ປະເມີນການຈັດຕັ້ງປະຕິບັດກົດໝາຍວ່າດ້ວຍທີ່ດິນ

ທ່ານ ຈະເລີນ ເຢຍປາວເຮີ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້ມີຄວາມສຳຄັນຫຼາຍ ຊຶ່ງເປັນຄັ້ງທຳອິດທີ່ມີການປະເມີນການຈັດຕັ້ງປະຕິບັດກົດໝາຍ ນັບແຕ່ລັດເຮົາໄດ້ປະກາດໃຊ້ກົດໝາຍ ແລະ ນິຕິກຳໃຕ້ກົດໝາຍໃນໄລຍະຜ່ານມາ ແນໃສ່ເພື່ອເປັນການປະຕິບັດພາລະບົດບາດຂອງສະພາແຫ່ງຊາດໃນການຕິດຕາມກວດກາ ແລະ ທັງເປັນການເກັບກຳຂໍ້ມູນ, ຄຳເຫັນ, ສະຫຼຸບຖອດຖອນບົດຮຽນ ເພື່ອລາຍງານຕໍ່ຄະນະປະຈຳສະພາແຫ່ງຊາດ ກໍຄືກອງປະຊຸມສະໄໝສາມັນ ເທື່ອທີ 3 ທີ່ຄາດວ່າຈະເປີດຂຶ້ນໃນຕົ້ນເດືອນມິຖຸນາ 2022. ການປະເມີນຜົນການປະຕິບັດກົດໝາຍວ່າດ້ວຍທີ່ດິນນີ້ ແມ່ນ 1 ໃນ 4 ກົດໝາຍ ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ກໍຄື ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍແຮ່ທາດ ແລະ ກົດໝາຍວ່າດ້ວຍການຄຸ້ມຄອງຊັບສິນຂອງລັດ. ນອກນີ້, ທ່ານປະທານກອງປະຊຸມ ຍັງໄດ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມ ຈົ່ງຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ສຸມທຸກສະຕິປັນຍາ ເພື່ອປະກອບຄຳເຫັນໃນການປະເມີນກົດໝາຍດັ່ງກ່າວ ໃຫ້ສອດຄ່ອງກັບສະພາບຕົວຈິງ, ພາວະວິໄສ.

ທ່ານ ນາງ ບຸນຄຳ ວໍລະຈິດ ລັດຖະມົນຕີກະຊວງ ຊສ ໄດ້ຂຶ້ນສະເໜີກ່ຽວກັບການປະເມີນການຈັດຕັ້ງປະຕິບັດກົດໝາຍດັ່ງກ່າວ ໂດຍໄດ້ຍົກໃຫ້ເຫັນເຖິງສະພາບລວມ ແລະ ການໂຄສະນາເຜີຍແຜ່ກົດໝາຍໃຫ້ກວ້າງຂວາງ, ທົ່ວເຖິງຂະແໜງການທ້ອງຖິ່ນ ແລະ ພື້ນຖານປະຊາຊົນ; ສະພາບການຈັດຕັ້ງປະຕິບັດ ແລະ ຜັນຂະຫຍາຍເປັນນິຕິກຳໃຕ້ກົດໝາຍ, ຍົກໃຫ້ເຫັນດ້ານດີ ແລະ ຜົນສຳເລັດຂອງການຈັດຕັ້ງປະຕິບັດກົດໝາຍວ່າດ້ວຍທີ່ດິນ ລວມທັງການຈັດຕັ້ງປະຕິບັດແຜນແມ່ບົດຈັດສັນທີ່ດິນແຫ່ງຊາດ; ສະພາບການຈັດຕັ້ງປະຕິບັດກ່ຽວກັບລະບອບກຳມະສິດ, ການຄຸ້ມຄອງການເຊົ່າ ແລະ ສຳປະທານທີ່ດິນ, ການຈັດສັນທີ່ດິນ, ການຫັນປ່ຽນກຳມະສິດຂອງບຸກຄົນ, ນິຕິບຸກຄົນ ແລະ ການຈັດຕັ້ງ. ນອກນີ້, ທ່ານລັດຖະມົນຕີກະຊວງ ຊສ ຍັງໄດ້ມີຂໍ້ສະເໜີແລກປ່ຽນກ່ຽວກັບການປະເມີນການຈັດຕັ້ງປະຕິບັດ ກົດໝາຍວ່າດ້ວຍທີ່ດິນໃນຫຼາຍມາດຕາ.