ກຽມສະຫລອງປີໃໝ່ບົນຈິດໃຈປະຢັດ ແລະ ມີສະຕິເປັນເຈົ້າ

ໂດຍ: ທິດກໍ່າ

ຍັງອີກບໍ່ພໍເທົ່າໃດວັນ ປີໃໝ່ລາວ ພສ 2565 ກໍຈະໄດ້ໝູນວຽນມາບັນຈົບຄົບຮອບອີກວາລະໜຶ່ງ. ປີນີ້ອີງຕາມປະຕິທິນລາວ ປີໃໝ່ລາວແມ່ນກົງກັບວັນທີ 14 ເມສາ 2022 ຂຶ້ນ 13 ຄໍ່າເດືອນ 5 ລາວ ພສ 2564 ເປັນມື້ຂັງຂານລ່ວງ. ສ່ວນມື້ເນົາວັນທີ 15 ເມສາ ຂຶ້ນ 14 ຄໍ່າ ແລະ ມື້ສັງຂານຂຶ້ນເປັນມື້ວັນທີ 16 ເມສາ 2022 ຂຶ້ນ 15 ຄໍ່າ. ການສະຫລອງປີໃໝ່ປີນີ້ ອີງຕາມຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການໃຫ້ເອົາວັນທີ 13 ເມສາ 2022 ເປັນມື້ພັກຊົດເຊີຍ. ໝາຍວ່ານັບແຕ່ວັນທີ 13 ເມສາເປັນຕົ້ນໄປຈົນຮອດວັນທີ 17 ເມສາ 2022 ໄລ່ທັງວັນເສົາວັນທິດ ພວກເຮົາຈະໄດ້ສະຫລອງກັນເຖິງ 5 ມື້.

ແນວໃດກໍຕາມ, ອີງໃສ່ສະພາບຄວາມເປັນຈິງຂອງປະເທດເຮົາໃນປັດຈຸບັນແມ່ນພວມໄດ້ຮັບຜົນກະທົບຈາກສະພາບແວດລ້ອມຫລາຍດ້ານ ເປັນຕົ້ນໄດ້ຮັບຜົນກະທົບຈາກໂຄວິດ-19 ສາຍພັນໂອມິຄຣອນພວມລະບາດ. ດັ່ງໃນວັນທີ 30 ມີນາ 2022 ມີຄົນຕິດເຊື້ອໃໝ່ໃນທົ່ວປະເທດເຖິງ 2.679 ຄົນ, ລວມຕິດເຊື້ອສະສົມ 174.136 ຄົນ, ເສຍຊີວິດສະສົມ 664 ຄົນ. ສະເພາະວັນທີ 30 ມີນາ 2022 ປິ່ນປົວດີ 384 ຄົນ. ນັບຈາກມື້ນີ້ໄປຮອດມື້ສະຫລອງປີໃໝ່ກໍຍັງບໍ່ທັນຮູ້ວ່າມັນຈະຫລຸດລົງ ຫລື ເພີ່ມຂຶ້ນ.

ນອກຈາກບັນຫາການລະບາດຂອງພະຍາດໂຄວິດ-19 ແລ້ວ, ຍັງມີຜົນກະທົບດ້ານອື່ນເຊັ່ນ: ສິນຄ້າລາຄາແພງ, ນ້ຳມັນແອັດຊັງພິເສດລິດໜຶ່ງພຸ້ງຂຶ້ນ 20 ກວ່າພັນ, ນ້ຳມັນກາຊວນ 15 ພັນກວ່າກີບແລ້ວ, ອັດຕາເງິນເຟີ້ມີເຖິງ 7,31%, ລາຄາຄຳ 12 ລ້ານກວ່າກີບຕໍ່ບາດ, ອັດຕາແລກປ່ຽນເງິນບາດກັບເງິນກີບມີທ່າອ່ຽງສູງຂຶ້ນຕິກໆເຊັ່ນ: ລາຄາຊື້ຕົກເປັນ 372,73 ລາຄາຂາຍ 375,49, ໝີ່ຢູ່ທ້ອງຕະຫລາດສູງກວ່າ 80 ພັນກີບຕໍ່ໜຶ່ງແກັດ ແລະ ສິນຄ້າປະເພດອື່ນກໍຫຍັບຂຶ້ນສູງເໝືອນກັນ. ຈາກສາເຫດທີ່ກ່າວມານີ້ ຕົ້ນເຫດຂອງມັນກໍແມ່ນພົວພັນເຖິງການຂົນສົ່ງ ຍ້ອນລາຄານ້ຳມັນແພງຂຶ້ນບໍ່ຄົງທີ່ໃນໄລຍະຫລາຍເດືອນຜ່ານມາ.

ເຖິງຢ່າງໃດກໍດີ, ໃນການສະຫລອງສົ່ງທ້າຍປີເກົ່າ 2564 ແລະ ຕ້ອນຮັບປີໃໝ່ 2565 ປີນີ້ ກໍຫວັງວ່າທຸກທ່ານທຸກຄົນຈະມ່ວນຊື່ນ, ກິນ, ທ່ຽວຕາມຮີດຄອງປະເພນີອັນດີງາມຂອງຊາດລາວເຮົາ. ນອກຈາກນັ້ນ ກໍບົນພື້ນຖານການປະຢັດມັດທະຍັດຕາມແນວທາງນະໂຍບາຍຂອງພັກ ແລະ ລັດຖະບານວາງອອກ ເຊິ່ງໃນນີ້ມັນກໍນອນຢູ່ໃນວາລະແຫ່ງຊາດວ່າດ້ວຍການແກ້ໄຂບັນຫາເສດຖະກິດ-ການເງິນ. ສິ່ງສຳຄັນອີກຢ່າງໜຶ່ງກໍແມ່ນພ້ອມກັນມີສະຕິເປັນເຈົ້າໃນການປົກປັກຮັກສາຄວາມສະຫງົບສຸກຂອງບ້ານເມືອງ, ຄວາມປອດໄພໃນຊີວິດຊັບສິນຂອງຕົນເອງ. ປີໃໝ່ລາວທີ່ຈະມາເຖິງນີ້ ຂໍໃຫ້ທຸກຄົນປອດໄພຈາກການຕິດໂຄວິດ-19 ຍາດເອົາໄຊຊະນະໃນປີໃໝ່ໃຫ້ໃຫຍ່ຫລວງກວ່າເກົ່າ.