ກຳປູເຈຍເປີດ “ເສັ້ນທາງ 38 ເສັ້ນ” ໃນເມືອງ “ນະຄອນວັດ ແຫລ່ງທ່ອງທ່ຽວຍອດນິຍົມ
ວັນທີ 4 ເມສາ 2022, ສຳນັກຂ່າວຊິນຮົວລາຍງານວ່າ: ທ່ານ ຮຸນເຊນ ນາຍົກລັດຖະມົນຕີກຳປູເຈຍ ເປີດຖະໜົນ 38 ເສັ້ນ ຄວາມຍາວທັງໝົດ 108 ກິໂລແມັດ ໃນແຂວງສຽມລຽບ ເຊິ່ງເປັນປະຕູສູ່ນະຄອນວັດ ສະຖານທີ່ທ່ອງທ່ຽວຍອດນິຍົມຂອງກຳປູເຈຍ.
ທາງສັນຈອນທີ່ຕິດຕັ້ງໄຟເຍືອງທາງ, ໄຟຈະລາຈອນ ແລະ ກ້ອງຮັກສາຄວາມປອດໄພ ໃຊ້ທຶນສ້າງທັງໝົດ 150 ລ້ານໂດລາສະຫະລັດ ໂດຍການກໍ່ສ້າງເລີ່ມຕົ້ນເດືອນພະຈິກ 2020 ແລະ ສຳເລັດໃນຊ່ວງຕົ້ນປີ 2022.
ທ່ານ ຮຸນເຊນ ກ່າວວ່າ: ກຸ່ມຖະໜົນດັ່ງກ່າວ ແລະ ສະໜາມບິນນາໆຊາດສຽມລຽບ ອັງກໍ ທີ່ລົງທຶນໂດຍຈີນ ເຊິ່ງມີກຳນົດເປີດບໍລິການທ້າຍປີ 2023 ຈະຊ່ວຍສົ່ງເສີມການພັດທະນາການທ່ອງທ່ຽວໃນແຂວງສຽມລຽບຢ່າງມະຫາສານໃນຍຸກຫລັງການລະບາດໃຫຍ່ຂອງພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19).
ຂະນະດຽວກັນ, ທ່ານ ຮຸນເຊນ ຍົກໃຫ້ສຽມລຽບເປັນແຂວງດາວຮຸ່ງໃນພາກພື້ນຕອນເໜືອຂອງກຳປູເຈຍ ເນື່ອງຈາກໂຄງລ່າງພື້ນຖານສ້າງໃໝ່ໃນເມືອງ ແລະ ສະໜາມບິນນາໆຊາດແຫ່ງໃໝ່.
ແຂວງສຽມລຽບ ເປັນທີ່ຕັ້ງຂອງອຸທະຍານບູຮານຄະດີອັງກໍ ຫລື ນະຄອນວັດ ຂະໜາດ 401 ຕາກິໂລແມັດ ເຊິ່ງໄດ້ຮັບການຂຶ້ນທະບຽນເປັນມໍລະດົກໂລກໂດຍອົງການຢູເນສໂກ (UNESCO) ໃນປີ 1992 ໂດຍທ່ານ ຮຸນເຊນ ຄາດວ່າຈະມີນັກທ່ອງທ່ຽວຕ່າງປະເທດຈຳນວນຫລາຍເດີນທາງມາທ່ຽວນະຄອນວັດດັ່ງກ່າວ ຫລັງກຳປູເຈຍກັບມາເປີດຊາຍແດນຮັບນັກເດີນທາງທີ່ສັກວັກຊີນປ້ອງກັນພະຍາດໂຄວິດ-19 ຄົບໂດສແບບບໍ່ກັກຕົວ, ຂະນະທີ່ປະຊາກອນທ້ອງຖິ່ນສ່ວນຫລາຍສັກວັກຊີນແລ້ວ.
ທັງນີ້, ລາຍງານຈາກລັດຖະບານກຳປູເຈຍລະບຸວ່າ: ຈຳນວນນັກທ່ອງທ່ຽວຕ່າງປະເທດທີ່ທ່ຽວຊົມອຸທະຍານດັ່ງກ່າວກັບມາຟື້ນຕົວໃນຊ່ວງໄຕມາດທຳອິດຂອງປີ 2022 ມີ 19.840 ຄົນ ເພີ່ມຂຶ້ນ 342% ຈາກໄລຍະດຽວກັນຂອງປີກ່ອນ ໂດຍອຸທະຍານດັ່ງກ່າວດຶງດູດນັກທ່ອງທ່ຽວຕ່າງປະເທດສູງເຖິງ 2,2 ລ້ານຄົນໃນປີ 2019 ເມື່ອຊ່ວງກ່ອນເກີດພະຍາດລະບາດໃຫຍ່ ແລະ ສ້າງລາຍໄດ້ຈາກການຈຳໜ່າຍປີ້ເຂົ້າຊົມ 99 ລ້ານໂດລາສະຫະລັດ.
