ຈີນກູ້ຊາກໂບອິ້ງ 737 ແລ້ວກວ່າ 4 ໝື່ນອັນ ເລັ່ງຖອດລະຫັດກັບດຳ ໄຂປິດສະໜາເຮືອບິນຕົກໃນກວ່າງຊີ
ຈີນກູ້ຊາກເຮືອບິນຂອງສາຍການບິນ China Eastern Airlines ທີ່ຕົກໃນເຂດປົກຄອງຕົນເອງກວ່າງຊີຈ້ວງໄດ້ແລ້ວຫລາຍກວ່າ 40.000 ອັນ. ປັດຈຸບັນເຈົ້າໜ້າທີ່ກຳລັງເລັ່ງຖອດລະຫັດກັບດຳທີ່ເກັບກູ້ໄດ້ມາທັງ 2 ກັບ ເພື່ອໄຂປິດສະໜາຂອງອຸບັດເຫດຄັ້ງນີ້.
ວັນທີ 31 ມີນາ 2022, ເວັບໄຊຊິນຮົວເປີດເຜີຍວ່າ: ທ່ານ ຈູເທົາ ຫົວໜ້າສຳນັກງານຄວາມປອດໄພທາງການບິນ ສັງກັດສຳນັກບໍລິຫານການບິນພົນລະເຮືອນແຫ່ງປະເທດຈີນ ໄດ້ຖະແຫລງວ່າ: ຈີນກອບກູ້ຊາກເຮືອບິນໂດຍສານຂອງສາຍການບິນ China Eastern Airlines ທີ່ຕົກໃນເຂດປົກຄອງຕົນເອງກວ່າງຊີຈ້ວງທາງຕອນໃຕ້ຂອງປະເທດໄດ້ແລ້ວຫລາຍກວ່າ 40.000 ອັນ ໄລ່ຮອດວັນທີ 30 ມີນາ.
ທ່ານ ຈູເທົາ ກ່າວວ່າ: ຊາກເຮືອບິນສ່ວນຫລາຍໄດ້ຖືກຍ້າຍໄປສະຖານທີ່ຈັດເກັບເພື່ອຄັດແຍກ ແລະ ກວດສອບເພີ່ມຕື່ມ, ສ່ວນພາລະກິດຄົ້ນຫາ ແລະ ກູ້ໄພຂະໜານໃຫຍ່ມີການປະຍຸກໃຊ້ສາລະພັດອຸປະກອນ ເຊິ່ງລວມທັງລົດມອດໄຟ 216 ຄັນ ແລະ ໂດຣນ 16 ລຳ ຄວບຄຸມພື້ນທີ່ຄົ້ນຫາເກືອບ 10 ລ້ານຕາແມັດ.
ຂະນະດຽວກັນ, ທ່ານ ຈູເທົາ ຍັງລະບຸວ່າ: ເຈົ້າໜ້າທີ່ກຳລັງຖອດລະຫັດອຸປະກອນບັນທຶກຂໍ້ມູນການບິນ ຫລື ກັບດຳ ທັງ 2 ກັບຈາກເຮືອບິນໂດຍສານຂອງສາຍການບິນ China Eastern Airlines.
ທ່ານ ຈູເທົາ ເປີດເຜີຍວ່າ: ເຈົ້າໜ້າທີ່ກຳລັງວິເຄາະເບື້ອງຕົ້ນ ຫລັງລະບຸຕຳແໜ່ງ ແລະ ຮູບຖ່າຍສະພາບແວດລ້ອມຈຸດເກີດເຫດ, ການກະຈາຍຂອງເສດຊາກ ແລະ ຈຸດທີ່ເຮືອບິນຕົກໄດ້ແລ້ວ ໂດຍບັນດາຜູ້ຊ່ຽວຊານດ້ານການບິນກຳລັງສຶກສາ ແລະ ຕັດສິນວິຖີ, ທ່າທາງ ແລະ ແຮງກະແທກຂອງເຮືອບິນທີ່ອາດເກີດຂຶ້ນຂະນະຕົກສູ່ພື້ນ.
ທ່ານ ຈູເທົາ ລະບຸຕໍ່ໄປວ່າ: ເຈົ້າໜ້າທີ່ກຳລັງພະຍາຍາມກູ້ຄືນຂັ້ນຕອນການບິນຕົວຈິງກ່ອນເຮືອບິນຕົກ ໂດຍອາໄສການວິເຄາະຂໍ້ມູນລະບົບເຣດາອັດຕະໂນມັດຂອງການຄວບຄຸມການຈະລາຈອນທາງອາກາດ. ພ້ອມກ່າວວ່າ: ຂໍ້ມູນກ່ຽວກັບຜູ້ໂດຍສານ, ກະເປົາເດີນທາງ, ສິນຄ້າ ແລະ ຈົດໝາຍຂອງຖ້ຽວບິນດັ່ງກ່າວລ້ວນຢູ່ລະຫວ່າງການກວດສອບເຊັ່ນກັນ.
ທັງນີ້, ເຮືອບິນໂບອິ້ງ 737 ຂອງສາຍການບິນ China Eastern Airlines ເຊິ່ງບິນຈາກເມືອງຄຸນໝິງສູ່ເມືອງກວ່າງໂຈວ ພ້ອມຜູ້ໂດຍສານ 123 ແລະ ຈຸບິນ 9 ຄົນ ຕົກໃນເມືອງອູ໋ໂຈວຂອງກວ່າງຊີ ເມື່ອເວລາປະມານ 14:38 ໂມງ ຂອງວັນທີ 21 ມີນາ ຕາມເວລາທ້ອງຖິ່ນ ສົ່ງຜົນໃຫ້ຜູ້ທີ່ຢູ່ໃນເຮືອບິນລຳນີ້ເສຍຊີວິດທັງໝົດ.
ອ້າງອີງ:
https://www.xinhuathai.com/china/273951_20220331
https://www.xinhuathai.com/china/273874_20220331
