2 ທີມໃຫຍ່ ກຽມຍາດ ເທນ ຮາກ ຕັດຫນ້າແມນຢູ
ສື່ອັງກິິດລາຍງານວ່າ 2 ທີມໃຫຍ່ໃນຢູໂຣບ ສະແດງຄວາມສົນໃຈດຶງ ເອຣິກ ເທນ ຮາກ ຜູ້ຈັດການທີມ ອາແຈັກ ອຳເຕີດຳ ໃນການໄປເຮັດຫນ້າທີ່ຜູ້ຈັດການທີມຄົນໃຫມ່ເຊັ່ນດຽວກັບ ແມນເຊສເຕີ ຢູໄນເຕັດ.
ສຳລັບ ເທນ ຮາກ ຕົກເປັນຂ່າວຄືຕົວເລືອກທຳອິດໃນການເປັນຜູ້ຈັດການທີມຄົນໃຫມ່ຂອງ ແມນເຊສເຕີ ຢູໄນເຕັດ ແລະ ມີລາຍງານວ່າລາວໄດ້ເຂົ້າໄປສຳພາດກັບຄະນະບໍລິຫານຂອງ ແມນຢູ ເປັນທີ່ຮຽບຮ້ອຍແລ້ວ.
ຈົນຫລ້າສຸດ ‘‘ Mail ’’ ສື່ຂອງອັງກິດເປີດເຜີຍວ່າ ບໍ່ແມ່ນແຕ່ ແມນເຊສເຕີ ຢູໄນເຕັດ ທີ່ໃຫ້ຄວາມສົນໃຈດຶງ ເທນ ຮາກ ເຂົ້າໄປເປັນຜູ້ຈັດການທີມຄົນໃຫມ່ ເນື່ອງຈາກມີອີກ 2 ທີມໃນຢູໂຣບທີ່ຢາກໄດ້ຄູເຝິກອາຍຸ 52 ປີ ໄປຄຸມທີມ.
ໂດຍ 2 ທີມດັ່ງກ່າວບໍ່ມີການເປີດເຜີຍຊື່ແຕ່ຢ່າງໃດ ແຕ່ມີລາຍງານເພີ່ມວ່າ ພວກເຂົາຄືທີມທີ່ໄດ້ຫລິ້ນໃນບານເຕະຢູຟາ ແຊ໊ມປຽນ ລີກ ເປັນປະຈຳ ແລະ ໄດ້ມີຫນຶ່ງສະໂມສອນໄດ້ຍື່ນຂໍ້ສະເຫນີໃຫ້ກັບ ເທນ ຮາກ ພິຈາລະນາ.
ທັງນີ້ ຫາກ ແມນຢູ ພາດຮ່ວມງານກັບ ເທນ ຮາກ ແທ້, ພວກເຂົາຍັງມີຕົວເລືອກອື່ນໆທີ່ຢູ່ໃນລາຍຊື່ ເຊັ່ນ ເມົາຣີຊີໂອ ໂປເຊັດຕີໂນ ຈາກສະໂມສອນ ປາຣີ ແຊັງ ແຊັກແມັງ ແລະ ຄູລຽນ ໂລເປເຕກີ ຈາກສະໂມສອນ ເຊບີຢາ ແລະ ຫລຸຍ ເອັນຣີເກ ທີ່ຫາກໍພາທີມສະເປນຕົກຮອບບານໂລກໄປຫມາດໆ.
