ສະຫາຍ ນາຍົກຕ້ອນຮັບຄະນະຜູ້ແທນຂັ້ນສູງນະຄອນຫຼວງຮ່າໂນ້ຍ ສສ ຫວຽດນາມ
April 5, 2022 - 12:30 PM
ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ຄະນະຜູ້ແທນຂັ້ນສູງ ນະຫຼວງຮ່າໂນ້ຍ ສສ ຫວຽດນາມ ນຳໂດຍ ສະຫາຍ ດິ່ງ ຕຽນ ຢຸງ ກຳມະການກົມການເມືອງສູນກາງພັກ ເລຂາຄະນະພັກນະຄອນຫຼວງ ຮ່າໂນ້ຍ ສສ ຫວຽດນາມ ພ້ອມຄະນະ ເຂົ້າຢ້ຽມຂ່ຳນັບເມື່ອວັນທີ 4 ເມສາ ນີ້ ທີ່ຫ້ອງຮັບແຂກ ສຳນັກງານນາຍົກລັດຖະມົນຕີ, ໃນໂອກາດທີ່ ສະຫາຍ ດິ່ງ ຕຽນ ຢຸງ ພ້ອມຄະນະ ເດີນທາງມາຢ້ຽມຍາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 3-5 ເມສາ 2022.
ໃນໂອກາດດັ່ງກ່າວ ນາຍົກລັດຖະມົນຕີ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງ ຕໍ່ ສະຫາຍ ດິ່ງ ຕຽນ ຢຸງ ພ້ອມຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ໂດຍສະເພາະມາຮ່ວມເຮັດວຽກກັບຄະນະພັກ, ຄະນະນຳນະຄອນຫຼວງວຽງຈັນ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງລາວ-ຫວຽດນາມ ເວົ້າລວມ, ເວົ້າສະເພາະ ກໍຄື ສອງນະຄອນຫຼວງ ນະຄອນຫຼວງວຽງຈັນ ສປປ ລາວ ແລະ ນະຄອນຫຼວງຮ່າໂນ້ຍ ສສ ຫວຽດນາມ ທີ່ມີມາແຕ່ດົນນານ ແລ້ວນັ້ນ ໃຫ້ນັບມື້ແຕກດອກອອກຜົນຍິ່ງໆຂຶ້ນ.
ສະຫາຍ ນາຍົກລັດຖະມົນຕີ ຍັງໄດ້ອອຍພອນ ໃຫ້ ສະຫາຍ ດິ່ງ ຕຽນ ຢຸງ ພ້ອມຄະນະ ຈົ່ງປະສົບຜົນສຳເລັດໃນການມາຢ້ຽມຍາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ.
ສະຫາຍ ດິ່ງ ຕຽນ ຢຸງ ໄດ້ສະແດງຄວາມຂອບໃຈຕໍ່ ສະຫາຍ ນາຍົກລັດຖະມົນຕີ ແຫ່ງ ສປປ ລາວ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມນີ້ ຍັງໄດ້ແຈ້ງຈຸດປະສົງໃນການມາຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສະເພາະແມ່ນຜົນຂອງການເຮັດວຽກຮ່ວມກັບຄະນະພັກ ແລະ ຄະນະນຳຂອງນະຄອນຫຼວງວຽງຈັນ ໃຫ້ ສະຫາຍ ນາຍົກໄດ້ຮັບຊາບ.
