ລີເວີພູລ ພ້ອມຂະຫຍາຍສັນຍາສະບັບໃຫມ່ໃຫ້ ມາເນ
ລາຍງານລະບຸວ່າ ລິເວີພູລ ມີຄວາມກະຕືລືລົ້ນໃນການຂະຫຍາຍສັນຍາກັບ ຊາດິໂອ ມາເນ ກອງໜ້າຄົນສຳຄັນ ແຕ່ຈະບໍ່ມີການທຳລາຍເພດານຄ່າຈ້າງຂອງສະໂມສອນ.
ສຳລັບ ມາເນ ທີ່ຍ້າຍມາຈາກ ເຊົາແຮມຕັນ ມາຢູ່ກັບລີເວີພູລ ເມື່ອປີ 2016 ເຊິ່ງກໍສະແດງຜົນງານໄດ້ຢ່າງໜ້າປະທັບໃຈ ໂດຍຍິງໄດ້ 115 ປະຕູ ກັບ 45 ແອສຊິສ ຈາກການານລົງຫຼິ້ນ 259 ນັດ ໃນທຸກການແຂ່ງຂັນ.
ນອກຈາກນັ້ນ ນັກເຕະອາຍຸ 30 ປີຍັງຊ່ວຍໃຫ້ ລີເວີພູລກວາດແຊ໊ມໄປແລ້ວ 5 ລາຍການ ປະກອບດ້ວຍ : ຢູຟາ ແຊ໊ມປ້ຽນລີກ, ພຣີເມຍລີກ ອັງກິດ, ສະໂມສອນໂລກ, ຟີຟາ ຄລັບ ເວີນ ຄັບ, ຢູຟາ ຊຸບເປີ ຄັບ ແລະ ຄາຣາບາວ ຄັບ.
ຢ່າງໃດກໍຕາມ, ສັນຍາຂອງ ມາເນ ກັບ ລິເວີພູລ ພວມຈະໝົດໃນເດືອນມິຖຸນາ 2023, ແຕ່ຍັງບໍ່ທັນໄດ້ຂະຫຍາຍອອກໄປອີກ. ສົ່ງຜົນໃຫ້ລາວມີຂ່າວທີ່ກ່ຽວຂ້ອງກັບການຍ້າຍສັງກັດຢ່າງຕໍ່ເນື່ອງ.
ແຕ່ຫລ້າສຸດ “football insider” ສື່ບານເຕະຊື່ດັງເປີດເຜີຍວ່າ ເຟນເວ ສະປອດ ກຣຸບ ເຈົ້າຂອງທີມສະໂມສອນ ລິເວີພູລ ພ້ອມແລ້ວທີ່ຈະຍື່ນສັນຍາສະບັບໃໝ່ໃຫ້ກັບ ມາເນ່ ແຕ່ຈະບໍ່ແມ່ນຂໍ້ສະເໜີທີ່ສູງເກີນໄປ ຈົນທຳລາຍເພດານຄ່າຈ້າງຂອງສະໂມສອນ.
