ຄຸນປະໂຫຍດທີ່ທ່ານຈະໄດ້ຈາກການບໍລິໂພກຊີ້ນໝູ

ເມື່ອເວົ້າເຖິງການບໍລິໂພກຊີ້ນສັດທີ່ໄດ້ຮັບຄວາມນິຍົມໃນການເອົາໄປປຸງແຕ່ງເປັນອາຫານຫລາຍຊະນິດ ບໍ່ວ່າຈະແມ່ນແກງ, ຜັດ,​ ຈືນ, ລວກ ກໍຕ້ອງແມ່ນຊີ້ນໝູ ຍ້ອນວ່າຊີ້ນບໍ່ໜຽວ ຫລື ແຂງຈົນເກີນໄປ ຫາກປຽບທຽບກັບຊີ້ນສັດຊະນິດອື່ນ, ປຸງແຕ່ງລົດຊາດໄດ້ຫລາກຫລາຍ ທັງຍັງມີສ່ວນສຳລັບເອົາໄປບໍລິໂພກໄດ້ທັງໝົດ ນີ້ຈຶ່ງເປັນປັດໄຈຫລັກທີ່ເຮັດໃຫ້ຊີ້ນໝູແມ່ນຊີ້ນສັດທີ່ເອົາມາປຸງແຕ່ງເປັນອາຫານຈານຫລັກເປັນປະຈຳ, ແຕ່ທ່ານຮູ້ຫລືບໍ່ວ່າການກິນຊີ້ນໝູນັ້ນມີປະໂຫຍດອີກຫລາຍຂໍ້ໃນເລື່ອງຂອງສານອາຫານ ແລະ ປະໂຫຍດຈາກຊີ້ນໝູໃນດ້ານສານອາຫານ ມີດັ່ງນີ້ :

1. ຊີ້ນໝູຖືເປັນແຫ່ລງໂປຣຕິນທີ່ດີ : ຊີ້ນໝູ ແມ່ນວັດຖຸດິບທີ່ຖືກຈັດຢູ່ໃນກຸ່ມຊີ້ນສັດ ເຊິ່ງໃຫ້ໂປຣຕິນຕໍ່ຮ່າງກາຍອັນສົ່ງຜົນໃຫ້ການຈະເລີນເຕີບໃຫຍ່ຂອງອະໄວຍະວະ, ເນື້ອເຍື່ອ ໂດຍຮ່າງກາຍຈະເອົາໄປຟື້ນຟູພາກສ່ວນເສື່ອມສະພາບ ຫລື ເຂົ້າສູ່ຂະບວນການສ້າງເນື້ອເຍື່ອໃໝ່ຂຶ້ນມາທົດແທນໃນພາກສ່ວນທີ່ຂາດຫາຍໄປ, ຄວບຄຸມການເຮັດວຽກໃຫ້ກັບອະໄວຍະວະ ພ້ອມທັງສ້າງພູມຕ້ານທານໃຫ້ແກ່ຮ່າງກາຍ, ເພີ່ມກ້າມຊີ້ນ, ຊ່ວຍໃຫ້ມີສຸຂະພາບແຂງແຮງຫລາຍຂຶ້ນກ່ວາເກົ່າ, ຮັກສາລະດັບນຳ້ຕານໃນເລືອດ ແລະ ມີປະໂຫຍດຕໍ່ລະບົບການສືບພັນຫລາຍ.
2. ກົດອະມິໂນ : ເປັນສານອາຫານທີ່ປະສົມຢູ່ໃນໂປຣຕິນ ອັນເປັນປັດໄຈສຳຄັນທີ່ເຂົ້າໄປສູ່ຂະບວນການຟື້ນຟູພາກສ່ວນເສື່ອມສະພາບ ຫລື ຕາມຈຸດຕ່າງໆພາຍໃນຮ່າງກາຍ ຊ່ວຍໃຫ້ເນື້ອເຍື່ອກັບມາສູ່ສະພາບປົກກະຕິ.
3. ວິຕາມິນ B1 : ໃຜວ່າວິຕາມິນຈະມີສະເພາະໃນຜັກ – ໝາກໄມ້ພຽງຢ່າງດຽວ ເພາະຊີ້ນໝູກໍມີສານອາຫານປະເພດນີ້ນຳ ໂດຍປະໂຫຍດຂອງວິຕາມິນ B1 ຈະຊ່ວຍແກ້ອາການຈັງຊາ, ມຶນຊາ, ກະຕຸ້ນການເຮັດວຽກຂອງລະບົບປະສາດ, ເພີ່ມກ້າມຊີ້ນໃຫ້ແຂງແຮງ, ຊ່ວຍບຳລຸງການເຮັດວຽກຂອງສະໝອງ, ປັບຄວາມດຸ່ນດ່ຽງການເຕັ້ນຂອງຫົວໃຈ ລວມເຖິງໃຜທີ່ມັກມີບັນຫາເມົາລົດ-ເມົາເຮືອ-ເມົາເຮືອບິນ ການກິນອາຫານທີ່ມີວິຕາມິນ B1 ເປັນປະຈຳຈະຊ່ວຍແກ້ອາການດັ່ງກ່າວໄດ້ດີ.
4. ວິຕາມິນ A : ເປັນວິຕາມິນທີ່ມີສ່ວນສຳຄັນຕໍ່ສາຍຕາ ເພາະຈະຊ່ວຍເລື່ອງການແນມເຫັນ ທັງຍັງມີສ່ວນຊ່ວຍກະຕຸ້ນພູມຕ້ານທານພາຍໃນຮ່າງກາຍ ໃຜທີ່ປ່ວຍເປັນປະຈຳ ເມື່ອຮ່າງກາຍມີວິຕາມິນ A ພຽງພໍ ກໍຈະເຮັດໃຫ້ສຸຂະພາບແຂງແຮງຫລາຍຂຶ້ນ, ສ້າງກະດູກ ແລະ ແຂ້ວໃຫ້ແຂງແຮງ, ປ້ອງກັນບັນຫາການຕິດເຊື້ອພາຍໃນລະບົບທາງເດີນອາຫານ.
5. ວິຕາມິນ B3 ຫລື ໄນອະຊິນ : ມີສ່ວນຊ່ວຍໃນເລື່ອງຂອງລະບົບທາງເດີນອາຫານ,​ ຮູ້ສຶກຈະເລີນອາຫານໃນການກິນແຕ່ລະຄາບຫລາຍຂຶ້ນ ທັງຍັງບຳລຸງປະສາດ, ນອນຫລັບງ່າຍຂຶ້ນກ່ວາເກົ່າ.
6. ຟົສຟໍ : ເຂົ້າໄປຟື້ນຟູພາກສ່ວນທີ່ເສື່ອມສະພາບຕ່າງໆພາຍໃນຮ່າງກາຍ, ແກ້ບັນຫາບາດເຈັບບໍລິເວນຂໍ້ ຫລື ຂໍ້ອັກເສບ ເປັນສານອາຫານທີ່ມີສ່ວນໃນການກະຕຸ້ນລະບົບເຜົາຜານ ພ້ອມສ້າງຄວາມຮູ້ສຶກໃນການໃຊ້ຊີວິດໃຫ້ສົດຊື່ນຫ້າວຫັນຫລາຍຂຶ້ນກ່ວາເກົ່າ ຮ່າງກາຍຕື່ນໂຕໄດ້ດີ.