ສານສູງອິນໂດເນເຊຍສັ່ງປະຫານ ອະດີດຄູສອນສາສະໜາຂົ່ມຂືນລູກສິດ

ສານສູງໃນເມືອງບັນດຸງຂອງອິນໂດເນເຊຍມີຄຳພິພາກສາ ໃຫ້ອະດີດຄູສອນສາສະໜາ ຮັບໂທດປະຫານຊີວິດ ຂໍ້ຫາຂົ່ມຂືນລູກສິດ 13 ຄົນ ແລະ ຫລາຍຄົນຖືພາ.

ວັນທີ 4 ເມສາ 2022, ສຳນັກຂ່າວຕ່າງປະເທດລາຍງານວ່າ: ຈາກກໍລະນີສານເມືອງບັນດຸງ ໃນແຂວງຊະວາຕາເວັນຕົກ ມີຄຳພິພາກສາໃນກາງເດືອນກຸມພາຜ່ານມາ ໃຫ້ທ້າວ ເຮີຣີ ວິຣາວັນ ອະດີດຄູສອນສາສະໜາ ອາຍຸ 36 ປີ ຮັບໂທດຕິດຄຸກຕະຫລອດຊີວິດ ຈາກຄວາມຜິດໃນຂໍ້ຫາຫລອກລວງນັກຮຽນຍິງ 13 ຄົນ ອາຍຸລະຫວ່າງ 12-16 ປີ ເພື່ອກະທຳອານາຈານ ແລະ ລ່ວງລະເມີດທາງເພດ ໂດຍມີຜູ້ເສຍຫາຍ 8 ຄົນ ຖືພາ ແລະ ຫລາຍຄົນມີອາການບາດເຈັບ ເຊິ່ງເປັນຜົນຈາກການຖືກຂົ່ມຂືນນັ້ນ.

ຕໍ່ມາໄອຍະການຍື່ນອຸທອນການລົງໂທດດັ່ງກ່າວ ແລະ ສານສູງແຫ່ງເມືອງບັນດຸງມີຄຳພິພາກສາ ໃນວັນທີ 4 ເມສາ ໃຫ້ຈຳເລີຍຮັບໂທດປະຫານຊີວິດ. ຂະນະທີ່ທະນາຍຄວາມຝ່າຍຈຳເລີຍຍັງສະຫງວນທ່າທີວ່າຈະຍື່ນອຸທອນອີກ ຫລື ບໍ່. ສ່ວນໄອຍະການກ່າວພຽງວ່າ: ຈະລໍຖ້າປະເມີນສະຖານະການ ຈາກການຕັດສິນໃຈຂອງຈຳເລີຍກ່ອນ.

ທັງນີ້, ຢ້ອນກັບໄປເມື່ອປີ 2016 ສານອິນໂດເນເຊຍພິພາກສາລົງໂທດປະຫານຊີວິດ ຊາຍ ແລະ ເດັກໜຸ່ມກຸ່ມໜຶ່ງ ຮ່ວມກັນຂົ່ມຂືນ ແລະ ຄາດຕະກຳເດັກສາວຄົນໜຶ່ງ ເປັນຄະດີທີ່ສະເທືອນຂວັນຊາວອິນໂດເນເຊຍທົ່ວປະເທດ ແລະ ກະຕຸ້ນໃຫ້ປະທານາທິບໍດີ ໂຈໂຄ ວິໂດໂດ ແກ້ໄຂກົດໝາຍລົງໂທດຜູ້ກະທຳຜິດໃນຄະດີຂົ່ມຂືນ ດ້ວຍວິທີການທີ່ລວມທັງການໃຊ້ວິທີທາງການແພດ ສັກຢາຢັບຢັບການສ້າງຮໍໂມນເພດຊາຍຈາກອັນທະ ເຊິ່ງຜູ້ນຳອິນໂດເນເຊຍລົງນາມຮັບຮອງເປັນກົດໝາຍ ໃນປີ 2020.