ທະນາຄານຮ່ວມທຸລະກິດລາວຫວຽດນາມມອບເຄື່ອງຊ່ວຍເຫລືອຄອບຄົວທຸກຍາກທີ່ເມືອງຊຽງຮ່ອນ.

     ໃນວັນທີ 23 ມີນາຜ່ານມານີ້, ທະນາຄານຮ່ວມທຸລະກິດລາວຫວຽດ (LaoViet Bank) ໄດ້ມອບເຄື່ອງຊ່ວຍເຫລືອໃຫ້ແກ່ຄອບຄົວທຸກຍາກທີ່ເມືອງຊຽງຮ່ອນ ແຂວງໄຊຍະບູລີ ເນື່ອງໃນໂອກາດຕ້ອນຮັບປີໃໝ່ລາວ ພສ 2560 ທີ່ຈະມາເຖິງນີ້.

ເຄື່ອງຊ່ວຍເຫລືອຄັ້ງນີ້ນອນຢູ່ໃນໂຄງການຊ່ວຍເຫລືອສັງຄົມຂອງ LaoViet Bank ໃຫ້ແກ່ບັນດາຄອບຄົວທຸກຍາກໃນທ້ອງຖິ່ນຕ່າງໆ ລວມມີມູນຄ່າທັງໝົດ 80 ລ້ານກີບ ເຊິ່ງປະກອບມີເຂົ້າສານ, ນ້ຳປາ, ນ້ຳມັນພືດ, ແປ້ງນົວ ແລະ ອື່ນໆ. ນີ້ເປັນເຄື່ອງຊ່ວຍເຫລືອຈາກການປະກອບ ສ່ວນຂອງບັນດາພະນັກງານໃນທົ່ວ LaoViet Bank ເພື່ອຊ່ວຍແບ່ງເບົາຄວາມຫຍຸ້ງຍາກຂາດ ເຂີນ ແລະ ເປັນກຳລັງໃຈໃຫ້ປະຊາຊົນຜູ້ທຸກຍາກຂາດເຂີນບຸນບືນພັດທະນາຊີວິດການເປັນຢູ່ຂອງຕົນໃຫ້ດີຂຶ້ນ.

ເຄື່ອງຊ່ວຍເຫລືອດັ່ງກ່າວນອກຈາກມອບໃຫ້ແຂວງໄຊຍະບູລີແລ້ວ, ທະນາຄານລາວຫວຽດ ຈະໄດ້ນຳໄປມອບໃຫ້ປະຊາຊົນຜູ້ທຸກຍາກຂາດເຂີນຢູ່ແຂວງຫລວງພະບາງ ແລະ ອຸດົມໄຊຕື່ມອີກ ເພື່ອມອບເຄື່ອງຊ່ວຍເຫລືອໃຫ້ເຖິງມືບັນດາຄອບຄົວຄົນທຸກຍາກຢູ່ແຕ່ລະທ້ອງຖິ່ນ. ໃນປີ 2017 ທະນາຄານຮ່ວມທຸລະກິດລາວຫວຽດ ຈະສືບຕໍ່ປະສານສົມທົບກັບສະພາແຫ່ງຊາດ, ບັນດາອົງການຈັດຕັ້ງຕ່າງໆຂອງລາວ ເພື່ອຈະສືບຕໍ່ການຊ່ວຍເຫລືອສັງຄົມໃຫ້ມີຄວາມກວ້າງຂວາງຂຶ້ນຕື່ມ.