ສປປ ລາວ ຖືກສະເໜີ ໃຫ້ເປັນເຈົ້າພາບ ຈັດງານກິລາຊີເກມ ຄັ້ງທີ 35 ປີ 2029

ກອງປະຊຸມລະດັບຫົວໜ້າຄະນະກິລາຊີເກມ ຄັ້ງທີ 32 ໄດ້ສະເໜີ ໃຫ້ສປປ ລາວ ເປັນເຈົ້າພາບຈັດງານມະຫະກຳກິລາຊີເກມ ຄັ້ງທີ 35 ປີ 2029 ຖັດຈາກ ຣາຊະອານາຈັກໄທ ຈັດງານກິລາຊີເກມຄັ້ງທີ 33 ປີ 2025 ແລະ ປະເທດອິນໂດເນເຊຍ ເປັນເຈົ້າພາບ ຈັດງານກິລາຊີເກມ ຄັ້ງທີ 34 ໃນປີ 2027, ຊຶ່ງກອງປະຊຸມດັ່ງກ່າວ ໄດ້ຈັດຂຶ້ນເມື່ອບໍ່ດົນມານີ້ ທີ່ຣາຊະອານາຈັກກຳປູເຈຍ ເພື່ອກຽມຮັບກຽດເປັນເຈົ້າພາບຂອງກຳປູເຈຍ ຈັດງານມະຫະກຳກິລາຊີເກມ ຄັ້ງທີ 32 ໃນປີ 2023 ພາຍໃຕ້ການເປັນປະທານຂອງ ທ່ານ ທອງຄູນ ຮອງລັດຖະມົນຕີກະຊວງວັດທະນະທຳ ແລະ ການທ່ອງທ່ຽວ ແຫ່ງຣາຊະອານາຈັກກຳປູເຈຍ, ມີບັນດາຕາງໜ້າຄະນະນຳຈາກ 11 ຊາດ ໃນອາຊຽນເຂົ້າຮ່ວມ.

ໃນກອງປະຊຸມຄັ້ງນີ້, ທາງເຈົ້າພາບກຳປູເຈຍ ກໍໄດ້ມີການສະເໜີແຜນການຈະຈັດງານມະຫະກຳກິລາຊີເກມ ຄັ້ງທີ 32 ໃນປີ 2023 ພ້ອມທັງປະກອບຄຳຄິດຄຳເຫັນແລກປ່ຽນບົດຮຽນ ກັບບັນດາຕາງໜ້າຄະນະນຳຈາກ 11 ຊາດ, ໃນນັ້ນ ທາງເຈົ້າພາບກໍໄດ້ສະເໜີຈະຈັດການແຂ່ງຂັນຢູ່ 4 ຈຸດໃຫຍ່ໆ ໃນຣາຊະອານາຈັກ ກຳປູເຈຍ, ພ້ອມກັນນັ້ນ ມາເລເຊຍ ແລະ ອິນໂດເນເຊຍ ກໍໄດ້ສະເໜີເອົາກິລາປັນຈັກສີລັດບັນຈຸເຂົ້າແຂ່ງຂັນ, ສ່ວນ ທາງສປປ ລາວ ກໍໄດ້ສະເໜີໃຫ້ບັນຈຸກິລາວູຊູ ແລະ ສປປ ລາວ ກໍຂໍຮັບເອົາຄຳສະເໜີ ໃຫ້ເປັນເຈົ້າພາບ ຈັດງານມະຫະກຳກິລາຊີເກມ ຄັ້ງທີ 35 ປີ 2029 ກັບໄປສະເໜີຕໍ່ລັດຖະບານ ແລະ ຈະໄດ້ຕອບໃນກອງປະຊຸມຄະນະມົນຕີຊີເກມໃນຄັ້ງຕໍ່ໄປ ຊຶ່ງຈະຈັດຂຶ້ນໃນກາງເດືອນມິຖຸນານີ້.

ມາຮອດປັດຈຸບັນ ເຈົ້າພາບ ກຳປູເຈຍ ໄດ້ມີຄວາມຄືບໜ້າ ແລະ ມີຄວາມພ້ອມຫຼາຍດ້ານໃນການຈັດງານມະຫະກຳກິລາຊີເກມ ຄັ້ງທີ 32 ໃນປີ 2023, ໂດຍສະເພາະທາງດ້ານການປ້ອງກັນໂຄວິດ-19 ທາງເຈົ້າພາບ ກຳປູເຈຍ ໄດ້ມີການລະດົມປະຊາຊົນໃຫ້ມີການສັກວັກຊີນເປັນທີ່ຮຽບຮ້ອຍ ແລະ ມີແນວໂນ້ມດີຂຶ້ນເລື້ອຍໆ.