“ປັອກບາ” ກ່າວວ່າ ອາດຈະກັບໃຈ ຢູ່ກັບ ແມນ ຢູໄນເຕັດ ຕໍ່ໃນລະດູການໜ້າ

ເຖິງວ່າກະແສການຍ້າຍອອກຈາກ Old Trafford ຂອງ ພອລ ປັອກບາ ຍັງໜາຫູກໍ່ຕາມ, ແຕ່ເຈົ້າໂຕຢືນຢັນວ່າ ຍັງບໍ່ມີຫຍັງແນ່ນອນ ແລະ ອາດຈະຢູ່ຕໍ່ກັບ “ຜີສາດແດງ”

ວັນອາທິດທີ 27 ມີນາ 2022 ທ່າມກາງຄວາມວຸ້ນວາຍໃນໄລຍະຫຼາຍເດືອນທີ່ຜ່ານມາວ່າ ພອລ ປັອກບາ ກອງກາງຂອງ ແມນເຊັສເຕີ ຢູໄນເຕັດ ກຽມຈະຍ້າຍອອກຈາກສະໂມສອນໃນທ້າຍລະດູການນີ້. ເຊິ່ງເຈົ້າໂຕຍັງເຫຼືອສັນຍາອີກບໍ່ເທົ່າໃດເດືອນກັບທີມເທົ່ານັ້ນ ແລະໃນເວລານີ້ລາວສາມາດຕົກລົງກັບທີມໃດກໍ້ໄດ້ໃນໂລກນີ້

ຢ່າງໃດກໍ່ຕາມ, ລ່າສຸດ Sun Sports ສື່ກິລາທີ່ມີຊື່ສຽງຂອງອັງກິດ. ໄດ້ເປີດເຜີຍການໃຫ້ສໍາພາດກັບ ປັອກບາ ທີ່ມີຄໍາເວົ້າບາງຄຳກ່ຽວກັບຄວາມຜິດຫວັງຂອງລາວກັບທີມໃນລະດູການນີ້ ແລະ ຄໍາເວົ້າທີ່ ປັອກບາ ໄດ້ເປີດເຜີຍເອງວ່າ ອາດຈະມີໂອກາດໄດ້ຫຼີ້ນກັບສະໂມສອນໃນລະດູການຕໍ່ໄປ. ເນື່ອງຈາກວ່າລາວຍັງຮູ້ສຶກຜິດຫວັງທີ່ຍັງບໍ່ສາມາດສ້າງແຮງບັນດານໃຈໃຫ້ກັບສະໂມສອນໄດ້ເປັນເວລາກວ່າ 5 ປີເຕັມ.

“ຂ້ອຍຕ້ອງການຄວ້າແຊ້ມ ການຫຼີ້ນເພື່ອບາງຢ່າງໃນປີນີ້ ແລະ ຫລາຍໆປີພວກເຮົາບໍ່ໄດ້ແຊ້ມ. ມັນເຮັດໃຫ້ຂ້ອຍເສົ້າຫຼາຍ ລະດູການນີ້ຍັງບໍ່ຈົບແຕ່ກໍ່ຄຶຈົບ ເພາະພວກເຮົາບໍ່ມີລາງວັນໃຫ້ລຸ້ນອີກແລ້ວ.”

“ຂ້ອຍຍັງບໍ່ໄດ້ຕັດສິນໃຈອະນາຄົດຂອງຂ້ອຍເທື່ອ. ບໍ່ມີຫຍັງຢືນຢັນເທື່ອ ຂ້ອຍສາມາດຕັດສິນໃຈມື້ອື່ນ ຫຼື ທຸກເວລາໃນຕະຫຼາດການຊື້ຂາຍ ຂ້ອຍສາມາດເຮັດໄດ້ທັງຫມົດ, ຂ້ອຍຕ້ອງການກັບຄືນມາ ແລະ ຈົບລະດູການຢ່າງສວຍງາມ. ການຫຼິ້ນ​ໃຫ້​ປະ​ເທດ​ຝຣັ່ງ​ ຊ່ວຍເຕີມພະລັງໄຟໃຫ້ຂ້ອຍກັບມາສູ້ຕໍ່ກັບສະໂມສອນ.”