້ກັບ ແມນເຊັສເຕີ ຢູໄນເຕັດ ອີກແລ້ວ ເພາະສັນຍາຈະໝົດໃນທ້າຍລະດູການນີ້. ແລະ ບໍ່ມີທ່າທີ່ວ່າຈະ​ເອົາ​ປາກ​ກາ​ຕໍ່​ສັນຍາ​ສະບັບ​ໃໝ່​ອີກ​ດ້ວຍ

“ພໍລ ເຂົ້າຮັບການກວດຮຽບຮ້ອຍ ແລະ ບໍ່ຫນ້າຈະກັບມາຫຼິ້ນໄດ້ອີກໃນລະດູການນີ້. ຫມໍບອກວ່າ ເຂົາມີແນວໂນ້ມທີ່ຈະໃຊ້ເວລາຮັກສາຢ່າງຫນ້ອຍ 4 ອາທິດ ໃນການຟື້ນຕົວ ແລະ ເກມສຸດທ້າຍຈະເຕະໃນທ້າຍເດືອນພຶດສະພາ. ຂ້ອຍບໍ່ຄິດວ່າລາວຈະກັບມາຫຼິ້ນໄດ້ອີກແລ້ວ ” ຣາຟ ຣັງນິກ ຜູ້ຈັດການ ແມນເຊັສເຕີ ຢູໄນເຕັດ ກ່າວ.