ດ່ານບ້ານມອມເມືອງສິງມອບໄມ້ຜິດລະບຽບຫລາຍກວ່າ 3.700 ແມັດກ້ອນໃຫ້ເຈົ້າໜ້າທີ່
ເມື່ອບໍ່ດົນມານີ້, ເຈົ້າໜ້າທີ່ຕຳຫລວດກວດຄົນເຂົ້າ-ອອກເມືອງ (ຕມ) ປະຈຳດ່ານບ້ານມອມເມືອງສິງແຂວງຫລວງນ້ຳທາ, ໄດ້ມອບໄມ້ດູ່ທີ່ຜິດລະບຽບກົດໝາຍຫລາຍກວ່າ 3.700 ແມັດກ້ອນ ແລະ ລົດຕຸກໆ 3 ລໍ້ອີກ 4 ຄັນທີ່ໃຊ້ເຂົ້າໃນການຂົນສົ່ງລໍາລຽງໄມ້ຈໍານວນດັ່ງກ່າວໃຫ້ແກ່ເຈົ້າໜ້າທີ່ກວດກາປ່າໄມ້ແຂວງຫລວງນໍ້າທາ ເພື່ອເປັນຫລັກຖານປະກອບສໍານວນຄະດີຂອງຜູ້ກະທໍາຜິດຕາມລະບຽບກົດໝາຍ.
ທ່ານພັນຕີ ສຸລິວັນ ຍົມມະນີ ຮັກສາການຫົວໜ້າດ່ານ ຕມ ບ້ານມອມ ໃຫ້ຮູ້ວ່າ: ໄມ້ຈໍານວນດັ່ງກ່າວແມ່ນກໍາລັງເຈົ້າໜ້າທີ່ຂອງຕົນສາມາດຢຶດໄດ້ຢູ່ຈຸດກວດກາເຂດຫ້ວຍນໍ້າຢວນເມືອງສິງ ແລະ ສາມາດຈັບຕົວຜູ້ກະທໍາຜິດໄດ້ 6 ຄົນຄື: ທ້າວ ມືເພາະ ອາຍຸ 42 ປີຢູ່ບ້ານຊຽງໃຈ, ທ້າວ ໂລລື ອາຍຸ 43 ປີ, ທ້າວ ອາຊາ ອາຍຸ 38 ປີຢູ່ບ້ານຫ້ວຍລອງເກົ່າ, ທ້າວ ຕີລໍ ອາຍຸ 38 ປີຢູ່ບ້ານລໍມືເມືອງສິງ ແຂວງຫລວງນ້ຳທາ, ທ້າວ ສີຕົງຟາງ ອາຍຸ 39 ປີ ແລະ ທ້າວ ຫວງຊາງ ອາຍຸ 25 ປີສັນຊາດຈີນຢູ່ບ້ານປາລີນຈາຍເມືອງຢວນ ສປຈີນ.
ຜ່ານການສືບສວນ-ສອບສວນຂອງເຈົ້າໜ້າທີ່ພວກເຂົາຮັບສາລະພາບວ່າ: ໄດ້ຮັບຈ້າງໃຫ້ຂົນສົ່ງໄມ້ດັ່ງກ່າວມາແຕ່ບ້ານຫ້ວຍລອງເກົ່າເມືອງສິງ ເພື່ອສົ່ງອອກໄປຈີນ, ແຕ່ຖືກເຈົ້າໜ້າທີ່ຈັບຕົວເສຍກ່ອນ.
