ອິນເດຍມອບໂຄງການໃຫ້ການຊ່ວຍເຫລືອໃຫ້ແກ່ລາວ 4 ໂຄງການ ມູນຄ່າເກືອບ 2 ແສນໂດລາ
ວັນທີ 31 ມີນາ 2022 ນີ້, ຢູ່ກະຊວງການຕ່າງປະເທດ, ສປປ ລາວ ແລະ ອິນເດຍ ໄດ້ຮ່ວມລົງນາມໃນບົດບັນທຶກຄວາມເຂົ້າໃຈເພື່ອມອບ-ຮັບການຊ່ວຍເຫລືອຂອງໂຄງການເຫັນຜົນໄວ ພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າຄົງຄາ ເຊິ່ງຜູ້ຮ່ວມລົງນາມບົດບັນທຶກໃນຄັ້ງນີ້, ຕາງໜ້າໃຫ້ຝ່າຍລາວແມ່ນ ຄະນະຮັບຜິດຊອບໂຄງການຈາກພະແນກການກ່ຽວຂ້ອງຂອງບັນດາແຂວງທີ່ໄດ້ຮັບໂຄງການ ແລະ ຝ່າຍອິນເດຍແມ່ນທ່ານ ຫົວໜ້າຫ້ອງການສະຖານເອກອັກຄະລັດຖະທູດ ແຫ່ງສາທາລະນະລັດອິນເດຍ ປະຈໍາ ສປປ ລາວ ໂດຍມີ ທ່ານ ຕິ່ງ ສຸກສັນ ຮອງລັດຖະມົນຕີກະຊວງການຕ່າງປະເທດ ແລະ ທ່ານ ດິນກາອາດສ໌ທານາ ເອກອັກຄະລັດຖະທູດແຫ່ງ ສາທາລະນະລັດອິນເດຍ ປະຈຳ ສປປ ລາວ ເຂົ້າຮ່ວມເປັນສັກຂີພິຍານ.
ການຮ່ວມລົງນາມບົດບັນທຶກຄັ້ງນີ້, ເພື່ອຈັດຕັ້ງປະຕິບັດໂຄງການທີ່ໄດ້ຮັບການສະໜັບສະໜູນຈາກລັດຖະບານອິນເດຍ ຈໍານວນ 4 ໂຄງການ, ລວມມູນຄ່າທັງໝົດ 184.677 ໂດລາສະຫະລັດ ຄື: ໂຄງການກໍ່ສ້າງສຸກສາລາ ບ້ານວຽງໄຊ ເມືອງພູວົງ, ແຂວງ ອັດຕະປື; ໂຄງການກໍ່ສ້າງຫ້ອງຮຽນທີ່ໂຮງຮຽນປະຖົມກະແຫລ່ງພູ ເມືອງນອງ ແຂວງສະຫວັນນະເຂດ; ໂຄງການປັບປຸງການຜະລິດກາເຟອິນຊີ ແລະ ຄວາມຫລາກຫລາຍຂອງເສດຖະກິດຊົນນະບົດ ແລະ ການສ້າງຂີດຄວາມສາມາດຂອງຊາວບ້ານ, ບ້ານນໍ້າວັງ ເມືອງວຽງພູຄາ ແຂວງຫລວງນໍ້າທາ ແລະ ໂຄງການກໍ່ສ້າງຫ້ອງຮຽນ ທີ່ ໂຮງຮຽນມັດທະຍົມກະລຶມ, ແຂວງເຊກອງ.
ໃນໂອກາດນີ້, ທ່ານ ຕິ່ງ ສຸກສັນ ໄດ້ກ່າວສະແດງຄວາມຂອບໃຈ ແລະ ຊົມເຊີຍຕໍ່ທ່ານເອກອັກຄະລັດຖະທູດ ດິນກາອາດສ໌ທານາ ກໍຄື ລັດຖະບານອິນເດຍ ທີ່ໄດ້ໃຫ້ຄວາມສໍາຄັນຕໍ່ການຮ່ວມມື ລະຫວ່າງ ສປປ ລາວ ແລະ ອິນເດຍ ທັງໃນຂອບການຮ່ວມມືສອງຝ່າຍ ແລະ ຫລາຍຝ່າຍ ໂດຍສະເພາະ ແມ່ນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ຍົກສູງຄຸນນະພາບຊີວິດການເປັນຢູ່ຂອງປະຊາຊົນໃນຂັ້ນທ້ອງຖິ່ນໃຫ້ນັບມື້ນັບດີຂຶ້ນ. ພ້ອມນີ້, ທ່ານ ຮອງລັດຖະມົນຕີກະຊວງການຕ່າງປະເທດ ກໍໄດ້ໃຫ້ຄຳໝາຍໝັ້ນວ່າ ສປປ ລາວ ຈະສືບຕໍ່ຮ່ວມມືຢ່າງໃກ້ຊິດກັບ ອິນເດຍ ໃນຖານະການເປັນປະທານຮ່ວມກອງປະຊຸມ ຂອບການຮ່ວມມືແມ່ນໍ້າຂອງ-ແມ່ນໍ້າຄົງຄາ ໃນປີ 2022.
ອິນເດຍໃນນາມຄູ່ຮ່ວມພັດທະນາຂອບການຮ່ວມມືແມ່ນໍ້າຂອງ-ແມ່ນໍ້າຄົງຄາ ໄດ້ປະກາດສ້າງຕັ້ງໂຄງການເຫັນຜົນໄວ ໃນປີ 2012 ໂດຍການສະໜັບສະໜູນງົບປະມານ ຈໍານວນ 1 ລ້ານໂດລາສະຫະລັດຕໍ່ປີ ໃຫ້ແກ່ປະເທດສະມາຊິກ ເພື່ອຈັດຕັ້ງປະຕິບັດໂຄງການຂະໜາດນ້ອຍ, ມູນຄ່າບໍ່ເກີນ 50.000 ໂດລາສະຫະລັດຕໍ່ 1 ໂຄງການ, ນັບຕັ້ງແຕ່ທີ່ມີການສ້າງຕັ້ງໂຄງການເຫັນຜົນໄວໃນປີ 2012 ສປປ ລາວ ໄດ້ຮັບອະນຸມັດໂຄງການທັງໝົດ 11 ໂຄງການ, ລວມມູນຄ່າ 532.677 ໂດລາສະຫະລັດ.
ຂ່າວ-ພາບ: ກົມຂ່າວ ກະຊວງການຕ່າງປະເທດ
