ຫົວໜ້າ ຄະນະພົວພັນຕ່າງປະເທດສູນກາງພັກ ຕ້ອນຮັບທູດຝຣັ່ງ

ໃນວັນທີ 7 ເມສາ ນີ້ ທີ່ ສຳນັກງານຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ຊິວ-ແລັງ ຊູອອກ (Siv-Leng CHHUOR) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ ຝຣັ່ງ ປະຈໍາ ສປປ ລາວ ຄົນໃໝ່.

ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຊົມເຊີຍທ່ານທູດທີ່ຖືກແຕ່ງຕັ້ງມາປະຕິບັດໜ້າທີ່ຢູ່ ສປປ ລາວ, ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສ ຝຣັ່ງ ຕະຫຼອດໄລຍະເກືອບເຈັດທົດສະວັດ (1953-2022) ແຫ່ງການສ້າງສາຍພົວພັນການທູດນຳກັນຜ່ານມາ, ສະແດງຄວາມຂອບໃຈຕໍ່ການສະໜັບສະໜູນ ແລະ ຊ່ວຍເຫຼືອຂອງລັດຖະບານຝຣັ່ງໃນໄລຍະຜ່ານມາ ຊຶ່ງໄດ້ປະກອບສ່ວນສຳຄັນເຂົ້າໃນການສ້າງສາພັດທະນາ ສປປ ລາວ. ພ້ອມກັນນັ້ນ, ໄລຍະການແຜ່ລະບາດຂອງພະຍາດໂຄວິດ-19 ລັດຖະບານ ແລະ ປະຊາຊົນຝຣັ່ງ ຍັງໄດ້ຊ່ວຍເຫຼືອຢາວັກຊິນ, ຊ່ວຍເຫຼືອດ້ານອາຫານໃຫ້ແກ່ແພດໝໍ ແລະ ຄົນເຈັບທີ່ຕິດເຊື້ອພະຍາດໂຄວິດ-19 ຢູ່ ບາງໂຮງໝໍຂອງ ສປປ ລາວ.

ພ້ອມທັງເຊື່ອໝັ້ນວ່າ ໃນໄລຍະທ່ານທູດມາປະຕິບັດໜ້າທີ່ຢູ່ ສປປ ລາວ ຈະມີການຮ່ວມມືກັນຢ່າງໃກ້ຊິດກັບຂະແໜງການຕ່າງໆຂອງ ສປປ ລາວ ເພື່ອສົ່ງເສີມການພົວພັນຮ່ວມມືສອງຝ່າຍ ໃຫ້ນັບມື້ກວ້າງຂວາງ ແລະ ເປັນຮູບປະທໍາຫຼາຍຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຝຣັ່ງ.

ທ່ານ ນາງ Siv-Leng CHHUOR ໄດ້ສະແດງຄວາມຂອບໃຈຢ່າງຈິງໃຈຕໍ່ ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງຊົມເຊີຍຜົນສຳເລັດຂອງ ສປປ ລາວ ໃນການປົກປັກຮັກສາ ແລະ ການສ້າງສາພັດທະນາປະເທດຕະຫຼອດໄລຍະ 46 ປີ ທີ່ຜ່ານມາ, ພິເສດແມ່ນການຮັບມືກັບການແຜ່ລະບາດຂອງເຊື້ອພະຍາດ ໂຄວິດ-19 ຢູ່ ສປປ ລາວ. ພ້ອມນັ້ນ, ທ່ານທູດໄດ້ຢືນຢັນວ່າ ຈະຮ່ວມມືກັບພາກສ່ວນກ່ຽວຂ້ອງຂອງລາວເພື່ອປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມືສອງຝ່າຍ ລວມທັງຈະສືບຕໍ່ຍົກສູງການຮ່ວມມື ໃນຂອບຝຣັ່ງໂກໂຟນນີ (Francophonie) ເພື່ອສົ່ງເສີມການສຶກສາ ແລະ ວັດທະນະທຳ ລະຫວ່າງ ສ ຝຣັ່ງ ແລະ ສປປ ລາວ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ.

ໃນຕອນທ້າຍ, ທ່ານ ທອງສະຫວັນ ພົມວິຫານ ໄດ້ອວຍພອນໃຫ້ແກ່ ທ່ານ ນາງ Siv-Leng CHHUOR ຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນການປະຕິບັດໜ້າທີ່ການທູດອັນມີກຽດສູງສົ່ງຂອງຕົນ ຢູ່ ສປປ ລາວ.