ຜົວດຽວເມຍດຽວ ເປັນຊີວິດຄູ່ທີ່ດີທີ່ສຸດແລ້ວ

ການຮັກດຽວໃຈດຽວ ແມ່ນທາງເລືອກດຽວທີ່ຈະເຮັດໃຫ້ຊີວິດຄູ່ສະຫງົບສຸກ ແລະ ຮັກກັນຢ່າງຍາວນານ. ຫລາຍຄົນໄດ້ປ່າວປະກາດຢ່າງຈິງຈັງໃນຕອນຍັງເປັນບ່າວສາວວ່າ ຍຸກຂອງຜົວດຽວເມຍດຽວມັນຈົບໄປແລ້ວ ຍຸກຫລາຍຜົວຫລາຍເມຍກໍມາເຖິງແລ້ວ ໃຜຍັງຮັກສາສິນຂໍ້ 3 ຖືວ່າລ້າສະໄໝ, ບໍ່ຍອມຮັບຄວາມຈິງ, ນຳກະແສບໍ່ທັນ ເຊິ່ງສິ່ງທີ່ເກີດຂຶ້ນກໍຄື ສ່ວນຫລາຍຄົນທີ່ໃຊ້ຊີວິດຕາມຄວາມເຊື່ອແບບນັ້ນມັກຈະແກ່ໂຕລົງສູ່ຄວາມງຽບເຫງົາ ແລະ ຄວາມບໍ່ເຂົ້າໃຈ ວ່າຕົນເອງຜິດພາດແນວໃດ ເປັນຫຍັງຈຶ່ງຮູ້ສຶກຜິດປົກກະຕິ ຢູ່ເກືອບຕະຫລອດເວລາ, ຕັດເລື່ອງຄວາມຖືກຕ້ອງ, ຄວາມຜິດຖິ້ມ, ຕັດເລື່ອງສິນທຳອອກໄປ ເຫລືອແຕ່ເລື່ອງຂອງຄວາມຮູ້ສຶກທາງໃຈ ເຮົາຈະພົບວ່າໃຊ້ຊີວິດແນວໃດໄປດົນໆ ຄວາມຮູ້ສຶກທາງໃຈຈະເກີດຂຶ້ນຕາມນັ້ນ ເຊິ່ງກໍວັດເແທກໄດ້ຢ່າງດີວ່າ ອັນໃດແມ່ນ, ອັນໃດບໍ່ແມ່ນ ຖ້າເບິ່ງແຕ່ຫົວທີວ່າການໃຊ້ຊີວິດຄູ່ແມ່ນການປ່ຽນແປງໄປສູ່ໂຕຕົນທີ່ດີຂຶ້ນ ຊີວິດຄູ່ກໍຄືບົດຝຶກຫັດ ທີ່ຈະເອົາຄວາມເຫັນແກ່ໂຕອອກໄປ ແລ້ວເອົາຄວາມເຫັນອົກເຫັນໃຈຄົນອື່ນເຂົ້າມາ, ມີສະມາທິ, ມີຄວາມຕັ້ງໃຈໃສ່ຄົນຜູ້ດຽວ ຈົນກະທັ້ງເຫລືອໃຈດຽວ, ສະຫງົບໄດ້ກັບສິ່ງທີ່ຢູ່ຕໍ່ໜ້າ. ບໍ່ແມ່ນຫລາຍໃຈ ແລ່ນໄປແລ່ນມາກັບໃຜແດ່ກໍບໍ່ຮູ້, ແຕ່ຖ້າຄຳວ່າຊີວິດຄູ່ບໍ່ເຄີຍຢູ່ໃນຫົວ ມີແຕ່ຢ້ານຈະບໍ່ໄດ້ປ່ຽນແປງລົດຊາດ ອັນນັ້ນຈະນຳໄປສູ່ການບໍ່ມີໃຈຈິງໃຫ້ໃຜ, ບໍ່ມີສະມາທິທີ່ຈະຕັ້ງໃຈຢູ່ກັບໃຜ, ບໍ່ພັດທະນາຄວາມເຫັນອົກເຫັນໃຈໃຜ, ຈິດຈຶ່ງນິ້ງບໍ່ເປັນ, ເຫັນແຕ່ຄວາມວຸ້ນວາຍໃນກາມ ຈຶ່ງຢາກຈະມີຄວາມຮູ້ສຶກດີໆ ສະອາດໆໃຫ້ໂຕເອງ. ຄົນເຮົາບໍ່ມີທາງຮູ້ສຶກຖືກຕ້ອງຈາກການທຳຮ້າຍຈິດໃຈຄົນອື່ນໄປເລື້ອຍໆ, ບອກເລີກໃຜຕໍ່ໃຜໄປເລື້ອຍໆ ພຽງເພື່ອຈະພົບວ່າ ເຫລືອຕົນເອງຢູ່ຄົນດຽວ, ເປັນຄົນເກົ່າ, ຄິດແບບເກົ່າ, ເຫັນແກ່ໂຕເທົ່າເກົ່າ ຄືປ່ອຍໃຫ້ຊີວິດຜ່ານໄປ ບໍ່ໄດ້ພັດທະນາຈິດໃຈຂຶ້ນເລີຍ, ຈິດດິບແນວໃດກໍດິບແນວນັ້ນ ຫລື ຮ້າຍແຮງກ່ວານັ້ນແມ່ນບໍ່ເຫັນຊ່ອງທາງຈະແຈ້ງສະຫ່ວາງກ່ວາເກົ່າໄດ້ເລີຍແມ່ນແຕ່ໜ້ອຍດຽວ. ສຸດທ້າຍສິ່ງທີ່ຄິດວ່າເປັນສີສັນ ເຫລືອພຽງແຕ່ຄວາມຝັນທີ່ຈັບຕ້ອງບໍ່ໄດ້, ເປັນບ່ອນຍຶດຖືຂອງຈິດໃຈບໍ່ໄດ້ ໂດຍສະເພາະໃນຍາມເບື່ອໜ່າຍຄວາມຮູ້ສຶກທາງເພດແລ້ວ ຕ້ອງການຄວາມສະຫງົບສຸກທາງໃຈ ແລ້ວແນມໄປແນມມາ ກໍເຫັນແຕ່ໃຈທີ່ບໍ່ຈິງຂອງຕົນເອງ, ຈະແນມໄປຫາໃຜກໍເຫັນແຕ່ຄວາມຮູ້ສຶກທີ່ຊົ່ວຄັ້ງຊົ່ວຄາວທີ່ຜ່ານມາເພື່ອຈະຜ່ານໄປພຽງເທົ່ານັ້ນ ແລະ ປຽບດັ່ງວ່າເຫລືອເວລາບໍ່ພໍທີ່ຈະຮູ້ຈັກກັບຊີວິດແບບລົງຫລັກປັກຖານກັບໃຜໄດ້ຈັກເທື່ອ, ຖ້າຈະໄປບວດກໍບວດບໍ່ໄດ້ ຍ້ອນຮູ້ໂຕວ່າເປັນຄົນຂີ້ເຫງົາຊະນິດສາຍເກີນແກ້.

ຕອນເລືອກຄູ່ ທ່ານອາດບໍ່ຮູ້ວ່າຕົນເອງເລືອກຄູ່ພັດທະນາ ຫລື ຄູ່ເສື່ອມຖອຍກັນແທ້ໃນໄລຍະຍາວ, ແຕ່ການເລືອກທີ່ຈະຮັກສາຊີວິດຄູ່ ສຸດທ້າຍເຖິງຈະບໍ່ສຳເລັດ ເຖິງຈະລົ້ມເຫລວ ເຖິງຈະຕ້ອງແຍກທາງ ຢ່າງໜ້ອຍທ່ານກໍຜ່ານບົດຝຶກຫັດທີ່ຈະມີໃຈດຽວ ມີໃຈທີ່ບໍ່ຮູ້ສຶກຜິດປົກກະຕິ, ບໍ່ມີດວງຈິດທີ່ແຕກແຍກເປັນປ່ຽງໆ, ບໍ່ຕ້ອງຄິດຫລາຍ ຫລື ຄິດເຖິງໃຜຕໍ່ໃຜໃນທາງຕໍ່າຊົ່ວມົວໝອງມົ້ວໄປໝົດ.