ໂມເດິນາ ຮຽກຄືນວັກຊີນປ້ອງກັນໂຄວິດ ຫລາຍກວ່າ 7 ແສນໂດສໃນເອີຣົບ ຫລັງພົບສິ່ງແປກປອມປົນເປື້ອນ

ໂມເດິນາຮຽກຄືນວັກຊີນປ້ອງກັນໂຄວິດ-19 ຫລາຍກວ່າ 7 ແສນໂດສໃນເອີຣົບ ຫລັງພົບສິ່ງແປກປອມປົນເປື້ອນຢູ່ໃນວັກຊີນແກ້ວໜຶ່ງໃນຊຸດດຽວກັນ.

ວັນທີ 9 ເມສາ 2022, ສຳນັກຂ່າວຣອຍເຕີລາຍງານວ່າ: ໂມເດິນາ ອິງ ຜູ້ຜະລິດຢາລາຍໃຫຍ່ຂອງອາເມລິກາ ເປີດເຜີຍໃນວັນທີ 8 ເມສາວ່າ: ບໍລິສັດກຳລັງຮຽກຄືນວັກຊີນປ້ອງກັນໂຄວິດ-19 ຂອງໂມເດິນາຈຳນວນ 764.900 ໂດສ ທີ່ຜະລິດໂດຍບໍລິສັດ Rovi ຫລັງພົບສິ່ງແປກປອມຂະໜາດນ້ອຍໃນແກ້ວວັກຊີນແກ້ວໜຶ່ງ.

ເຖິງຢ່າງໃດກໍຕາມ, ປັດຈຸບັນຍັງບໍ່ມີການລະບຸເຖິງບັນຫາດ້ານຄວາມປອດໄພຂອງວັກຊີນຊຸດນີ້ ເຊິ່ງຖືກສົ່ງໄປຈຳໜ່າຍຢູ່ນອກແວ, ໂປໂລຍ, ປອກຕຸຍການ, ແອັສປາຍ ແລະ ສະວີເດນ ໃນເດືອນມັງກອນຜ່ານມາ.

ໂມເດິນາລະບຸວ່າ: ມີການກວດພົບສິ່ງແປກປອມໃນວັກຊີນພຽງແກ້ວດຽວ, ແຕ່ບໍລິສັດໄດ້ດຳເນີນການຮຽກຄືນວັກຊີນໃນຊຸດດຽວກັນທັງໝົດ ດ້ວຍຄວາມລະມັດລະວັງຢ່າງຍິ່ງ ໂດຍບໍ່ມີການເປີດເຜີຍວ່າສິ່ງແປກປອມທີ່ພົບນັ້ນຄືຫຍັງ.

ທັງນີ້, ໃນປີຜ່ານມາ ຍີ່ປຸ່ນເຄີຍປະກາດໂຈະນຳໃຊ້ວັກຊີນຂອງໂມເດິນາດ້ວຍເຫດຜົນວ່າມີການກວດພົບສິ່ງແປກປອມພາຍໃນແກ້ວເຊັ່ນດຽວກັນ, ຈາກນັ້ນໂມເດິນາກໍໄດ້ຮຽກຄືນວັກຊີນຊຸດດັ່ງກ່າວ ຫລັງຈາກໄດ້ກວດສອບແລ້ວວ່າພົບການປົນເປື້ອນຂອງສະແຕນເລສຢູ່ໃນວັກຊີນບາງແກ້ວ.

ປັດຈຸບັນ, ວັກຊີນປ້ອງກັນໂຄວິດ-19 ຂອງໂມເດິນາ ໄດ້ຖືກນຳໄປໃຊ້ເປັນວົງກວ້າງທົ່ວໂລກ ໂດຍມີການສັກໃຫ້ປະຊາກອນໃນປະເທດຕ່າງໆແລ້ວຫລາຍກວ່າ 900 ລ້ານໂດສ.

ສ່ວນໂມເດິນາຍັງຢືນຢັນວ່າ: ທາງບໍລິສັດບໍ່ຄິດວ່າສິ່ງແປກປອມທີ່ພົບຢູ່ໃນແກ້ວວັກຊີນພຽງແກ້ວດຽວນັ້ນ ຈະກໍ່ໃຫ້ເກີດຄວາມສ່ຽງຕໍ່ວັກຊີນແກ້ວອື່ນໆໃນຊຸດດຽວກັນ.

ອ້າງອີງ:

https://www.reuters.com/…/moderna-recalls-thousands…/

https://www.channelnewsasia.com/…/moderna-recalls…