ເອຟເວີຕັນ ສ່ຽງຕົກຊັ້ນຈາກພຣີເມຍລີກ ໃນຮອບ 71 ປີ
ສະຖານະການຂອງ ເອຟເວີຕັນ ໃນເວລານີ້ອ່າວສ່ຽງກັບການຕົກຊັ້ນຄັ້ງທຳອິດນັບຕັ້ງແຕ່ລະດູການ 1950/1951 ເນື່ອງຈາກຜົນງານຂອງ ເອຟເວີຕັນໃນຕອນນີ້ບໍ່ມີຫຍັງດີຂຶ້ນເລີຍ ເຖິງຈະປ່ຽນຜູ້ຈັດການທີມເປັນແຟຣັງ ແລມພາດ ກໍຕາມ.
ແລມພາດ ເຂົ້າມາຄຸມສະໂມສອນແທນ ຣາຟາເອລ ເບນິເຕດ ທີ່ອຳລາທີມດ້ວຍຜົນງານອັນຕົກຕຳ່ທີ່ສຸດ ຊະນະ 7 ຈາກ 22 ເກມ ຈາກການຄຸມທີມພຽງ 6 ເດືອນ ໂດຍການມາຂອງຕຳນານສະໂມສອນ ເຊລຊີ ບໍ່ໄດ້ຊ່ວຍຫຍັງເຮັດໃຫ້ຜົນງານເອຟເວີຕັນ ດີຂຶ້ນເລີຍ ທັງທີ່ພວກເຂົາມີການເສີມທີມພໍສົມຄວນໃນໄລຍະຕະຫລາດຊື້ຂາຍນັກເຕະຮອບ 2 ເດືອນມັງກອນຜ່ານມາ.
ຜົນງານຂອງ ແລມພາດ ກໍໍບໍ່ໄດ້ດີກວ່າ ເບນີເຕດ ໂດຍພາທີມເສຍ 5 ຈາກ 8 ເກມ ເຮັດໃຫ້ອັນດັບໃນຕາຕະລາງລີກເວລານີ້ ເອຟເວີຕັນ ເຊິ່ງເປັນ 1 ໃນ 6 ທີມຍັງບໍ່ເຄີຍຕົກຈາກພຣີເມຍລີກ ຢູ່ອັນດັບທີ 17 ມີ 25 ຄະແນນ ຈາກການລົງສະຫນາມ 27 ນັດ ຫ່າງຈາກເຂດຕົກຊັ້ນພຽງ 3 ຄະແນນ.
ເວົ້າໄປແລ້ວ ເອຟເວີຕັນ ເປັນສະໂມສອນທີ່ມີນັກເຕະດີພໍສົມຄວນ ທັງ ຣິຊາລີຊອນ, ໂດມິນິກ ຄັລເວີນ-ລູວິນ, ຈໍແດນ ພິກຟອດ, ອັນເດຣ ໂກເມສ, ເດເລ ອັນລີ ແລະ ດອນນີ ຟານ ເດິ ເບັກ ເປັນຕົ້ນ ແຕ່ຜົນງານຂອງທີມນັບມື້ມີແຕ່ຕຳ່ລົງ.
ດ້ວຍສະຖານະການໃນຕອນນີ້ ຕ້ອງຍອມຮັບວ່າແຟນບານ ເອຟເວີຕັນ ທົ່ວໂລກ ຮູ້ສຶກເປັນຫ່ວງທີມຮັກເຫລືອເກີນ ເພາະຈາກປະຫວັດສາດພຣີເມຍລີກ ເຄີຍມີ 5 ສະໂມສອນຊັ້ນນຳຕ້ອງໂບກມືລາການແຂ່ງຂັນລາຍການນີ້ມາແລ້ວ.
