ເສດຖະກິດການເງິນຂອງ ອາຊຽນ+3 ຂະຍາຍຕົວຢູ່ໃນລະດັບ 6,7%, ອັດຕາເງິນເຟີ້1,2 %
ໃນທ້າຍອາທິດຜ່ານມາ, ຄະນະຜູ້ແທນຂອງກະຊວງການເງິນ, ໂດຍການຕາງໜ້າຂອງທ່ານ ວົງຄໍາແຫງ ວົງທະຈັກ ຫົວໜ້າກົມການເງິນຕ່າງປະເທດ ກະຊວງການເງິນ, ພ້ອມດ້ວຍຄະນະເຂົ້າຮ່ວມກອງປະຊຸມຮອງລັດຖະມົນຕີ ແລະ ຮອງຜູ້ວ່າການທະນາຄານກາງອາຊຽນ+ 3 ແບບທາງໄກ, ພາຍໃຕ້ການເປັນປະທານຮ່ວມລະຫວ່າງປະເທດກໍາປູເຈຍ ແລະ ສປ ຈີນ, ຊຶ່ງເປັນກອງປະຊຸມປຶກສາຫາລືຄວາມຄືບໜ້າຂອງການຄົ້ນຄວ້າວຽກງານການຮ່ວມມືດ້ານການເງິນອາຊຽນ+3 ແລະ ຄົ້ນຄວ້າທົບທວນເສດຖະກິດມະຫາພາກຂອງພາກພື້ນອາຊຽນ+3.
ກອງປະຊຸມຄັ້ງນີ້, ໄດ້ຮັບຟັງການລາຍງານການຕີລາຄາສະພາບ ແລະ ການຄາດຄະເນການຂະຫຍາຍຕົວຂອງເສດຖະກິດມະຫາພາກ (Economic Outlook) ຂອງພາກພື້ນ ແລະ ຍຸດທະສາດການເຕີບເຕີຂອງອາຊຽນ+3 ໃນໄລຍະການແຜ່ລະບາດຂອງພະຍາດໂຄວິດ-19 ໂດຍອົງການຕິດຕາມເສດຖະກິດມະຫາພາກອາຊຽນ+3 (AMRO), ໂດຍໃນປີ 2021 ໄດ້ຄາດຄະເນເສດຖະກິດພາກພື້ນອາຊຽນຂະຫຍາຍຕົວໃນລະດັບ 2,9 ສ່ວນຮ້ອຍ ແລະ ອັດຕາເງິນເຟີ້ຢູ່ໃນລະດັບ 2,5 ສ່ວນຮ້ອຍ; ອາຊຽນ+3 ຂະຍາຍຕົວຢູ່ໃນລະດັບ 6,7 ສ່ວນຮ້ອຍ ແລະ ອັດຕາເງິນເຟີ້ຢູ່ໃນລະດັບ 1,2 ສ່ວນຮ້ອຍ; ສຳລັບເສດຖະກິດສປປ ລາວ ໂດຍຄາດວ່າຈະຂະຫຍາຍຕົວໃນລະດັບ 2,6%, ເງິນເຟີ້ ແມ່ນສະເລ່ຍຢູ່ໃນລະດັບ 3,8%, ຄາດຄະເນການເຕີບໂຕຂອງສປປ ລາວ ໃນປີ 2022 ແມ່ນຈະຢູ່ໃນລະດັບ 3,9%, ໃນຂະນະທີ່ເງິນເຟີຢູ່ໃນລະດັບ 5.0%.
ນອກນັ້ນ,ກອງປະຊຸມຍັງໄດ້ຮັບຟັງການລາຍງານຄວາມຄືບໜ້າຂອງການຄົ້ນຄວ້າ, ປຶກສາຫາລື ແລະ ຮັບຮອງເອົາບັນຫາກ່ຽວກັບການຮ່ວມມືດ້ານການເງິນອາຊຽນ+3 (ASEAN+3 Financial Process) ຈຳນວນໜຶ່ງ ເປັນຕົ້ນ: ການຈັດຕັ້ງປະຕິບັດຂໍ້ລິເລີ່ມຊຽງໃໝ່ເປັນກົນໄກຫຼາຍຝ່າຍ (Chiang Mai Initiative Multilate ralization-CMIM), ຊຶ່ງເປັນກົນໄກການປ້ອງກັນຄວາມສ່ຽງທາງດ້ານການເງິນຂອງພາກພື້ນອາຊຽນ+3 (Reg ional Financial Safety Net) ໂດຍຈະມາຮັບໃຊ້ໃນການແກ້ໄຂສະພາບຄ່ອງເງິນຕາຕ່າງປະເທດ ແລະ ດຸນຊໍາລະເງິນລະຫວ່າງປະເທດ (ໃນນັ້ນ, ໄດ້ປຶກສາຫາລືກ່ຽວກັບການນໍາໃຊ້ສະກຸນເງິນທ້ອງຖິ່ນ; ການຄິດໄລ່ອັດຕາດອກເບ້ຍ; ການກໍານົດອັດຕາດອກເບ້ຍ ແລະ ອື່ນໆ).
ການບໍລິຫານອົງການຕິດຕາມເສດຖະກິດມະຫາພາກອາຊຽນ+3 (ASEAN+3 Macroeconomic Research Office: AMRO); ວຽກງານຂໍ້ລິເລີ່ມພັດທະນາຕະຫຼາດພັນທະບັດອາຊີ (Asian Bond Market Initiative – ABMI), ຊຶ່ງມີເປົ້າໝາຍໃນການຊຸກຊູ້ການອອກພັນທະບັດທ້ອງຖິ່ນ; ແລະ ວຽກງານຂໍ້ລິເລີ່ມໃໝ່ການຮ່ວມມືໃນອະນາຄົດຂອງອາຊຽນ+3 (ASEAN+3 Future Initiative).
ໂອກາດນີ້, ຄະນະຜູ້ແທນກະຊວງການເງິນກໍໄດ້ມີຄວາມຮັບຜິດຊອບປະກອບຄໍາເຫັນເຂົ້າໃນການວຽກງານຄົ້ນຄວ້າເສດຖະກິດມະຫາພາກ, ນະໂຍບາຍດ້ານການເງິນ ແລະ ຂໍ້ລິເລີ່ມໃໝ່ການຮ່ວມມືໃນອະນາຄົດຂອງອາຊຽນ+3. ໂດຍສະເພາະ, ຄວາມພະຍາຍາມຂອງລັດຖະບານວາງນະໂຍບາຍເພື່ອຊຸກຍູ້ ແລະ ກະຕຸ້ນເສດຖະກິດຂອງສປປ ລາວຈາກຜົນກະທົບຈາກການແຜ່ລະບາດຂອງພະຍາດໂຄວິດ-19 ແລະ ການປະກອບຄໍາເຫັນໃນຄະນະເຮັດວຽກທີ 3 ການພັດທະນາກົນໄກເຄື່ອງມືດ້ານການເງິນ, ເພື່ອຫຼຸດຜ່ອນຄວາມສ່ຽງຈາກໄພທໍາມະຊາດໂດຍສະແດງໃຫ້ການສະໜັບສະໜູນ ແລະ ແລກປ່ຽນປະສົບການກ່ຽວກັບການຈັດຕັ້ງປະຕິບັດວຽກງານ ກົນໄກປະກັນໄພເພື່ອຫຼຸດຜ່ອນຄວາມສ່ຽງໄພພິບັດທາງທຳມະຊາດອາຊີຕາເວັນອອກສ່ຽງໄຕ້ (SEADRIF).
