ເກີດເຫດລະເບີດຢູ່ໂຮງຮຽນມັດທະຍົມ ໃນນະຄອນຫລວງກາບູນຂອງອັບການິດສະຖານ ມີຜູ້ເສຍຊີວິດຢ່າງໜ້ອຍ 6 ຄົນ
ເກີດເຫດລະເບີດຢູ່ໂຮງຮຽນມັດທະຍົມ ແລະ ສະຖາບັນສອນພາສາໃນນະຄອນຫລວງກາບູນຂອງອັບການິດສະຖານ ມີຜູ້ເສຍຊີວິດຢ່າງໜ້ອຍ 6 ຄົນ ຍັງບໍ່ມີກຸ່ມໃດອອກມາອ້າງຄວາມຮັບຜິດຊອບ.
ວັນທີ 19 ເມສາ 2022, ສຳນັກຂ່າວຕ່າງປະເທດລາຍງານວ່າ: ເກີດເຫດລະເບີດຢູ່ໂຮງຮຽນມັດທະຍົມ Abdul Rahim Shaheed ໃນເຂດ Dasht-e-Barchi ນອກນະຄອນຫລວງກາບູນ ຂອງອັບການິດສະຖານ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 6 ຄົນ ແລະ ໄດ້ຮັບບາດເຈັບອີກ 11 ຄົນ.
ທ່ານ ຄາລິດ ຊາດຣານ ໂຄສົກຕຳຫລວດນະຄອນຫລວງກາບູນ ເປີດເຜີຍວ່າ: ໂຮງຮຽນດັ່ງກ່າວຖືກໂຈມຕີດ້ວຍລະເບີດສະແຫວງເຄື່ອງ 2 ໜ່ວຍ ໂດຍປັດຈຸບັນກອງກຳລັງຮັກສາຄວາມປອດໄພໄດ້ເດີນທາງໄປຮອດຈຸດເກີດເຫດແລ້ວ, ສ່ວນຈຳນວນຜູ້ເສຍຊີວິດໄດ້ຮັບບາດເຈັບທີ່ລະບຸເປັນພຽງຕົວເລກເບື້ອງຕົ້ນ, ປັດຈຸບັນກຳລັງຢູ່ລະຫວ່າງການກວດສອບຂໍ້ມູນເພີ່ມຕື່ມ.
ທ່ານ ຊາດຣານ ລະບຸວ່າ: ຫລັງຈາກເກີດລະເບີດຢູ່ໂຮງຮຽນມັດທະຍົມ Abdul Rahim Shaheed ພຽງບໍ່ດົນ ໄດ້ເກີດເຫດລະເບີດຄັ້ງທີ 3 ຂຶ້ນຢູ່ສະຖາບັນສອນພາສາອັງກິດ ເຊິ່ງຢູ່ຫ່າງອອກໄປຫລາຍກິໂລແມັດ, ແຕ່ຢູ່ໃນພື້ນທີ່ດຽວກັນ ໂດຍຍັງບໍ່ໄດ້ຮັບລາຍງານຄວາມເສຍຫາຍຈາກສະຖານທີ່ດັ່ງກ່າວ.
ດ້ານພະຍານທີ່ເຫັນເຫດການເລົ່າວ່າ: ເຫດລະເບີດເກີດຂຶ້ນໃນຂະນະທີ່ນັກຮຽນຂອງໂຮງຮຽນມັດທະຍົມ Abdul Rahim Shaheed ເຊິ່ງຮອງຮັບນັກຮຽນໄດ້ປະມານ 1.000 ຄົນ ເລີກຮຽນຊ່ວງເຊົ້າ ແຕ່ຍັງບໍ່ແນ່ນອນວ່າໃນຂະນະນັ້ນມີນັກຮຽນຢູ່ພາຍໃນໂຮງຮຽນຈັກຄົນ.
ຂະນະທີ່ໂຮງໝໍໃນນະຄອນຫລວງກາບູນໄດ້ອອກມາເປີດເຜີຍວ່າ: ຜູ້ໄດ້ຮັບບາດເຈັບຍັງມີຈຳນວນເພີ່ມຂຶ້ນ ໂດຍຫລາຍຄົນຍັງຢູ່ໃນອາການສາຫັດ ເຮັດໃຫ້ຢ້ານວ່າອາດມີຜູ້ເສຍຊີວິດເພີ່ມຂຶ້ນ.
ທັງນີ້, ເຂດ Dasht-e-Barchi ເຊິ່ງເປັນພື້ນທີ່ເກີດເຫດ ເປັນທີ່ຢູ່ອາໄສຂອງຊຸມຊົນມຸດສະລິມ Hazara Shia ທີ່ນັບຖືສາສະໜາອິສລາມນິກາຍຊີອະ ແລະ ເປັນຊົນກຸ່ມນ້ອຍທາງຊາດພັນທີ່ມັກຕົກເປັນເປົ້າການໂຈມຕີຂອງກຸ່ມຕິດອາວຸດສຸນີ ແລະ ກຸ່ມລັດອິສລາມ.
ເຖິງຢ່າງໃດກໍຕາມ, ຍັງບໍ່ມີການອ້າງຄວາມຮັບຜິດຊອບຈາກກຸ່ມໃດ, ຂະນະທີ່ຕາລີບັນໄດ້ອອກມາປະຕິເສດການມີສ່ວນຮ່ວມໃນການໂຈມຕີທີ່ເກີດຂຶ້ນ.
ອ້າງອີງ:
https://edition.cnn.com/…/afghanistan-kabul…/index.html
https://www.aljazeera.com/…/kabul-boys-school-rocked-by…
https://www.bbc.com/news/world-asia-61148248
