ຄວາມຄືບໜ້າໂຄງການຊົນລະກະເສດ ແລະ ຊົນນະບົດຮອບດ້ານ ຢູ່ແຂວງສະຫວັນນະເຂດ

ໃນກອງປະຊຸມຄັ້ງນີ້, ໄດ້ເຫັນດີເປັນເອກະພາບ ຮັບຮອງເອົາບັນດາໜ້າວຽກການກໍ່ສ້າງໂຄງການ ແລະ ບໍລິມາດວຽກ ສຳເລັດ 35,77% ຂອງມູນຄ່າສັນຍາ ເທົ່າກັບມູນຄ່າ 9 ລ້ານກວ່າໂດລາສະຫະລັດ ຕາມການບົດບັນທຶກກວດກາໃນຄັ້ງຜ່ານມາ (ເມືອງຈໍາພອນ ລະບົບຫົວງານສຳເລັດ 70% ແລະ ຄອງເໝືອງ ປະມານ 78%, ເມືອງສອງຄອນ ລະບົບຫົວງານສຳເລັດ 22% ແລະ ຄອງເໝືອງ ປະມານ 90%); ຮັບຮອງເອົາບັນດາໜ້າວຽກເພີ່ມ ແມ່ນມີຄວາມຈຳເປັນທາງດ້ານເຕັກນິກ ແລະ ຮັບປະກັນຄຸນນະພາບການກໍ່ສ້າງ ເພື່ອສະເໜີທະນາຄານຂາເຂົ້າ-ຂາອອກ ສ ເກົາຫລີ; ໄດ້ເຫັນດີທາງດ້ານຫລັກການ ໃນການນຳໃຊ້ເງິນແຮໂຄງການທີ່ຍັງເຫລືອມູນຄ່າ 8 ລ້ານໂດລາສະຫະລັດ ໂດຍໃຫ້ຈັດລຽງໜ້າວຽກທີ່ເປັນບູລິມະສິດ ໂດຍສະເພາະ ການກໍ່ສ້າງຄອງເໝືອງຂັ້ນສອງ-ຂັ້ນສາມ ເພື່ອໃຫ້ສາມາດສະໜອງນໍ້າໄດ້ເຕັມພື້ນທີ່ ແລະ ມີປະສິດທິຜົນສູງ, ການສ້າງເສັ້ນທາງປູຢາງໃນເສັ້ນທາງທີ່ກຳນົດ, ການຕິດຕັ້ງລະບົບບໍລິຫານຈັດການນໍ້າທັນສະໄໝ, ຄົ້ນຄວ້າຕໍ່ຄອງ ເໝືອງ ເພື່ອຂະຫຍາຍເນື້ອທີ່ສະໜອງນໍ້າ ໄດ້ຕື່ມອີກ ປະມານ 250 ເຮັກຕາ ແລະ ວຽກປັບປຸງສັນຄູປ້ອງກັນເຈື່ອນ ຂອງອ່າງເກັບນໍ້າສຸຍ ຢູ່ຈຸດທີ່ມີຄວາມສ່ຽງ.

ໂຄງການພັດທະນາຊົນລະກະເສດ ແລະ ຊົນນະບົດຮອບດ້ານ ໄດ້ເລີ່ມຈັດຕັ້ງປະຕິບັດມາແຕ່ເດືອນມີນາ 2020 ແລະ ເປັນໂຄງການໜຶ່ງ ທີ່ຈະຊ່ວຍເຂົ້າໃນການຈັດຕັ້ງປະຕິບັດ ຜັນຂະຫຍາຍຍຸດທະສາດພັດທະນາກະສິກໍາ ຮອດ ປີ 2025 ແລະ ວິໄສທັດຮອດ ປີ 2030 ໂດຍສະເພາະ ແຜນງານຄໍ້າປະກັນສະບຽງອາຫານ ແລະ ຜະລິດເປັນສິນຄ້າກະສິກໍາທັນສະໄໝ ໂດຍແມ່ນບໍລິສັດ ອ່ຽວຊູ-ດົງບູ ສ ເກົາຫລີ ຮັບເໝົາກໍ່ສ້າງ ແລະ ຊ່ຽວຊານທີ່ປຶກສາ ດາຊານ-ໂຍຊິນ ສ ເກົາຫລີ ທີ່ເຮັດວຽກງານການກວດສອບຄຸນນະພາບການກໍ່ສ້າງ.