ອິນເດຍພົບຜູ້ຕິດເຊື້ອໂຄວິດ-19 “ໂອມິຄຣອນ XE” ຄົນທຳອິດ
ວັນທີ 6 ເມສາ 2022, ສຳນັກຂ່າວຊິນຮົວລາຍງານວ່າ: ສື່ອິນເດຍອ້າງອີງເຈົ້າໜ້າທີ່ສາທາລະນະສຸກທ້ອງຖິ່ນ ລາຍງານການກວດພົບຜູ້ຕິດເຊື້ອໄວຣັສໂຄໂຣນາສາຍພັນໃໝ່ທີ່ສ້າງພະຍາດໂຄວິດ-19 ຊະນິດກາຍພັນ ສາຍພັນໂອມິຄຣອນ ເອັກອີ (Omicron XE) ຄົນທຳອິດຂອງອິນເດຍ.
ລາຍງານລະບຸວ່າ: ຜູ້ຕິດເຊື້ອພະຍາດໂຄວິດ-19 ເພດຍິງຄົນດັ່ງກ່າວເດີນທາງຈາກອາຟຣິກາໃຕ້ມານະຄອນມຸມໄບ ເມືອງຫລວງທາງການເງິນຂອງອິນເດຍ ໃນວັນທີ 10 ກຸມພາຜ່ານມາ ໂດຍປັດຈຸບັນຍັງບໍ່ສະແດງອາການປ່ວຍຮຸນແຮງແຕ່ຢ່າງໃດ.
ເຈົ້າໜ້າທີ່ສາທາລະນະສຸກກ່າວວ່າ: ມີການເກັບຕົວຢ່າງສານຄັດຫລັ່ງໃນມຸມໄບ ຈຳນວນ 230 ລາຍການ ແລະ ພົບຜູ້ຕິດເຊື້ອໄວຣັສໂຄໂຣນາ ສາຍພັນໂອມິຄຣອນ 228 ຄົນ, ສາຍພັນຄັບປາ 1 ຄົນ ແລະ ສາຍພັນໂອມິຄຣອນ ເອັກອີ 1 ຄົນ.
ທັງນີ້, ເຊື້ອໄວຣັສໂຄໂຣນາ ສາຍພັນໂອມິຄຣອນ ເອັກອີ ມີທ່າອ່ຽງລະບາດງ່າຍຂຶ້ນປະມານ 10% ເມື່ອທຽບໃສ່ສາຍພັນໂອມິຄຣອນ ສາຍພັນຍ່ອຍບີເອ.2 (BA.2) ເຊິ່ງແພ່ລະບາດໄດ້ງ່າຍທີ່ສຸດໃນປັດຈຸບັນ.
