ຊົມເຊີຍວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນ ຄົບຮອບ 61 ປີ ຢ່າງສຸດໃຈ ! (5 ເມສາ 1961-5 ເມສາ 2022)

ຊົມເຊີຍວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນ ຄົບຮອບ 61 ປີ ຢ່າງສຸດໃຈ ! (5 ເມສາ 1961-5 ເມສາ 2022)
ພັກປະຊາຊົນປະຕິວັດລາວ ໄດ້ສ້າງຕັ້ງ ແລະ ນໍາພາເດັດຂາດ, ໂດຍກົງ ແລະ ຮອບດ້ານ ກໍາລັງປ້ອງກັນຄວາມສະຫງົບປະຊາຊົນ ເພື່ອກາຍເປັນກໍາລັງທີ່ແຫຼມຄົມຂອງພັກ, ຈົງຮັກພັກດີ ແລະ ສັດຊື່ບໍລິສຸດຕໍ່ພັກ-ລັດ, ປະເທດຊາດ ແລະ ປະຊາຊົນລາວບັນດາເຜົ່າ ທັງໃຫ້ສົມກັບການເປັນກໍາລັງທີ່ມາຈາກປະຊາ ຊົນ, ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ.

ຢ້ອນຄືນເມື່ອປີ 1954 ເພື່ອປົກປັກຮັກສາການນໍາຂອງພັກ ແລະ ອົງການປົກຄອງປະຕິວັດຢູ່ 2 ແຂວງເຕົ້າໂຮມ “ຫົວພັນ ແລະ ຜົ້ງສາລີ” ລັດຖະບານແນວລາວອິດສະລະໄດ້ຕົກລົງສ້າງຕັ້ງກໍາລັງປ້ອງກັນຂຶ້ນ ແລະ ທ້າຍປີດຽວກັນໃນໂອກາດສະເຫຼີມສະຫຼອງວັນປະກາດເອກະລາດຄົບຮອບ 9 ປີ ແລະ ສະເຫຼີມສະ ຫຼອງ ໄຊຊະນະການຕໍ່ສູ້ຕ້ານພວກລ່າເມືອງຂຶ້ນແບບເກົ່າ, ປະທານ ໄກສອນ ພົມວິຫານ ຜູ້ນໍາທີ່ແສນເຄົາ ລົບຮັກ ໄດ້ສ້າງຕັ້ງ“ຄະນະສັນຕິລາດສູນກາງ”ຂຶ້ນຢ່າງເປັນທາງການຢູ່ບ້ານເດີຍຕາແສງເມືອງໂສຍ ແຂວງ ຫົວພັນ; ປີ 1957 ເພື່ອກຽມປ້ອງກັນຜູ້ນໍາເຂົ້າລວມລາວຄັ້ງທີ 1, ສູນກາງພັກໄດ້ຕົກລົງປ່ຽນຊື່ “ຄະນະສັນຕິລາດສູນກາງ” ເປັນ “ຄະນະປ້ອງກັນພາຍໃນ” ເພື່ອເຮັດໜ້າທີ່ປ້ອງກັນລັດຖະບານປະສົມຄັ້ງທີ 1. ວັນທີ 5-12 ເມສາ 1961, ໃນກອງປະຊຸມຄົບຄະນະສູນກາງພັກຢູ່ຄັງໄຂ ແຂວງຊຽງຂວາງ ໄດ້ຕົກລົງຫຼາຍບັນຫາສຳຄັນສະເພາະໜ້າ ແລະ ຍາວນານ; ໃນນີ້ໄດ້ຕົກລົງປັບປຸງ, ກໍ່ສ້າງກໍາລັງປ້ອງກັນພາຍໃນຢູ່ທົ່ວປະເທດເພື່ອປົກປັກຮັກສາການນໍາຂອງພັກ, ແນວລາວຮັກຊາດ, ຄວາມສະຫງົບ ແລະ ຄວາມເປັນລະ ບຽບຮຽບຮ້ອຍຂອງສັງຄົມ ທັງໄດ້ຕົກລົງປ່ຽນຊື່ “ຄະນະປ້ອງກັນພາຍໃນ” ເປັນ “ຫ້ອງການປ້ອງກັນຄວາມສະຫງົບສູນກາງ”. ປີ 1965 ສູນກາງພັກໄດ້ປັບປຸງກົງຈັກການຈັດຕັ້ງບັນດາຫ້ອງການອ້ອມຂ້າງສູນກາງ ໂດຍປ່ຽນຊື່ “ຫ້ອງການປ້ອງກັນຄວາມສະຫງົບສູນກາງ” ເປັນ “ຫ້ອງການສັນຕິລາດສູນກາງ”; ພາຍຫຼັງສະຖາປະນາເປັນປະເທດສາທາລະນະລັດ ປະຊາທິປະໄຕ ປະຊາຊົນລາວ, ກົງຈັກການຈັດຕັ້ງຂອງກໍາລັງປ້ອງກັນຄວາມສະຫງົບໄດ້ປ່ຽນຊື່ “ຫ້ອງການສັນຕິລາດສູນກາງ” ເປັນ“ກະຊວງພາຍໃນ”ເພື່ອໃຫ້ສອດຄ່ອງກັບໜ້າທີ່ການເມືອງໃນໄລຍະໃໝ່; ປີ 2003 ຕົກລົງປ່ຽນຊື່ “ກະຊວງພາຍໃນ” ເປັນ “ກະຊວງປ້ອງກັນຄວາມສະຫງົບ”. ໂດຍເຫັນໄດ້ຄວາມສຳຄັນຜ່ານໄລຍະປະຫວັດສາດດັ່ງກ່າວ ປີ 1961, ກົມການເມືອງສູນກາງພັກ ແລະ ລັດຖະບານ ໄດ້ຕົກລົງຮັບຮອງເອົາວັນທີ 5 ເມສາ ເປັນວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນຢ່າງເປັນທາງການ.

ນັບແຕ່ມື້ສ້າງຕັ້ງ, ກໍາລັງປ້ອງກັນຄວາມສະຫງົບໄດ້ກໍາແໜ້ນ ແລະ ປະຕິບັດ 3 ໜ້າທີ່ 4 ການພົວພັນໄດ້ດີ; ໄດ້ເຄື່ອນໄຫວປ້ອງກັນ, ຝຶກແອບຮໍ່າຮຽນ, ປັບປຸງກໍາລັງ, ເພີ່ມພູນຜະລິດຜົນ, ສ້າງພະລາທິການກັບທີ່ ແລະ ກໍ່ສ້າງຮາກຖານ ເຊິ່ງໄດ້ຮັບຄວາມຮັກແພງອູ້ມຊູຊ່ວຍເຫຼືອຈາກປະຊາຊົນຕະຫຼອດມາ; ເຖິງວ່າເບື້ອງຕົ້ນກໍາລັງຍັງອ່ອນນ້ອຍ, ອາວຸດພາຫະນະຫຼ້າສະໄໝ, ລະດັບເຕັກນິກວິທະຍາສາດບໍ່ທັນສູງ ແຕ່ຍ້ອນຄວາມຮຽກຮ້ອງຕ້ອງການຂອງປະເທດຊາດ, ກໍາລັງປ້ອງກັນຄວາມສະຫງົບປະຊາຊົນໄດ້ເສີມຂະ ຫຍາຍນ້ຳໃຈຮັກຊາດ, ຮັກຄວາມເປັນເອກະລາດ ແລະ ຜືນແຜ່ນດິນອັນອຸດົມຮັ່ງມີຂອງຕົນ, ບໍ່ຍອມເປັນຂ້ອຍຂ້າໃຫ້ແກ່ຊາດອື່ນພ້ອມກັບກອງທັບ ແລະ ປະຊາຊົນລາວບັນດາເຜົ່າຄຽງບ່າຄຽງໄຫຼ່ກັນຕໍ່ສູ້ຕ້ານການຮຸກຮານຂອງຈັກກະພັດພາຍນອກ ແລະ ລູກແຫຼ້ງຕີນມືຂາຍຊາດ.

ຕະຫລອດ 61 ປີ, ກໍາລັງປ້ອງກັນຄວາມສະຫງົບປະຊາຊົນ ໄດ້ປະຕິບັດ 2 ໜ້າທີ່ຍຸດທະສາດຂອງພັກຄື ປົກປັກຮັກສາ ແລະ ສ້າງສາພັດທະນາປະເທດຊາດ; ໄດ້ກາຍເປັນກໍາລັງຫຼັກແຫຼ່ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ, ປະຕິບັດຂະບວນການຮັກຊາດແລະ ພັດ ທະນາຕິດພັນກັບວຽກງານ 3 ສ້າງຢ່າງແຂງແຮງ; ເດັດດ່ຽວປະຕິບັດແນວທາງປ່ຽນແປງໃໝ່ຂອງພັກ, ຮັກ ສາ ແລະ ເສີມຂະຫຍາຍທາດແທ້ປະຕິວັດ, ມູນເຊື້ອອັນດີງາມຂອງຊາດກໍຄືທາດແທ້, ມູນເຊື້ອຂອງກໍາລັງປ້ອງກັນຄວາມສະຫງົບປະຊາຊົນ; ຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ, ຕັ້ງໜ້າປັບປຸງ-ກໍ່ສ້າງກໍາລັງປ້ອງກັນຄວາມສະຫງົບປະຊາຊົນນັບມື້ເຂັ້ມແຂງທຸກດ້ານ, ຮູ້ອີງໃສ່ກໍາລັງແຮງສັງລວມຂອງທົ່ວປວງຊົນ, ຫັນເອົາກໍາລັງກໍ່ສ້າງຮາກຖານການເມືອງຢ່າງແຂງແຮງ, ປັບປຸງອົງການປົກຄອງທ້ອງຖິ່ນ,ຊ່ວຍເຫຼືອ ປະ ຊາຊົນປັບປຸງຊີວິດການເປັນຢູ່ໃຫ້ດີຂຶ້ນເຮັດໃຫ້ສະພາບຢູ່ຮາກຖານສະຫງົບໂດຍພື້ນຖານ, ປະຊາຊົນລາວບັນດາເຜົ່າເຊື່ອໝັ້ນຕໍ່ແນວທາງນະໂຍບາຍຂອງພັກ-ລັດ, ເຊື່ອໝັ້ນກໍາລັງປ້ອງກັນຄວາມສະຫງົບປະຊາ ຊົນ; ສາມາດທັບມ້າງກົນອຸບາຍຫັນປ່ຽນໂດຍສັນຕິ, ການກໍ່ຄວາມບໍ່ສະຫງົບ, ແຊກຊຶມ ແລະ ການເຄື່ອນ ໄຫວເກາະຜິດ, ບຽດຢຶດຊາຍແດນຂອງອິດທິກໍາລັງປໍລະປັກໄດ້ຢ່າງທັນການ, ຮັບປະກັນໃຫ້ປະເທດຊາດມີສະຖຽນລະພາບດ້ານການເມືອງຢ່າງໜັກແໜ້ນ, ສັງຄົມເປັນລະບຽບຮຽບຮ້ອຍ ແລະ ປອດໄພໂດຍພື້ນ ຖານ, ຍາມໃດກໍກຽມພ້ອມຮັບໃຊ້ຄວາມຮຽກຮ້ອງຕ້ອງການຂອງພັກ ແລະ ປະຊາຊົນຢ່າງຈົງຮັກພັກດີ, ຊື່ສັດບໍລິສຸດ, ເດັດດ່ຽວໜຽວແໜ້ນ, ກ້າວເດີນຕາມອຸດົມການສັງຄົມນິຍົມຂອງພັກ.

ເພື່ອສ້າງການຫັນປ່ຽນໄປສູ່ຄຸນນະພາບໃໝ່ຢ່າງຕັ້ງໜ້າ ແລະ ເຂັ້ມແຂງຮອບດ້ານ, ນາຍ ແລະ ພົນຕໍາຫຼວດ ທົ່ວກໍາລັງປ້ອງກັນຄວາມສະຫງົບ ຈະໄດ້ພ້ອມກັນຈັດຕັ້ງປະຕິບັດໜ້າທີ່ຕໍ່ໜ້າດັ່ງນີ້:

1. ສືບຕໍ່ເຊື່ອມຊຶມກໍາແໜ້ນ ແລະ ຈັດຕັ້ງແນວທາງປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ເລິກ ເຊິ່ງ, ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ; ມະຕິວ່າດ້ວຍການເພີ່ມທະວີວຽກງານປ້ອງກັນຄວາມສະຫງົບໃນສະພາບການໃໝ່; ຄໍາສັ່ງວ່າດ້ວຍການເພີ່ມທະວີ ແລະ ແກ້ໄຂບັນຫາຢາເສບຕິດ;ຄໍາ ສັ່ງວ່າດ້ວຍການສະກັດກັ້ນ ແລະ ແກ້ໄຂປາກົດການຫຍໍ້ທໍ້ໃນສັງຄົມທັງສຸມໃສ່ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ (2021-2023) ແລະ ນິຕິກໍາອື່ນໆທີ່ກ່ຽວຂ້ອງໃຫ້ເປັນແຜນຍຸດທະສາດ, ເປັນແຜນງານ ແລະ ໂຄງການທີ່ນອນໃນຄວາມຮັບຜິດຊອບໃຫ້ໄດ້ຮັບໝາກຜົນຕົວຈິງໄປພ້ອມກັບການຍູ້ແຮງເຮັດໃຫ້ບັນຫາດັ່ງກ່າວກາຍເປັນພັນທະຂອງທົ່ວສັງຄົມແນໃສ່ຮັບປະກັນສະຖຽນລະພາບດ້ານການເມືອງ, ປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພຂອງສັງ ຄົມໃຫ້ໜັກແໜ້ນ.

2. ອອກແຮງປັບປຸງ, ກໍ່ສ້າງພັກ, ກໍ່ສ້າງພະນັກງານໃຫ້ເຂັ້ມແຂງທຸກດ້ານ; ເຊີດຊູບົດບາດການນໍາພາເດັດ ຂາດ, ໂດຍກົງ ແລະ ຮອບດ້ານຂອງພັກ; ເພີ່ມທະວີປັບປຸງກໍ່ສ້າງກໍາລັງປ້ອງກັນຄວາມສະຫງົບປະຊາຊົນ ໃຫ້ໜັກແໜ້ນດ້ານການເມືອງ-ແນວຄິດ, ເຂັ້ມແຂງດ້ານການຈັດຕັ້ງ ມີແບບແຜນກ້າວສູ່ຄວາມທັນສະໄໝ ຕິດພັນກັບການກໍ່ສ້າງກໍາລັງໃຫ້ມີຄວາມຮູ້-ຄວາມສາມາດດ້ານວິຊາສະເພາະ, ວິຊາການຕ່າງໆໃຫ້ຮັບປະ ກັນທັງຈໍານວນ ແລະ ຄຸນນະພາບ; ເປັນກໍາລັງທີ່ຈົງຮັກພັກດີ, ຊື່ສັດບໍລິສຸດຕໍ່ຊາດ, ຕໍ່ພັກ, ຕໍ່ປະຊາຊົນ ແລະ ອຸດົມການສັງຄົມນິຍົມ; ເປັນເຈົ້າການສະກັດກັ້ນ ແລະ ຕ້ານປາກົດການຫຍໍ້ທໍ້ພາຍໃນກໍາລັງໂດຍສະເພາະການສວຍໃຊ້ສິດໜ້າທີ່ເພື່ອຫາຜົນປະໂຫຍດບໍ່ຖືກຕ້ອງ, ລະເມີດລະບຽບກົດໝາຍທັງສຸມໃສ່ຕ້ານປາກົດການ “ຫັນປ່ຽນດ້ວຍຕົນເອງ”ແລະ “ເສື່ອມຄຸນປ່ຽນທາດເອງ” ຢ່າງແຂງແຮງ.

3. ສືບຕໍ່ຫັນກໍາລັງລົງກໍ່ສ້າງຮາກຖານການເມືອງຢ່າງແຂງແຮງຕາມທິດ 3 ສ້າງ; ເປັນເຈົ້າການປ້ອງກັນ, ສະກັດກັ້ນ, ແກ້ໄຂບັນດາໜໍ່ແໜງຄວາມບໍ່ສະຫງົບ ປາກົດການຫຍໍ້ທໍ້ໃນສັງຄົມ; ຮັບປະກັນບໍ່ໃຫ້ເກີດເຫດ ການຄວາມບໍ່ສະຫງົບທາງດ້ານການເມືອງທີ່ຮ້າຍແຮງ ແລະ ສົ່ງຜົນກະທົບເຖິງຄວາມໝັ້ນຄົງຂອງຊາດ.

4. ຕັ້ງໜ້າຜັນຂະຫຍາຍຍຸດທະສາດ ແລະ ແຜນງານພະລາທິການຮັບໃຊ້ວຽກງານປ້ອງກັນຄວາມສະຫງົບ ໂດຍສຸມໃສ່ສືບຕໍ່ປັບປຸງ, ຍົກສູງຄຸນນະພາບວຽກງານພະລາທິການຮອບດ້ານຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ; ສຸມໃສ່ສ້າງ, ປັບປຸງກົນໄກ, ລະບຽບການທັງຕິດຕາມກວດ ກາ, ຊຸກຍູ້ ແລະ ປະເມີນຜົນການເຄື່ອນໄຫວວຽກງານພະລາທິການຂອງກົມກອງໃຫ້ມີປະສິດທິຜົນ.

5. ຜັນຂະຫຍາຍແນວທາງການຕ່າງປະເທດຂອງພັກ, ປະຕິບັດນະໂຍບາຍເຊື່ອມໂຍງພາກພື້ນ ແລະ ສາ ກົນໃຫ້ມີປະສິດທິຜົນ ໂດຍສຸມໃສ່ພົວພັນຮ່ວມມືກັບກໍາລັງປ້ອງກັນຄວາມສະຫງົບປະເທດເພື່ອນມິດຍຸດທະສາດ, ອົງການຕຳຫຼວດອາຊຽນ ແລະ ອົງການຕໍາຫຼວດສາກົນຢ່າງເລືອກເຟັ້ນ; ສົມທົບແໜ້ນລະຫວ່າງການເຊີດຊູນໍ້າໃຈຮັກຊາດ, ຍົກສູງສະຕິເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງກັບການຍາດແຍ່ງເອົາກໍາລັງແຮງ ກາລະໂອກາດທີ່ອໍານວຍຂອງຍຸກສະໄໝ ແລະ ສາກົນ, ປະກອບສ່ວນຢ່າງສົມກຽດເຂົ້າໃນພາລະກິດປົກປັກຮັກສາຄວາມໝັ້ນຄົງ, ຄວາມສະຫງົບ, ການເຊີດຊູບົດບາດຂອງກໍາລັງປ້ອງກັນຄວາມສະຫງົບປະຊາຊົນໃຫ້ສູງຂຶ້ນໃນເວທີພາກພື້ນ ແລະ ສາກົນ.