ປກສ ເມືອງຫົງສາ ສະກັດຈັບຜູ້ຂົນສົ່ງຢາເສບຕິດ ຢຶດໄດ້ທັງໄອສ໌ ແລະ ຢາບ້າ
ວັນທີ 18 ເມສາ 2022 ທ່ານ ພັທ ທອງໄຫຼ ເພັດດາວົງ ຫົວໜ້າ ປກສ ເມືອງຫົງສາ ແຂວງໄຊຍະບູລີ ໄດ້ຖະແຫລງຂ່າວກ່ຽວກັບການປະຕິບັດໜ້າໃນການສະກັດລົດຂົນສົ່ງຢາເສບຕິດ ໃນວັນທີ 11-12 ເມສາ 2022 ໂດຍສາມາດຢຶດລົດໃຫຍ່ໄດ້ 2 ຄັນ, ຜູ້ຕ້ອງຫາ 1 ຄົນລວມຂອງກາງຢາບ້າ 952 ກິໂລກຣາມ, ໄອສ 534 ກິໂລກຣາມ.
ທ່ານ ພັທ ທອງໄຫຼ ເພັດດາວົງ ກ່າວວ່າ: ວັນທີ 11 ເມສາ 2022, ເຈົ້າໜ້າທີ່ໄດ້ຮັບລາຍງານຈາກພົນລະເມືອງດີວ່າ ຈະມີກຸ່ມຄົນຈຳນວນໜຶ່ງຂົນຢາເສບຕິດຜ່ານ ເມືອງຫົງສາຈິ່ງໄດ້ຈັດຕັ້ງກຳລັງ ແລະ ວາງແຜນການສະກັດຈັບລົດເປົ້າໝາຍ. ຮອດເວລາ 12 ໂມງຂອງວັນດຽວກັນ ກໍພົບເຫັນລົດເປົ້າໝາຍ 1 ຄັນ ເປັນລົດວີໂກ້ແຊັມ ໝາຍເລກທະບຽນ ກວ ກຳແພງນະຄອນ 5869 ຈຶ່ງສະກັດ ແລະ ໄດ້ຈັບຜູ້ຂັບຂີ່ທັນທີ ພ້ອມກວດຄົ້ນພາຍໃນລົດ ພົບຢາບ້າ 1.690 ມັດ ເທົ່າກັບ 380 ກິໂລກຣາມ, ຢາໄອສ໌ 531 ຫໍ່ ເທົ່າກັບ 534 ກິໂລກຣາມ, ໂທລະສັບມືຖື 2 ໜ່ວຍແລະ ນຳຜູ້ຖືຫາມາດຳເນີນການສືບສວນ-ສອບສວນ.
ຜ່ານການສອບສວນ ຈິ່ງຮູ້ວ່າ: ຜູ້ຖືກຫາ ຊື່ທ້າວ ສີແພງ ລີຢົງວ່າງ ອາຊີບພະນັກງານ ຢູ່ບ້ານແດນກາງ ເມືອງລອງ ແຂວງຫຼວງນໍ້າທາ ເຊິ່ງຜູ້ກ່ຽວສາລະພາບວ່າ: ໄດ້ຮ່ວມກັບພັກພວກຂົນຢາເສບຕິດ ແລະ ຈາກຄຳໃຫ້ການຂອງຜູ້ຖືກຫາ, ເຈົ້າໜ້າທີ່ຈິ່ງໄດ້ວາງກຳລັງອອກຊອກໄລ່ຈັບຜູ້ຮ່ວມຂະບວນການທັນທີ ຈົນຮອດເວລາ 11 ໂມງ ຂອງວັນທີ 12 ເມສາ 2022 ພົບເຫັນລົດກະບະຣີໂວ້ ບໍ່ມີເລກທະບຽນຈອດປະໄວ້ແຄມທາງເຂດບ້ານພູແລ້ງກາງ ເມືອງຫົງສາຈຶ່ງເຂົ້າກວດຄົນບໍລິເວນໃກ້ຄຽງພົບຮ່ອງຮອຍຂອງກຸ່ມຄົນຈຳນວນໜຶ່ງຫຼົບໜີເຂົ້າປ່າ ແລະ ພົບເຫັນຢາບ້າ 21 ເປົາ ນໍ້າໜັກ 572 ກິໂລກຣາມ ແລະ ພົບເຫັນຮ່ອງຮອຍການແກະປ້າຍທະບຽນອອກ. ຈາກນັ້ນຈິ່ງກວດຄົ້ນບໍເວນໃກ້ຄຽງອີກເທື່ອໜຶ່ງ ໂດຍພົບເຫັນ ປ້າຍທະບຽນລົດ ກລ ກຳແພງນະຄອນ 6328. ຕໍ່ມາເຈົ້າຈິ່ງນຳເອົາຢາບ້າ ແລະ ລົດ ມາກອງບັນຊາການ ປກສ ເມືອງເພື່ອສືບຕໍ່ສືບສວນ-ສອບສວນຂະຫຍາຍຜົນ.
ຫົວໜ້າ ປກສ ເມືອງຫົງສາ ໃຫ້ຮູ້ອີກວ່າ: ນີ້ແມ່ນອີກໜຶ່ງຜົນງານ ໃນການຈັດຕັ້ງປະຕິບັດວາລະແຫ່ງຊາດແກ້ໄຂຢາເສບຕິດ ເຊິ່ງຂອງກາງທີ່ຢຶດໄດ້ມີຢາບ້າ 952 ກິໂລກຣາມ, ໄອສ 534 ກິໂລກຣາມ, ລົດໃຫຍ່ 2 ຄັນ, ຜູ້ຖືກຫາ 1 ຄົນ ແລະ ໂທລະສັບມືຖື 2 ໜ່ວຍ ແລະ ເຈົ້າທີ່ກຳລັງເລັ່ງສືບສວນ-ສອບສວນເພື່ອນຳຈັບຜູ້ຮ່ວມຂະບວນການທັງຫມົດມາລົງໂທດຕາມກົດໝາຍ.
