2 ນັກເຕະແມນຢູ ຊຸດ 3 ແຊ໊ມ ນຳທີມ 6 ຕຳນານນັກເຕະເຂົ້າຫໍກຽດຕິຍົດພຣີເມຍລີກ
2 ນັກເຕະໂຕເກ່ັງຂອງ ແມນເຊສເຕີ ຢູໄນເຕັດ ເດີນຫນ້ານຳທີມ 6 ນັກເຕະຕຳນານ ຕາມ 10 ຄົນກ່ອນຫນ້ານີ້ເຂົ້າສູ່ຫໍກຽດຕິຍົດຂອງ ພຣີເມຍລີກ ອັງກິດ.
ພຣີເມຍລີກ ໄດ້ປະກາດລາຍຊື່ອະດີດນັກເຕະທີ່ໄດ້ຮັບກຽດໃຫ້ເຂົ້າສູ່ຫໍກຽດຕິຍົດຂອງລີກ ຫລື Hall Of Fame ເຊິ່ງກ່ອນຫນ້ານີ້ມີອະດີດນັກເຕະທີ່ໄດ້ຮັບກຽດຢູ່ໃນຫໍດັ່ງກ່າວມາແລ້ວເຖິງ 10 ຄົນ ປະກອບໄປດ້ວຍ ອາລັນ ເຊຍເລີ, ເທຍຣີ ອອງຣີ, ເດວິດ ເບັກແຮມ, ຣອຍ ຄີນ, ເອຣິກ ຄັນໂຕນາ, ແຟຣັງ ແລມພາດ, ເດນນິສ ເບີກແຄມ, ສະຕີເວັນ ເຈີຣາດ ແລະ 2 ນັກເຕະຫລ້າສຸດທີ່ຫາກໍເຂົ້າມາເມື່ອເດືອນມີນາທີ່ຜ່ານມາຄື ເວນ ຣູນີ ແລະ ປາທຣິກ ວິເອຣາ.
ຫລ້າສຸດມີການປະກາດຈາກທາງພຣີເມຍລີກ ເພີ່ມຕື່ມແລ້ວວ່າ ຈະມີອີກຫລາຍເຖິງ 6 ນັກເຕະເຂົ້າມາສູ່ຫໍກຽດຕິຍົດ ເຊັ່ນ : ພອລ ສະໂຄລສ, ປີເຕີ ຊະໄມເຄິລ 2 ດາວເຕະຈາກ ແມນເຊສເຕີ ຢູໄນເຕັດ, ດີດີເຢ ດຣ໊ອກບາ ດາວຍິງຈາກເຊລຊີ,ອຽນ ໄຣ ຈາກ ອາເຊນອລ ແລະ ແວງຊອງ ຄອມປານີ ແລະ ອາເກວໂຣ 2 ອະດີດດາວເຕະຈາກ ແມນເຊສເຕີ ຊິຕີ ເຂົ້າສູ່ຫໍກຽດຕິຍົດເປັນທີ່ຮຽບຮ້ອຍແລ້ວ.
ເຊິ່ງ ຣິຊາດ ມາສເຕີ ຜູ້ອຳນວຍການຂອງ ພຣີເມຍລີກ ໄດ້ອອກມາເປີດເຜີຍວ່າ : ‘‘ ການປະກາດລາຍຊື່ຂອງຫໍກຽດຕິຍົດຫລ້າສຸດ ເປັນແຫລ່ງລວມນັກເຕະລະດັບໂລກ ທີ່ແຟນບານທົ່ວໂລກຮັກເອົາໄວ້ນຳກັນ ຂ້ອຍຍິນດີກັບພວກເຂົາທຸກຄົນ ແລະ ພວກເຂົາສົມຄວນໄດ້ຮັບກຽດນີ້ເປັນຢ່າງສູງໃນເວລານີ້ ເຮົາມີແລ້ວຫລາຍເຖິງ 16 ຄົນ ແລະ ໃນອະນາຄົດຈະມີເຂົ້າມາຕື່ມອີກເລື່ອຍໆ ’’.
