ປິດຕຳນານ 42 ປີ ວໍນ໊ອກ ປະກາດວາງມືເຊົາຮັບວຽກຄຸມທີມບານເຕະ
ນິລ ວໍນ໊ອກ ຜູ້ຈັດການທີມປະສົບການຫລາຍ ເຈົ້າຂອງສະຖິຕິຄຸມທີມໃນບານເຕະອາຊີບຫລາຍທີ່ສຸດໃນອັງກິດ ປະກາດວາງມືເຊົາຮັບວຽກຜູ້ຈັດການທີມຮຽບຮ້ອຍໃນອາຍຸ 73 ປີ ຫລັງເປັນຜູ້ຈັດການທີມມາດົນ 42 ປີ ກັບ 16 ສະໂມສອນ.
ນິລ ວໍນ໊ອກ ຜູ້ຈັດການທີມຂອງວົງການບານເຕະອັງກິດ ປະກາດຢຸດເສັ້ນທາງການເຮັດວຽກເປັນຜູ້ຈັດການທີມແລ້ວ ເມື່ອວັນເສົາທີ່ຜ່ານມາ ດ້ວຍອາຍຸ 73 ປີ ໂດຍລະບຸວ່າ ນີ້ຄືເວລາທີ່ເຫມາະສົມແລວທີ່ຈະວາງມື ຫລັງຢູ່ໃນວົງການມາຍາວນານເຖິງ 42 ປີ ກັບ 16 ສະໂມສອນ.
ວໍນ໊ອກ ຫາກໍອຳລາຕຳແຫນ່ງຜູ້ຈັດການທີມ ມິດເດິລສະໂບ ທີມໃນເດິ ແຊ໊ມປຽນຊິບ ເມື່ອເດືອນພະຈິກປີກາຍ ແລະ ກາຍເປັນວຽກສຸດທ້າຍໃນຊີວິດການຄຸມທີມຂອງລາວນັ້ນ ກ່າວວ່າ : ‘‘ ຂ້ອຍພຽງຄິດວ່ານີ້ຄືເວລາທີ່ເຫມາະສົມແລ້ວ ເພາະຈາກນີ້ໄປຈົນຈົບລະດູການ ຄົງບໍ່ມີສະໂມສອນໃດສນໃຈຂ້ອຍໄປຄຸມທີມແລ້ວ ແຕ່ຊີວິດການເປັນຜູ້ຈັດການທີມຂອງຂ້ອຍກໍດີທີ່ສຸດແລ້ວ ຂ້ອຍມ່ວນກັບສິ່ງທີ່ຂ້ອຍເຮັດມາຕະຫລອດຫລາຍສິບປີ ແລະ ຈາກນີ້ໄປຂ້ອຍຈະມີເວລາຫລາຍໃຫ້ກັບຄອບຄົວ ລວມເຖິງຈະມີເວລາໄປຂີ່ລົດຖີບອອກກຳລັງກາຍຫລາຍຂຶ້ນ ’’.
ສຳລັບ ວໍນ໊ອກ ນັ້ນເລີ່ມຮັບງານເປັນຜູ້ຈັດການທີມກັບສະໂມສອນເກນໂບໂຣ ທຣີນີຕີ ແລະ ເບີຕັນ ອັນບຽນ ກ່ອນຈະພາ ສະຄາໂບໂຣ ເລື່ອນຊັ້ນໄປຫລິ້ນບານເຕະລີກອາຊີບເປັນຄັ້ງທຳອິດໃນລະດູການ 1986-87 ລວມເຖິງພາ ນ໊ອດ ເຄົາຕີ ເລື່ອນຊັ້ນສູ່ ດີວີຊັນ 1 ແຕ່ກ່ອນເຊິ່ງເປັນລີກສູງສຸດໃນລະດູການ 1991-92 ລວມເຖິງເຄີຍພາທີມເລື່ອນຊັ້ນທັງຫມດ 8 ຄັ້ງ ແລະ ເຄີຍນຳ ເຊຟຟິລ ຢູໄນເຕັດ, ຄວີນປາກ ເຣນເຈີ ແລະ ຄາດິບ ຊິຕີ ເລື່ອນຊັ້ນຂຶ້ນພຣີເມຍລີກ ມາແລ້ວ ໂດຍລວມແລ້ວ ຕະຫລອດຊີວິດການເປັນຜູ້ຈັດການທີມ ລາວຄຸມທີມລົງສະຫນາມໄປຫລາຍກວ່າ 1,600 ເກມ ເປັນເຈົ້າຂອງສະຖິຕິຄຸມທີມລົງຫລິ້ນໃນບານເຕະອາຊີບຫລາຍທີ່ສຸດໃນອັງກິດ.
