ປິດຕຳນານນັກມວຍປ້ຳດາວຮ້າຍ Triple H ແຊ້ມໂລກ WWE 14 ສະໄໝ ປະກາດອຳລາວົງການ
ໃຜທີ່ເປັນແຟນກິລາມວຍປ້ຳຍຸກ 90 ຕ້ອງຮູ້ຈັກ “Triple H” ຫຼື “HHH” ນັກມວຍປ້ຳທີ່ຮັບບົດບາດເປັນໂຕຮ້າຍຂອງສະມາຄົມໄດ້ເປັນຢ່າງດີ ແລະ ຫຼັງຈາກໂລດແລ່ນໃນສັງວຽນອາຊີບມາຍາຫຼາຍກວ່າ 30 ປີ ໃນທີ່ສຸດລາວໄດ້ປະກາດອຳລາ ເລີກການຕໍ່ສູ້ຢ່າງເປັນທາງການ
Triple H, ຫຼືຊື່ແທ້ແມ່ນ Paul Levesque, ກ່ອນໜ້ານີ້ຕ້ອງເຂົ້າຮັກສາໂຕທີ່ໂຮງໝໍ ຫຼັງຈາກເກີດພາວະຫົວໃຈລົ້ມເຫຼວຮ້າຍແຮງກ່ອນທີ່ຈະຖືກສົ່ງໄປຮັບການຜ່າຕັດ ແລະ ປະສົບຜົນສໍາເລັດໄປດ້ວຍດີ ໃນເດືອນກັນຍາປີຜ່ານມານີ້, ເຖິງແມ່ນວ່າຊ່ວງຫຼັງລາວບໍ່ຄອຍໄດ້ປາກົດໂຕໃນເວທີທຸກໆອາທິດຄືກັບຕອນທີ່ສະໄໝຍັງໜຸ່ມ ແຕ່ Triple H ກໍ່ໄດ້ສະແດງຕົວໃຫ້ກັບ WWE ໃນໂອກາດຕ່າງໆ. ລວມທັງການເຮັດວຽກຢູ່ເບື້ອງຫຼັງຂອງສະມາຄົມ ພ້ອມກັບການປຸກປັ້ນແບຣນ NXT ເຊິ່ງເປັນແບຣນລູກຂອງ WWE ໃຫ້ກາຍເປັນບ່ອນປຸກປັ້ນຂອງນັກມວຍປ້ຳຫຼາຍຄົນໃນຍຸກສະໄໝໃໝ່, ແລ້ວຄ່ອຍໆຫຼຸດບົດບາດໂຕເອງໃນຍຸກປັດຈຸບັນ.
ຢ່າງໃດກໍ່ຕາມ, ດ້ວຍອາຍຸທີ່ເພີ່ມຂຶ້ນ ແລະ ບັນຫາສຸຂະພາບທີ່ມີຢູ່ ເຮັດໃຫ້ HHH ອາຍຸ 52 ປີ ໃຫ້ສຳພາດກັບສື່ ESPN+ ວ່າລາວຈະບໍ່ຂຶ້ນເວທີໃນຖານະນັກມວຍປ້ຳອີກແລ້ວ ເພື່ອຮັກສາສຸຂະພາບ ແລະ ໄດ້ປະຖິ້ມຜົນງານການເປັນອະດີດແຊ້ມໂລກ 14 ສະໄໝ ໄວ້ເປັນຕໍານານຂອງວົງການມວຍປໍ້າ
ທີ່ມາ :https://twitter.com/WWE/status/1507386044660035585
