ແລມພາດ ຍັງສູ້, ເຖິງຈະຖືກແຟນບານເອຟເວີຕັນໄລ່ກໍຕາມ

ແຟຣັງ ແລມພາດ ຜູ້ຈັດການທີມຫນຸ່ມຂອງ ເອຟເວີຕັນ ຍອມຮັບວ່າ ປະເດັນຫລັກຂອງຜົນງານຕົກຕຳ່ໃນເວລານີ້ເປັນເລື່ອງຂອງຄວາມເຊື່ອຫມັ້ນ ຫລັງຈາກທີ່ບຸກໄປເສຍໃຫ້ ເບີນລີ 3-2 ໃນເກມພຣີເມຍລີກອັງກິດ ເຮັດໃຫ້ເອຟເວີຕັນຢຸດທີ່ 25 ຄະແນນ ຄອງອັນດັບ 17 ນຳຫນ້າເບີນລີ ທີມອັນດັບ 18 ຢູ່ພຽງຄະແນນດຽວ.

ເອຟເວີຕັນ ທີ່ບໍ່ເຄີຍຕົກຊັ້ນນັບຕັ້ງແຕ່ປີ 1951 ຊະນະພຽງ 2 ເກມ ຈາກ 9 ເກມ ນັບຕັ້ງແຕ່ອະດີດຕຳນານ ແລະ ຜູ້ຈັດການທີມເຊລຊີ ແລມພາດ ຖືກຕົວເຂົ້າມາ ຫລັງເກມ ແລມພາດກ່າວວ່າ : ‘‘ ໃນແງ່ຂອງຜົນງານໂດຍລວມ ເຮົາຫລິ້ນໄດ້ດີ ແຕ່ປະຕູທີ່ເສຍເຮົາບໍ່ຄວນເສຍ ທຸກຢ່າງເປັນຄວາມທ້າທາຍ ເຮົາຕ້ອງຢູ່ໃນລີກຕໍ່ໄປ ເຮົາຍັງມີອີກ 9 ເກມ 27 ຄະແນນ ຂ້ອຍຈະສູ້ ເຮົາຈະທຸ່ມເທທຸກຢ່າງ ’’.

ແຕ່ຂະນະດຽວກັນ ແຟນບານເອຟເວີຕັນ ຈຳນວນຫລາຍໃນໂລກອອນໄລ ໂດຍສະເພາະໃນທະວິດເຕີ ພາກັນຮຽກຮ້ອງໃຫ້ໄລ່ ແລມພາດ ອອກຈາກຕຳແຫນ່ງ ແຕ່ກໍມີບາງຈຳນວນທີ່ຍັງສະຫນັບສະຫນູນວ່າຄວນໃຫ້ໂອກາດແລມພາດຕໍ່ໄປ.