ສໍາເລັດຊຸດຝຶກອົບຮົມຫຼັກສູດການບໍລິຫານ-ຄຸ້ມຄອງລັດໃຫ້ພະນັກງານການນຳຂັ້ນກົມ ແລະ ທຽບເທົ່າ ຊຸດທີ I
ວັນທີ 25 ມີນາ 2022 ນີ້, ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ກະຊວງພາຍໃນ ແລະ ສະຖາບັນການເງິນ-ການບັນຊີ ກະຊວງການເງິນ, ໄດ້ຈັດພິທີປິດຊຸດອົບຮົມຫຼັກສູດການບໍລິຫານ-ຄຸ້ມຄອງລັດໃຫ້ພະນັກງານການນຳຂັ້ນກົມ ແລະ ທຽບເທົ່າ ຊຸດທີ I ປະຈຳປີ 2022.
ພິທີປິດຊຸດອົບຮົມດັ່ງກ່າວໄດ້ຈັດຂຶ້ນທີ່ສະຖາບັນການເງິນ-ການບັນຊີ ກະຊວງການເງິນ, ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະ ມົນຕີກະຊວງການເງິນ, ມີທ່ານ ນິສິດ ແກ້ວປັນຍາ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງພາຍໃນ, ຄະນະປະຈຳພັກ, ກຳມະການພັກກະຊວງ, ຫົວໜ້າພະແນກການເງິນແຂວງ, ນັກວິທະຍາກອນ, ນັກສຳມະນາກອນຈາກບັນດາກົມ, ສະຖາບັນ, ພະແນກການເງິນ 6 ແຂວງ, ວິທະຍາໄລການເງິນພາກໃຕ້ເຂົ້າຮ່ວມ.
ຊຸດອົບຮົມຫຼັກສູດການບໍລິຫານ-ຄຸ້ມຄອງລັດໃຫ້ພະນັກງານການນຳຂັ້ນກົມ ແລະ ທຽບເທົ່າ ຊຸດທີ I ປະຈຳປີ 2022, ເພື່ອເສີມສ້າງໃຫ້ພະນັກງານການນຳຂັ້ນກົມ, ຫົວໜ້າພະແນກການເງິນແຂວງ ແລະ ທຽບເທົ່າຂຶ້ນກັບກະຊວງການເງິນ, ກຳແໜ້ນພື້ນຖານທິດສະດີ, ແນວທາງນະ ໂຍບາຍຂອງພັກ ແລະ ກົດໝາຍຂອງລັດໃນການຄຸ້ມຄອງວຽກງານເສດຖະກິດ-ການເງິນ, ວາລະແຫ່ງຊາດ, ແຜນພັດທະນາເສດຖະກິດຕາມທິດສັງຄົມນິຍົມຢ່າງມີຫຼັກການຮອບດ້ານຂອງພັກ; ຍົກສູງຂີດຄວາມສາມາດການນຳພາ-ຊີ້ນຳ ແລະ ໝູນໃຊ້ຫຼັກການບໍລິຫານຄຸ້ມຄອງລັດເຂົ້າໃນການບໍລິຫານວຽກງານຕ່າງໆຢູ່ຂັ້ນມະຫາພາກ ແລະຂັ້ນທ້ອງຖິ່ນ ໂດຍນຳໃຊ້ຫຼັກທິດສະດີ ແລະ ພຶດຕິກຳທີ່ໄດ້ຮຽນມາຢ່າງເປັນລະບົບເຂົ້າໃນການບໍລິຫານ, ການຄຸ້ມຄອງລັດ, ການພັດທະນາ, ການປະສານງານ, ການຕິດຕາມກວດກາວຽກງານຢູ່ຂັ້ນ ແລະ ຄວາມຮັບຜິດຊອບຂອງຕົນ. ນອກນັ້ນ, ເພື່ອໃຫ້ກໍາໄດ້ ແລະ ເຂົ້າໃຈເຖິງລະບຽບກົດໝາຍ, ຂັ້ນຕອນ, ວຽກງານການຂອງຂະແໜງການເງິນ, ເພື່ອເປັນຂໍ້ມູນໃນການສ້າງແຜນງົບປະມານປະຈຳປີ ແລະ ຈັດສັນງົບປະມານຂອງຂະແໜງການຕາມຄວາມເໝາະສົມ.
ສຳລັບເນື້ອໃນຫຼັກສູດຝຶກອົບຮົມໄດ້ແບ່ງອອກເປັນ 3 ພາກ, ໂດຍໄດ້ດຳເນີນເປັນເວລາ 10 ວັນທາງລັດຖະການ, ລວມ 80 ຊົ່ວໂມງ. ໃນນີ້, ພາກເຊື່ອມຊຶມກຳແໜ້ນແນວທາງນະໂຍບາຍ ປະກອບມີ 16 ຫົວຂໍ້ (ຕາມຫຼັກສູດກະຊວງການເງິນ); ພາກບໍລິຫານຄຸ້ມຄອງ ແລະ ພາກຄວາມຮູ້ທົ່ວໄປປະກອບມີ 11 ຫົວຂໍ້; ພາກວິຊາສະເພາະ ປະກອບມີ 6 ຫົວຂໍ້.
ຈາກນັ້ນ, ກໍໄດ້ມອບໃບຢັ້ງຢືນໃຫ້ບັນດານັກສໍາມະນາກອນທີ່ສໍາເລັດຊຸດອົບຮົມຫຼັກສູດການບໍລິຫານ-ຄຸ້ມຄອງລັດໃຫ້ພະນັກງານການນຳຂັ້ນກົມ ແລະ ທຽບເທົ່າ ຊຸດທີ I ປະຈຳປີ 2022, ຊຶ່ງມອບໂດຍທ່ານ ນິສິດ ແກ້ວປັນຍາ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງພາຍໃນ.
ໂອກາດນີ້, ທ່ານ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການເງິນ, ໄດ້ມີຄຳເຫັນໂອ້ລົມ ແລະ ຊົມເຊີຍຄະນະຮັບຜິດຊອບຈັດຊຸດຝຶກອົບຮົມ, ບັນດາວິທະຍາກອນ, ນັກສຳມະນາກອນທີ່ໄດ້ມີຄວາມຕັດສິນໃຈສູງເຂົ້າຮ່ວມຊຸດຝຶກອົບຮົມໃນຄັ້ງນີ້, ຊຶ່ງເປັນການຍົກລະ ດັບຄວາມາຮູ້, ຄວາມສາມາດໃນການນຳພາ, ຄຸ້ມຄອງ, ເປັນພະນັກງານຫຼັກແຫຼ່ງຂອງກະຊວງການເງິນ ແລະ ເຊື່ອໝັ້ນວ່າ ບັນດາສຳມະນາກອນໄດ້ເຂົ້າໃຈເລິກເຊິ່ງກ່ວາເກົ່າກ່ຽວກັບທິດຊີ້ນຳຂອງພັກ, ກຳແໜ້ນບັນຫາຕ່າງໆສ້າງທ່າຫັນ ປ່ຽນໃໝ່ພາຍໃຕ້ການນຳພາຂອງພັກ, ການບໍລິຫານຂອງລັດກໍຄືການຫັນເປັນທັນສະໄໝ ແລະ ອື່ນໆ.
