ມາຮູ້ຈັກຄຳທຳນາຍປີໃໝ່ລາວ (ປີ ຈ.ສ 1384, ປີ ພ.ສ 2565 )
– ວັນສັງຂານລ່ວງ : ວັນພະຫັດ ຂຶ້ນ 13 ຄໍ່າ, ເດືອນ 5, ພ.ສ 2564 ກົງກັບວັນທີ 14 ເມສາ 2022, ເວລາ 9ໂມງ 52 ນາທີ 12 ວິນາທີ.
– ວັນສັງຂານເນົາ : ວັນສຸກ ຂຶ້ນ 14 ຄໍ່າ, ເດືອນ 5, ພ.ສ 2564 ກົງກັບວັນທີ 15 ເມສາ 2022.
– ວັນສັງຂານຂຶ້ນ : ວັນເສົາ ຂຶ້ນ 15 ຄໍ່າ, ເດຶອນ 5, ພ.ສ 2564 ກົງກັບວັນທີ 16 ເມສາ 2022, ເວ ລາ 13ໂມງ 49 ນາທີ 48 ວິນາທີ, ປ່ຽນວັນຖະເຫລີງສົກປີໃໝ່ລາວຈຸນລະສັກກະຣາດເປັນ 1384.
ນາງສັງຂານ ປີນີ້ໄດ້ແກ່ ເທບທິດາອົງທີ 5 ຂອງພະຍາກະບິນລະພົມ ນາມວ່າ: “ກິຣິນີເທວີ” ຊົງພະ ຫຸ ຣັດທັດດອກມົນທາ ອາພອນປະດັບດ້ວຍແກ້ວມໍລະກົດ (ແກ້ວສີຂຽວ), ສະເຫວີຍຖົ່ວງາເປັນອາຫານ, ພະຫັດຂວາຊົງຖືຂໍຊ້າງ, ພະຫັດຊ້າຍຊົງຖືປືນ, ສະເດັດຢືນມາເທິງຫລັງຊ້າງເປັນພາຫະນະ.
ຕາມການຄຳນວນບອກວ່າ:
– ເກນພິຣຸນນະສາດ: ພະອາທິດເປັນອະທິບໍດີ, ນາກຫລິ້ນນໍ້າ 4 ໂຕ, ບັນດານໃຫ້ຝົນຕົກ 400 ຫ່າ, ຕົກໃນຂອບຈັກກະວານ 160 ຫ່າ, ຕົກໃນປ່າຫິມະພານ 120 ຫ່າ, ຕົກໃນມະຫາສະໝຸດ 80 ຫ່າ, ຕົກໃນມະນຸດໂລກ 40 ຫ່າ.
– ເກນທາຣາທິຄຸນ: ຕົກລາສີເຕໂຊ, ນໍ້າຈະໜ້ອຍ, ຝົນຕົ້ນປີຈະຕົກພໍດີ ກາງປີຈະຕົກໜ້ອຍ ທ້າຍປີຈະຕົກຫລາຍ, ນາລຸ່ມຈະດີ ແຕ່ນາດອນຈະບໍ່ດີ, ຈະມີລົມພັດແຮງທີ່ສຸດມາຈາກທິດທັງ 4 ຕາມລະດູການ.
– ເກນທັນຍາຫານ:ຊື່ວ່າ ປັດຈະສິມະ, ເຂົ້າກ້າໄຮ່ນາຈະໄດ້ແຕ່ 1 ສ່ວນ ເສຍ 5 ສ່ວນ, ໂພຊະນີຍາຫານ ມີພໍຄວນ, ປະຊາຊົນພົນລະເມືອງຈະສຸກແດ່ ທຸກແດ່ປະປົນກັນໄປ.
– ເກນຜະລາມັດສະມັງສາຫານ: ໝາກໄມ້ຈະເປັນດ້ວງເປັນແມງຈຳນວນຫລາຍ, ພິກພູຈະແພງ, ຊີ້ນປາອາຫານຈະມີພໍຄວນ.
– ເກນຣຸກຂະຊາດ: ໄມ້ງິ້ວເປັນພະຍາ, ບ້ານເມືອງຈະສະຫງົບສຸກດີ ແຕ່ຟ້າຝົນບໍ່ຄ່ອຍດີປານໃດ.
– ເກນກາລະໂຍກ: ວັນພຸດເປັນທຸງໄຊ, ວັນອັງຄານເປັນອະທິບໍດີ, ວັນອາທິດເປັນອຸບາດ, ວັນພະຫັດເປັນໂລກາວິນາດ.
