ບາເຊໂລນາ ບໍ່ສ່ຽງເຊັນ ເອັມບັບເປ-ຮາແລນ ແນ່ນອນ

‘‘ ໂຈນ ລາປໍຕາ ’’ ເຈົ້າຂອງທີມ ບາເຊໂລນາ ທີມໃຫຍ່ແຫ່ງ ລາ ລີກາ ສະເປນ ຢືນຢັນຈະບໍ່ເຊັນສັນຍາກັບນັກເຕະລະດັບຊຸບເປີສະຕາຢ່າງ ຄີລຽນ ເອັມບັບເປ ຫລື ເອີຣິງ ຮາແລນ ແນ່ນອນ ຫາກການຄວ້ານັກເຕະທັງສອງມາຮ່ວມທີມຈະເຮັດໃຫ້ສະຖານະການທາງການເງິນຂອງທີມຕ້ອງຕົກຢູ່ໃນຄວາມສ່ຽງອີກເທື່ອຫນຶ່ງ.

ບາເຊໂລນາ ຕົກເປັນຂ່າວກັບ ເອັມບັບເປ ທີ່ພວມຈະຫມົດສັນຍາກັບ ປາຣາ ແຊັງ ແຊັກແມັງ ແລະ ຮາແລນ ທີ່ກຽມໂບກມືລາ ໂບຣຸສເຊຍ ດອດມຸນ ຫລັງຈົບລະດູການນີ້ມາດົນ.

ແນວໃດກໍຕາມ ການເຊັນສັນຍາກັບທັງຄູ່ຕ້ອງໃຊ້ງົບປະມານມະຫາສານ ໂດຍສະເພາະກັບ ຮາແລນ ທີ່ມີການປະເມີນເອົາໄວ້ວ່າ ສະໂມສອນທີ່ຈະຄວ້າຕົວລາວເຂົ້າສັງກັດຫນ້າຈະຕ້ອງຈ່າຍຄ່າຕົວ ແລະ ຄ່າຈ້າງຕະຫລອດສັນຍາສູງເຖິງ 300 ລ້ານຢູໂຣ.

ດ້ວຍເຫດນີ້ ລາປໍຕາ ຈຶ່ງກ່າວວ່າ ບາເຊໂລນາ ທີ່ມີຫນີ້ສິນຈຳນວນຫລາຍເຖິງ 1,15 ພັນລ້ານປອນ ຫນ້າຈະບໍ່ເອົາຄວາມຫມັ້ນຄົງທາງການເງິນຂອງສະໂມສອນໄປສ່ຽງເພື່ອເຊັນສັນຍາກັບ ເອັມບັບເປ ຫລື ຮາແລນ ແນ່ນອນ.

‘‘ ຂ້ອຍຂໍຢືນຢັນວ່າ ຂ້ອຍຈະບໍ່ເວົ້າເຈາະຈົງເຖິງນັກເຕະຄົນໃດເປັນພິເສດ ແຕ່ຂ້ອຍສາມາດບອກໄດ້ເລີຍວ່າ ເຮົາຈະບໍ່ດຳເນີນປະຕິບັດການໃດໆທີ່ຈະເຮັດໃຫ້ສະໂມສອນຕົກຢູ່ໃນພາວະຄວາມສ່ຽງແນ່ນອນ ມັນເປັນຫລກການທີ່ເຮົາປະຕິບັດຕາມມາຕະຫລອດ ນັບຕັ້ງແຕ່ເຮົາກັບມາເປັນປະທານສະໂມສອນອີກເທື່ອຫນຶ່ງ ’’.

‘‘ ມັນເກີດຂຶ້ນກັບເຮົາໃນສະຖານະການແວດລ້ອມທີ່ຫລາກຫລາຍ ແລະ ເຮົາຈະປະຕິບັດຕາມປັດສະຍານີ້ຕໍ່ໄປ ໂດຍບໍ່ເຮັດໃຫ້ສະໂມສອນຢູ່ໃນຄວາມສ່ຽງຈາກການປະຕິບັດຂອງເຮົາ ເຖິງວ່າເຮົາຈະກັບມາແຂງແກ່ນຄືເກ່ົາແລ້ວກໍຕາມ ’’.