ເອີໂຣລ ສະເປນ ຈູເນຍ ຄວ້າແຊ໊ມຮຸ່ນເວລເຕີເວດ-ປະກາດທ້າ ເທເຣນ ຄຣອບຟອດ

ເອີໂຣລ ສະເປັນ ຈູເນຍ ຄວ້າແຊ໊ມສາຍແອວແຊ໊ມໂລກ ຮຸ່ນເວລເຕີເວດ ມາຄອງອີກ 1 ເສັ້ນ ພ້ອມປະກາດທ້າ ເທເຣນ ຄຣອບຟອດ ໃຫ້ມາຊີງຄວາມເປັນຫນຶ່ງແຫ່ງຮຸ່ນນີ້.

ເອີໂຣລ ສະເປັນ ຈູເນຍ ນັກມວຍແຊ໊ມໂລກຜູ້ທີ່ສະກົດຄຳວ່າເສຍບໍ່ເປັນ ປະກາດທ້າຄູ່ແຂ່ງຮ່ວມຊາດ ເທເຣນ ຄຣອບຟອດ ໃຫ້ມາຊີງຄວາມເປັນເຈົ້າແຫ່ງຮຸ່ນເວລເຕີເວດ ຫລັງຈາກຫລ້າສຸດ ສະເປັນ ຄວ້າແຊ໊ມໂລກເສັ້ນທີ 3 ມາຄອງໄດ້ສຳເລັດ.

ສະເປັນ ຫາກໍຊະນະນ໊ອກ ຢໍເດນິສ ອູກັສ ຈາກຄິວບາ ຍົກທີ 10 ໃນການຊົກທີ່ລັດເທັກຊັສ ເມື່ອວັນທີ 16 ເມສາຜ່ານມາ ປ້ອງກັນແຊ໊ມຂອງສະພາມວຍໂລກ (WBC)  ແລະ ສະຫະພັນມວຍນາໆຊາດ (IBF) ພ້ອມຄວ້າສາຍແອວແຊ໊ມຂອງສະມາຄົມມວຍໂລກ (WBA)ມາອີກ 1 ເສັ້ນ.

ສະເປັນ ອາຍຸ 32 ປີ ທີ່ຂຶ້ນຊົກອາຊີບມາແລ້ວ 28 ຄັ້ງ ຊະນະລວດ ( ຊະນະນ໊ອກ 22 ) ກ່າວວ່າ : ‘‘ ທຸກຄົນຮູ້ວ່າຂ້ອຍຕ້ອງການຫຍັງໃນລະດັບຕໍ່ໄປ ຂ້ອຍຢາກພົບກັບ ເທເຣນ ຄຣອບຟອດ ມັນເປັນການແຂ່ງຂັນທີ່ຂ້ອຍ ແລະ ທຸກຄົນຕ້ອງການ ເທເຣນ ຂ້ອຍມາເພື່ອລ່າແຊ໊ມອີກ 1 ເສັ້ນ ’’.

ຂະນະທີ່ ຄຣອບຟອດ ອາຍຸ 34 ປີ ເຊິ່ງຄອງແຊ໊ມຂອງອົງການມວຍໂລກ ເຮັດສະຖິຕິຊົກອາຊີບ 38 ຄັ້ງຊະນະລວດ ( ນ໊ອກ 29) ເປີດເຜີຍຜ່ານທະວິດເຕີຕອບກັບວ່າ : ‘‘ ເກັບສາຍແອວເຫລ່ົານັ້ນຂອງຂ້ອຍໄວ້ໃຫ້ອຸ່ນໆເດີ ຂ້ອຍຈະໄປເອົາພວກມັນມາພາຍໃນປີນີ້ ’’.

ຜ່ານມາ ສະເປັນ ເຄີຍຕົກຢູ່ໃນຈຸດສ່ຽງຕ້ອງອຳລາວົງການມາແລ້ວເຖິງ 2 ຄັ້ງ ເລີ່ມຈາກອຸບັດຕິເຫດລົດຂວ້ຳຢ່າງຮຸນແຮງໃນເດືອນຕຸລາ 2019 ແລະ ຕ້ອງຖອນຕົວຈາກການຊົກກັບ ແມນນີ ປາກຽວ ອະດີດຍອດນັກຊົກຟີລິບປິນ ເມື່ອເດືອນມິຖຸນາ 2021 ເນື່ອງຈາກມ່ານຕາຈີກຈົນຕ້ອງຜ່າຕັດ.