ລົດເກັບຂີ້ເຫຍື້ອບໍ່ມາຕາມນັດ ມັນຂັດກັບທິດ “ສີຂຽວ ຍືນຍົງ”

ໂດຍ: ມຶກບໍ່ແຫ້ງ

ລົດຂີ້ເຫຍື້ອບໍ່ມາຕາມນັດ ການກຳຈັດຂີ້ເຫຍື້ອຂອງປະຊາຊົນກໍຫຍຸ້ງຍາກ ເຊິ່ງເປັນການສວນທາງຂອງ ນະໂຍບາຍທີ່ຫ້າມປະຊາຊົນ ຈູດຂີ້ເຫຍື້ອຊະຊາຍ ທີ່ຈະປ່ອຍທາດອາຍມີພິດຂຶ້ນສູ່ບັນຍາກາດ. ບັນຫາການຈູດຂີ້ເຫຍື້ອໃນຕົວເມືອງ ໂດຍສະເພາະເມືອງໃຫຍ່ເຊັ່ນ ນະຄອນຫຼວງວັນຈັນຖືກຫ້າມ ໂດຍມີແຈ້ງການຂອງເຈົ້າຄອງນະຄອນຫຼວງວຽງຈັນໃນປີ 2019 ເນື່ອງຈາກການຈູດຂີ້ເຫຍື້ອໄດ້ສ້າງມົນລະພິດທາງອາກາດອ່າວຮ້າຍແຮງໃນຍາມລະດູແລ້ງ ບວກໃສ່ປະຊາຊົນເຂດຊານເມືອງ ແລະ ຊົນນະບົດໄດ້ຈູດ ເພື່ອແຜ້ວຖາງເນື້ອທີ່ກະສິກຳເຮັດໃຫ້ຄຸນນະພາບທາງອາກາດຂອງນະຄອນຫຼວງວຽງຈັນບໍ່ຄ່ອຍດີ.

ໃນຕົ້ນປີນີ້ ການເກີດໄຟໄໝ້ສະໜາມຂີ້ເຫຍື້ອ ທີ່ຫ່າງຈາກນະຄອນຫຼວງວຽງຈັນໄປທາງທິດໃຕ້ 32 ກິໂລ ແມັດ ໄດ້ສ້າງມົນລະພິດທາງອາກາດຢ່າງຮ້າຍແຮງຕໍ່ປະຊາຊົນ ທີ່ອາໄສຢູ່ເຂດໃກ້ຄຽງ ແລະ ກາຍເປັນ ໝອກຄວັນຄຸມທົ່ວນະຄອນຫຼວງວຽງຈັນ. ນີ້ແມ່ນໄພອັນຕະລາຍຕໍ່ສຸຂະພາບ ໂດຍສະເພາະ ເດັກນ້ອຍ, ຜູ້ເຖົ້າທີ່ມີຄວາມສ່ຽງສຸຂະພາບຫຼາຍກວ່າໄວອາຍຸອື່ນໆ.

ຈາກແຈ້ງການຫ້າມຈູດຂີ້ເຫຍື້ອ, ໄຟໄໝ້ສະໜາມຖິ້ມຂີ້ເຫຍື້ອຈົນສູ່ຈຸດທີ່ວ່າ ລົດເກັບຂີ້ເຫຍື້ອທີ່ໄດ້ດຳເນີນການໂດຍບໍລິສັດເອກະຊົນ ເຊັນສັນຍາ ກັບປະຊາຊົນ ໂດຍໄດ້ຮັບອະນຸຍາດຈາກພາກສ່ວນກ່ຽວຂ້ອງຂອງລັດນັ້ນ ບໍ່ສາມາດເກັບຂີ້ເຫຍື້ອໄດ້ໝົດຕາມເວລາທີ່ຕົກລົງກັນເປັນເວລາດົນຕິດຕໍ່ກັນສອງສາມອາທິດທັງທີ່ປະຊາຊົນເສຍເງິນເກັບຂີ້ເຫຍື້ອເປັນປົກກະຕິ ໄດ້ເຮັດໃຫ້ມີຫາງສຽງຈົ່ມວ່າຈາກສັງຄົມຢ່າງກວ້າງຂວາງ.

ປະຊາຊົນມີຄວາມເປັນຫ່ວງໂດຍສະເພາະຄຸນນະພາບການບໍລິການສາທາລະນະເຊັ່ນນີ້ ເຊິ່ງມັນກົງກັນ ຂ້າມກັບທິດທາງນະໂຍບາຍການສ້າງຕົວເມືອງ ໂດຍສະເພາະນະຄອນຫຼວງວຽງຈັນໃຫ້ກາຍເປັນເມືອງ ສີ ຂຽວ ສະອາດ ແລະ ສວນທາງກັບທິດທາງທີ່ຢາກໃຫ້ປະຊາຊົນ ໃຊ້ບໍລິການລົດເກັບຂີ້ເຫຍື້ອເພື່ອຫຼຸດຜ່ອນອັດຕາການຈູດຂີ້ເຫຍື້ອໃນເຂດຊຸມຊົນນະຄອນຫຼວງໃຫ້ໜ້ອຍລົງ.

ເມື່ອການບໍລິການບໍ່ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ແລະ ຂາດການແກ້ໄຂສຸກເສີນທີ່ທັນການນັ້ນ ເຮັດໃຫ້ຄວາມເຊື່ອໝັ້ນການບໍລິການການເກັບຂີ້ເຫຍື້ອຂອງປະຊາຊົນຫຼຸດລົງ ແລະອາດນຳໄປສູ່ການເຊົາໃຊ້ບໍລິການ ແລະ ຈູດຂີ້ເຫຍື້ອຊະຊາຍຕື່ມອີກ. ສະນັ້ນ, ການແກ້ໄຂບັນຫາການເກັບຂີ້ເຫຍື້ອສະເພາະໜ້າ ທີ່ທັນການມີຄວາມຈຳເປັນຢ່າງຍິ່ງ, ບາງບ້ານ ສອງສາມອາທິດ ທີ່ມີຂີ້ເຫຍື້ອກອງກັນເດຍລະດາດຢູ່ໜ້າເຮືອນທັງມີກິ່ນເໝັນ ເຊິ່ງສ້າງຄວາມບໍ່ໂສພາ ໃຫ້ບ້ານເມືອງເຮົາ.

ເມື່ອເກີດບັນຫານີ້ ເຊື່ອໝັ້ນວ່າພາກສ່ວນກ່ຽວຂ້ອງພວມຮີບຮ້ອນປັບປຸງລະບົບການບໍລິການ ບໍ່ສະເພາະແຕ່ໄລຍະສັ້ນ ແຕ່ສ້າງລະບົບການບໍລິການທີ່ມີຄຸນນະພາບໃນໄລຍະຍາວ ເພື່ອຂະຫຍາຍເຂດການບໍລິ ການຕື່ມອີກໃນນະຄອນຫຼວງວຽງຈັນ ແລະ ແຂວງອື່ນໆ.

ບັນຫາຂີ້ເຫຍື້ອບໍ່ແມ່ນເລື່ອງທີ່ເວົ້າກາຍຫູອີກແລ້ວ, ຖ້າການບໍລິການ ທີ່ໄຮ້ປະສິດທິພາບ ປະສິດທິຜົນໃນເຂດຕົວເມືອງແລ້ວ ຄວາມຫວັງທີ່ພວກເຮົາຈະເຫັນສອງຂ້າງເສັ້ນທາງຫຼວງແຫ່ງຊາດ ປາສະຈາກຂີ້ເຫຍື້ອ ນັ້ນຄົງໄກ?