ຣັງນິກ ຍອມຮັບ ແມນຢູ ຍັງຫລ້າຫລັງຫ່າງໄກ ລີເວີພູລ ເຖິງ 6 ປີ

ຣາຟ ຣັງນິກ ຜູ້ຈັດການທີມ ແມນເຊສເຕີ ຢູໄນເຕັດ ຍອມຮັບ ຍັງຕາມຫລັງ ລີເວີພູລ ອີກ 6 ປີ ຫລັງບຸກໄປເສຍໃຫ້ ລີເວີພູລ ແບບຫມົດທາງສູ້ 4-0.

ຣາຟ ຣັງນິກ ຜູ້ຈັດການທີມ ແມນເຊສເຕີ ຢູໄນເຕັດ ຍອມຮັບວ່າລູກທີມຂອງຕົນ ຍັງຕາມຫລັງລີເວີພູລ ຫ່າງໄກເຖິງ 6 ປີ ຫລັງບຸກໄປເສຍໃຫ້ ລີເວີພູລ ສອນບານແບບຄົນລະຊັ້ນ 4-0 ໃນການແຂ່ງຂັນພຣີເມຍລີກອັງກິດ ນັດແດງເດືອດ ເມື່ອວັນອັງຄານທີ່ຜ່ານມາ.

ເກມນີ້ ແມນຢູ ທີ່ຕ້ອງການຄະແນນເພື່ອຫວັງຕິດ 1 ໃນ 4 ບໍ່ສາມາດຕໍ່ກອນກັບ ລີເວີພູລ ໄດ້ເລີຍ ໂດຍຕົກເປັນຮອງ 0-2 ໃນເຄິ່ງເວລາທຳອິດ ຈາກປະຕູຂອງ ຫລຸຍ ດີອາສ ແລະ ໂມຮາເຫມັດ ຊາລາ ໂດຍ ບໍ່ມີໂອກາດຍິງໄກແມ່ນແຕ່ຫນ່ວຍດຽວ ກ່ອນຈະມາຖືກທະລວງຕາຫນ່າງໄປອີກ 2 ໜ່ວຍ ໃນເຄິ່ງເວລາທີສອງ ຈາກຜົນງານຂອງ ຊາດີໂອ ມາເນ ແລະ ຊາລາ ຄົນເກ່ົາ.

ຣັງນິກ ກ່າວວ່າ :  ‘‘ ຂ້ອຍບໍ່ຄິດວ່າ ການເລີ່ມຕົ້ນດ້ວຍແຜນການແບບອື່ນຈະເຮັດໃຫ້ທຸກຢ່າງປ່ຽນໄປໄດ້ ປະູຕູທຳອິດທີ່ເຮົາເສຍຈາກການດັນຂຶ້ນສູງ ແລະ ຈາກຈັງຫວະສວນກັບຫລັງເກມຜ່ານໄປພຽງ 5 ນາທີ ບໍ່ໄດ້ຢູ່ໃນແຜນຂອງເຮົາ ນັ້ນປ່ຽນໂສມຫນ້າເກມໄປຫມົດ ’’.

‘‘ ເຄິ່ງເວລາທຳອິດຫລິ້ນໄດ້ບໍ່ດີ ເຮົາບໍ່ສາມາດເກັບບານທຳອິດ ຫລື ບານສອງໄດ້ເລີຍ ເຮົາເປັນຮອງໃນທຸກໆດ້ານ ເຄິ່ງເວລາສອງເຮົາຖອດກອງຫລັງກາງອອກ ແລະ ສົ່ງ ເຈດອນ ຊານໂຊ ລົງໄປ ໄລຍະ 25 ນາທີທຳອິດເຮົາຫລິ້ນໄດ້ດີຂຶ້ນ ແລະ ມີການກົດດັນເຂົ້າຫາບານຢູ່ 2 ຫລື 3 ຄັ້ງ ແຕ່ປະຕູທີ 3 ເຮັດໃຫ້ເກມຈົບໄປເລີຍ ’’.

‘‘ ມັນຫນ້າອາຍ ຫນ້າຜິດຫວັງ ແລະ ບາງເທື່ອອາດຈະຫນ້າອັບປະຍົດ ເຮົາຕ້ອງຍອມຮັບວ່າ ຕອນນີ້ ລີເວີພູລ ນຳຫນ້າເຮົາຢູ່ 6 ປີ ເມື່ອ ເຈີເກັນ ຄລອບ ກ້າວເຂົ້າມາ ພວກເຂົາປ່ຽນແປງສະໂມສອນ ແລະ ບໍ່ພຽງຍົກລະດັບທີມຂຶ້ນມາ ແຕ່ຍັງຍົກລະດັບເມືອງຂຶ້ນມານຳອີກ ນີ້ຄືສິ່ງທີ່ຈຳເປັນຈະຕ້ອງເກີດຂຶ້ນກັບເຮົາໃນຕະຫລາດນັກເຕະໄລຍະຕໍ່ໄປ ’’ ຜູ້ຈັດການທີມ ຊາວເຢຍລະມັນ ກ່າວ.