ສ.ເກົາຫລີ ຍົກເລີກມາດຕະການຄວບຄຸມໂຄວິດ ພິຈາລະນາຍົກເລີກບັງຄັບໃສ່ຜ້າປິດປາກ

ສະຖານະການການແພ່ລະບາດຂອງພະຍາດໂຄວິດ-19 ໃນ ສ.ເກົາຫລີ ປັບຕົວດີຂຶ້ນຕໍ່ເນື່ອງ ຍົກເລີກມາດຕະການຄວບຄຸມພະຍາດລະບາດເກືອບທັງໝົດ ກຽມພິຈາລະນາຍົກເລີກບັງຄັບໃສ່ຜ້າປິດປາກຕໍ່ຈາກນີ້.

ວັນທີ 18 ເມສາ 2022, ສຳນັກຂ່າວແຊນແນລນິວເອເຊຍ ລາຍງານວ່າ: ສ.ເກົາຫລີ ໄດ້ຍົກເລີກມາດຕະການຄວບຄຸມພະຍາດລະບາດໃນປະເທດເກືອບທັງໝົດ ຍົກເວັ້ນການບັງຄັບໃສ່ຜ້າປິດປາກ ໂດຍທຸລະກິດຮ້ານຄ້າສາມາດກັບມາເປີດໄດ້ຕາມປົກກະຕິໂດຍບໍ່ມີການຈຳກັດເວລາ ຫລື ຈຳນວນຜູ້ເຂົ້າໃຊ້ບໍລິການ ພ້ອມທັງຍົກເລີກຂໍ້ກຳນົດທີ່ຫ້າມບໍ່ໃຫ້ປະຊາຊົນລວມຕົວກັນເກີນ 10 ຄົນ ໂດຍຕໍ່ຈາກນີ້ ລັດຖະບານ ສ.ເກົາຫລີ ຈະພິຈາລະນາວ່າຈະຍົກເລີກມາດຕະການບັງຄັບໃຫ້ໃສ່ຜ້າປິດປາກ ຫລື ບໍ່ ເຊິ່ງຂຶ້ນຢູ່ກັບສະຖານະການການແພ່ລະບາດຂອງພະຍາດໂຄວິດ-19 ພາຍໃນປະເທດ.

ຕົວເລກຜູ້ຕິດເຊື້ອໃໝ່ຫລຸດລົງຕໍ່າສຸດໃນຮອບ 10 ອາທິດ ໂດຍພົບຜູ້ຕິດເຊື້ອໃໝ່ 47.743 ຄົນ ເຮັດໃຫ້ຕົວເລກຜູ້ຕິດເຊື້ອທັງໝົດທົ່ວປະເທດເພີ່ມຂຶ້ນມາຢູ່ 16.353.495 ຄົນ, ສ່ວນຄວາມຄືບໜ້າການສັກວັກຊີນ ພົບວ່າຊາວ ສ.ເກົາຫລີ ຈຳນວນ 44,5 ລ້ານຄົນ ຫລື ປະມານ 86% ໄດ້ຮັບການສັກວັກຊີນປ້ອງກັນພະຍາດໂຄວິດ-19 ຄົບໂດສ ແລະ ອີກປະມານ 64% ໄດ້ຮັບວັກຊີນເຂັມກະຕຸ້ນແລ້ວ.

ດ້ານລັດຖະບານ ສ.ເກົາຫລີ ກຽມຫລຸດລະດັບພະຍາດໂຄວິດ-19 ໃຫ້ເປັນພະຍາດລະບາດລະດັບສອງ ພ້ອມທັງເປີດທາງໃຫ້ຜູ້ຕິດເຊື້ອເຂົ້າຮັບການປິ່ນປົວຢູ່ຄລີນິກທາງການແພດທ້ອງຖິ່ນ. ຂະນະດຽວກັນ ສາທາລະນະສຸກ ສ.ເກົາຫລີ ເຕືອນວ່າ: ຈະຍັງພົບຜູ້ຕິດເຊື້ອໂຄວິດເພີ່ມຂຶ້ນຢ່າງຕໍ່ເນື່ອງ, ແຕ່ຄວາມສ່ຽງຈາກການແພ່ລະບາດໂດຍລວມຫລຸດລົງ.